អាជីវករមួយចំនួនត្អូញត្អែរថាលក់មិនដាច់សោះ
- ប៉ៃលិន
ខេត្តប៉ៃលិន ៖ ជារៀងរាល់ថ្ងៃ ទាំងអាជីវករលក់ដូរបន្លែត្រសក់ សណ្តែកកួរ ស្ពៃ ខាត់ណា ត្រី សាច់ជ្រូក សាច់មាន់…
ខេត្តប៉ៃលិន ៖ ជារៀងរាល់ថ្ងៃ ទាំងអាជីវករលក់ដូរបន្លែត្រសក់ សណ្តែកកួរ ស្ពៃ ខាត់ណា ត្រី សាច់ជ្រូក សាច់មាន់ សាច់ទា និងម្ហូបអាហារផ្សេងៗ តែងតែសប្បាយរីករាយលក់ឱ្យប្រជាពលរដ្ឋយ៉ាងមមារញឹកស្ទើររកពេលទំនេរមិនបាននោះឡើយ ។ ប៉ុន្តែនៅរដូវបុណ្យចូលឆ្នាំចិនវៀតណាមនេះ អាជីវករដែលក់ដូរនៅខាងក្នុងផ្សារពោលត្អូញត្អែរថា ការលក់ដូររបស់ពួកគាត់ អត់មានអតិថិជនចូលទិញនោះឡើយ ដោយលក់ក្នុង១មុខត្រឹមតែ៣ទៅ៥គីឡូក្រាម ក៏នៅសល់ជាច្រើនផងដែរ ។
ប្រភពព័ត៌មានពីស្ត្រីម្នាក់ ឈ្មោះ យាយម៉ាប់ អាយុ៤៥ឆ្នាំ ប្រកបរបរលក់បន្លែនៅក្នុងផ្សារត្រី ស្ថិតក្នុងភូមិប៉ាហ៊ីជើង សង្កាត់ប៉ៃលិន ក្រុងប៉ៃលិន ខេត្តប៉ៃលិន បានរៀបរាប់ទាំងទឹកមុខស្រពោន ឱ្យដឹងថា នៅថ្ងៃ១៥ ខែកុម្ភៈ នេះ គាត់ប្រាកដជាលក់អត់ដាច់ទៀតហើយ ដោយកាលពីម្សិលមិញបន្លែរបស់គាត់ជាច្រើនមុខនៅសល់ស្ទើរទាំងអស់ ហើយទុកដាក់លក់រហូតមកដល់ថ្ងៃនេះទៀត ក៏នៅតែអត់មានម៉ូយចូលទៅទិញដូចសព្វមួយដងដែរ ។
គាត់បន្តទៀតថា រាល់ថ្ងៃមុនបុណ្យចូលឆ្នាំចិន ក្នុង១ថ្ងៃៗ យ៉ាងហោចណាស់ក៏គាត់អាចលក់ដាច់បានប្រាក់១០ម៉ឺន ទៅ១៥ម៉ឺនរៀលដែរ ។ តែនៅពេលនេះលក់ដាច់បានប្រាក់ត្រឹមតែ៤ទៅ៥ម៉ឺនរៀល សម្រាប់យកទៅបង់ថ្លៃបន្លែដែលលើកពីគេមកស្ទើរមិនគ្រប់នោះឡើយ ។ មូលហេតុលក់អត់ដាច់នេះ ដោយសារតែប្រជាពលរដ្ឋនាំគ្នាមកទិញអីវ៉ាន់សម្រាប់យកទៅធ្វើម្ហូប និងសែនព្រេនតែនៅខាងក្រៅៗផ្សារប៉ុណ្ណោះ ដោយស្ពៃក្ដោបនៅខាងក្នុងផ្សារ គាត់លក់ត្រឹមតែ១គីឡូក្រាមតម្លៃ៣ពាន់រៀល តែនៅខាងក្រៅ១គីឡូក្រាមលក់បានថ្លៃ៤,៥០០ទៅ៥,០០០រៀលក៏គេទិញដែរ ។ ពេលខ្លះនៅខាងក្រៅអស់បន្លែអ្នកលក់ដូចគ្នាបានចូលទៅលើកយកពីគាត់ ហើយក៏លក់ឱ្យគេយកទៅលក់ ដើម្បីចំណេញបន្តគ្នាផងដែរ ។
ចំណែកប្រជាពលរដ្ឋដែលនាំគ្នាទៅទិញបន្លែបានបង្ហើបឱ្យដឹងថា មូលហេតុដែលពួកគេអត់ចូលទៅទិញបន្លែ ត្រីសាច់នៅខាងក្នុងផ្សារ ដោយសារប្រញាប់យកម្ហូបអាហារទាំងនោះទៅរៀបចំ ធ្វើឱ្យទាន់ពេលវេលាសែនព្រេន ហើយម្យ៉ាងវិញទៀត ដោយសារខាងក្នុងផ្សារមានសភាពចង្អៀត ព្រោះរដូវបុណ្យចូលឆ្នាំចិននេះ មានមនុស្សអ៊ូអរច្រើន ណាមួយក្រែងបាត់ម៉ូតូរបស់ខ្លួន ដែលចតចោលនៅខាងក្រៅផ្សារថែមទៀត ៕
ចែករំលែកព័តមាននេះ