ខេត្តប៉ៃលិន ៖ នាំគ្នាកាប់ចិញ្ច្រាំដំឡូងមីសុខៗ លុះដល់ពេលសម្រាកនាំគ្នាផឹកស្រាស ជួបជុំមិត្តភក្តិ ៤ទៅ៥នាក់ រហូតដល់ស្រវឹងជោគជាំ ស្រាប់តែនាំគ្នាហែលទឹកស្រះមួយកន្លែង លេងយ៉ាងសប្បាយ។ ប៉ុន្តែជាអកុសលមួយសន្ទុះក្រោយមក…
ខេត្តប៉ៃលិន ៖ នាំគ្នាកាប់ចិញ្ច្រាំដំឡូងមីសុខៗ លុះដល់ពេលសម្រាកនាំគ្នាផឹកស្រាស ជួបជុំមិត្តភក្តិ ៤ទៅ៥នាក់ រហូតដល់ស្រវឹងជោគជាំ ស្រាប់តែនាំគ្នាហែលទឹកស្រះមួយកន្លែង លេងយ៉ាងសប្បាយ។ ប៉ុន្តែជាអកុសលមួយសន្ទុះក្រោយមក ស្រាប់តែលិចបាត់ម្នាក់ក៏នាំគ្នាហែលរកយ៉ាងណាមិនឃើញ ទើបរត់ទៅប្តឹងអាជ្ញាធរមូលដ្ឋាន និងនគរបាលឱ្យជួយអន្តរាគមន៍ ជួយរាវរកអស់ជាច្រើនម៉ោង ទើបប្រទះឃើញជនរងគ្រោះស្លាប់បាត់ទៅហើយ ក៏បង្កឱ្យមានការភ្ញាក់ផ្អើលតែម្តង។ ហេតុការណ៍ កម្មករដំឡូងមីស្រវឹងស្រាហែលទឹកស្រះលេងបណ្តាលឱ្យលង់ស្លាប់ម្នាក់នេះ បានកើតឡើងកាល ពីវេលាម៉ោង១២ និង១៤នាទីថ្ងៃត្រង់ ថ្ងៃទី១៤ ខែកុម្ភៈ ឆ្នាំ២០១៨ ត្រង់ចំណុចក្រោយស្តង់ពោត និងដំឡូងមី របស់លោក មុំ ម៉ៅ ក្នុងភូមិទំនប់ ឃុំស្ទឹងត្រង់ ស្រុកសាលាក្រៅ។
ប្រភពព័ត៌មានពីលោក គង់ ណន អធិការរងនគរបាលស្រុកសាលាក្រៅ បានឱ្យដឹងថា ជនរងគ្រោះមានឈ្មោះ ផែន ទីន ហៅ ភ័ក្ត្រ ភេទប្រុស អាយុ៣៨ឆ្នាំ ជាកម្មករដំឡូងមី រស់នៅភូមិកំរៀង ឃុំកំរៀង ស្រុកកំរៀង ខេត្តបាត់ដំបង មានប្រពន្ធឈ្មោះ កែវ នឿន អាយុ៣៨ឆ្នាំ ជាកម្មករស្នាក់នៅជាមួយជនរងគ្រោះ។ លោកបន្តទៀតថា មុនពេលកើតហេតុ ជនរងគ្រោះបាននាំប្រពន្ធកូនទៅ ស៊ីឈ្នួលកាប់ចិញ្ច្រាំមើមដំឡូងមីឱ្យថៅកែម្នាក់ តាំងព្រឹកព្រលឹមរហូតដល់ថ្ងៃត្រង់ដល់ម៉ោងសម្រាកហូបបាយ ស្រាប់តែជនរងគ្រោះបបួលមិត្តភក្តិ ៤ទៅ៥នាក់ នាំគ្នាអង្គុយផឹកស្រាស រួចក៏បបួលគ្នាហែលទឹកស្រះលេងដែលមានបណ្តោយ ជាង១០០ម៉ែត្រ ទទឹង៤០ម៉ែត្រ និងជម្រៅ៥ម៉ែត្រ។
ពេលកំពុងនាំគ្នារាវរកមើលក្តាម ខ្យង ក្បែរៗច្រាំងស្រះនោះ ដើម្បីយកទៅដុតក្លែមបន្ត ស្រាប់តែក្រឡេកមើលក្រោយបាត់មិត្តភក្តិម្នាក់ ក៏នាំគ្នាហែលរាវរកយ៉ាងណាក៏មិនឃើញ ទើបប្តឹងទៅខាងលោកឱ្យចុះទៅជួយរាវរក ក៏ប្រទះឃើញស្លាប់ ទៅហើយ។ លោកបញ្ជាក់ថា សពជនរងគ្រោះ ត្រូវបានរកឃើញនៅវេលាម៉ោង៣ និង៥០នាទីរសៀល ហើយក៏ប្រគល់ជូនក្រុមគ្រួសារ ដើម្បីយកទៅធ្វើបុណ្យនៅឯស្រុកកំណើតតាមប្រពៃណី។ សូមបញ្ជាក់ថា ការផឹកស្រារួច នាំគ្នាទៅលេងទឹកពិតជាគ្រោះថ្នាក់ខ្លាំងណាស់ ព្រោះពេលស្រវឹងខ្លាំងដួលទៅក្នុងទឹក មិនអាចងើបរួចនោះឡើយ៕
ចែករំលែកព័តមាននេះ