ខេត្តបាត់ដំបង ៖ បើតាមការពិនិត្យជាក់ស្ដែង ថ្ងៃបុណ្យនៃសេចក្ដីស្រលាញ់ នៅថ្ងៃទី១៤ កុម្ភៈ ២០១៨នេះ សម្រាប់ខេត្តបាត់ដំបង ហាក់មានសភាពស្ងប់ស្ងាត់ជាងឆ្នាំមុនៗ ប៉ុន្តែនៅតាមបណ្ដាផ្ទះសំណាក់…
ខេត្តបាត់ដំបង ៖ បើតាមការពិនិត្យជាក់ស្ដែង ថ្ងៃបុណ្យនៃសេចក្ដីស្រលាញ់ នៅថ្ងៃទី១៤ កុម្ភៈ ២០១៨នេះ សម្រាប់ខេត្តបាត់ដំបង ហាក់មានសភាពស្ងប់ស្ងាត់ជាងឆ្នាំមុនៗ ប៉ុន្តែនៅតាមបណ្ដាផ្ទះសំណាក់ ឬ សណ្ឋាគារមួយចំនួនហាក់មានការកើនឡើងនៃចំនួនភ្ញៀវស្នាក់នៅ។ មន្ត្រីសាលាក្រុងបាត់ដំបង បានឲ្យដឹងថា នៅថ្ងៃ១៤ កុម្ភៈនេះ ដែលជាថ្ងៃបុណ្យនៃសេចក្ដីស្រលាញ់ ដែលជាវប្បធម៌របស់បរទេស សម្រាប់ឆ្នាំ២០១៨នេះ នៅក្នុងខេត្តបាត់ដំបង ហាក់មានភាពស្ងប់ស្ងាត់គួរឲ្យកត់សម្គាល់ ខុសពីឆ្នាំមុនៗ ដែលមានយុវជនភាគច្រើនបាននាំគ្នាគោរពវប្បធម៌នេះយ៉ាងរោលរាល។ ប៉ុន្តែមន្ត្រីរូបនេះអះអាងថា នៅតាមផ្ទះសំណាក់ ឬតាមសណ្ឋាគារមួយចំនួនហាក់មានការកើនឡើងនូវភ្ញៀវស្នាក់នៅបន្តិច ខណៈដែលឱកាសបុណ្យចូលឆ្នាំចិន វៀតណាម កាន់តែខិតជិតមកដល់។
នៅក្នុងក្រុងបាត់ដំបង កន្លែងដែលធ្លាប់ដាក់តាំងផ្កាកុលាបលក់សម្រាប់ឆ្នាំនេះ គេឃើញមានការដាក់តាំងផ្កាលក់រកេតរកូត យ៉ាងសោះកក្រោះបំផុត។ កញ្ញា ចាន់រី ដែលជាអ្នកលក់ផ្កាកុលាបប្រចាំឆ្នាំ រាល់ទិវានៃសេចក្ដីស្រលាញ់ បានទទួលស្គាល់ថាឆ្នាំនេះពិតជាមានការថយចុះច្រើនសម្រាប់ក្រុមយុវជនដែលនិយមវប្បធម៌បរទេសមួយនេះ។ កញ្ញា ចាន់រី បាននិយាយទៀតថា ឆ្នាំនេះផ្កាកុលាបទិញចូលមានតម្លៃខ្ពស់ជាងឆ្នាំមុន តែលក់ចេញបានតំលៃប្រហែលឆ្នាំមុនគឺ១ទងថ្លៃ៤០០០រៀល រីឯអ្នកលក់ក៏ថយចុះច្រើនដែរ ដោយសារមិនសូវមានអ្នកទិញ។ ប៉ុន្តែបុណ្យនៃសេចក្ដីស្រលាញ់ ក្នុងឆ្នាំនេះគេសង្កេតឃើញក្រុមយុវជន យុវសិស្ស បានប្រមូលម្ដុំនៅតាមគុម្ពោតព្រៃក្នុងព្រលានយន្តហោះវាលបែកចាន នៅតាមខ្យូសក្នុងអាហារ ដ្ឋាននានាដែលជាកន្លែងស្ងាត់ និងបិទជិត និងមួយចំនួននៅតាមសួនច្បារសាធារណៈ។ ប៉ុន្តែពួកគេហាក់ ដូចជាបានផ្ដល់កាដូផ្កាកុលាប ឬវត្ថុអានុស្សាវរីយ៍តិចតួចដល់គ្នាទៅវិញទៅមក។
ដោយឡែកនៅតាម បណ្ដាផ្ទះសំណាក់ ឬសណ្ឋាគារវិញ មានសេចក្ដីរាយការណ៍ថា អាចមានតិចតួចចំពោះក្រុមយុវជន ដែលនាំគូស្នេហ៍ជួលស្នាក់នៅបណ្ដោះអាសន្ន តែភ្ញៀវស្នាក់នៅភាគច្រើនជាភ្ញៀវដែលធ្វើដំណើរ កម្សាន្តក្នុងឱកាសបុណ្យចូលឆ្នាំចិន វៀតណាម។ នេះបើពិនិត្យជាក់ស្ដែងគិតត្រិមម៉ោង៥ល្ងាចថ្ងៃ១៤ កុម្ភៈ ប៉ុន្តែគេមិនហ៊ានទស្សន៍ទាយបានឡើយ ចាប់ពីព្រលប់តទៅ ដែលអាចជាឱកាសម្រាប់យុវជនដឹកដៃគ្នា ចូលផ្ទះសំណាក់។ ជុំវិញការថយចុះនៃក្រុមយុវជនដែលនិយមគោរពវប្បធម៌បរទេសនេះ មន្ត្រីនៃមន្ទីរវប្បធម៌មួយរូបបានលើកឡើងថា ការថមថយនេះអាចជាការយល់ឃើញភាពត្រឹមត្រូវ រវាងវប្បធម៍ខ្មែរ និងវប្បធម៌បរទេស។ ពួកគេជាយុវជន ហាក់មានការយល់ដឹងច្រើនពីមួយឆ្នាំទៅមួយឆ្នាំ អំពីទំនៀមទម្លាប់ ឬវប្បធម៌ខ្មែរ និងវប្បធម៌បរទេសនេះ។ ការយល់ដឹងនេះក៏ដោយសារតែការប្រឹងប្រែង យកចិត្តទុកដាក់របស់ថ្នាក់ដឹកនាំរដ្ឋាភិបាល ដែលបានធ្វើការផ្សព្វផ្សាយអំពាវនាវជាបន្តបន្ទាប់ដល់ ប្រជាពលរដ្ឋខ្មែរគ្រប់ស្រទាប់វណ្ណៈ ឲ្យប្រកាន់ខ្ជាប់នូវទំនៀមទម្លាប់ប្រពៃណីខ្មែរ៕
https://youtu.be/ZE1FIP05loo
ចែករំលែកព័តមាននេះ