ខេត្តកំពង់ចាម ៖ នេះជាលើកទី២ហើយ ដែលភ្លើងបានឆាបឆេះពេញផ្ទៃបឹងកុក ភ្លើងឡើងក្រហមច្រាលផ្សែងខ្មួលខ្មាញ់ហុយទៅលើអាកាស ក្នុងសង្កាត់បឹងកុក ក្រុងកំពង់ចាម ដែលបានកើតឡើងនៅព្រលប់ថ្ងៃទី១៣ ខែកុម្ភៈ ឆ្នាំ២០១៨…
ខេត្តកំពង់ចាម ៖ នេះជាលើកទី២ហើយ ដែលភ្លើងបានឆាបឆេះពេញផ្ទៃបឹងកុក ភ្លើងឡើងក្រហមច្រាលផ្សែងខ្មួលខ្មាញ់ហុយទៅលើអាកាស ក្នុងសង្កាត់បឹងកុក ក្រុងកំពង់ចាម ដែលបានកើតឡើងនៅព្រលប់ថ្ងៃទី១៣ ខែកុម្ភៈ ឆ្នាំ២០១៨ បង្កឲ្យមានការភ្ញាក់ផ្អើលពេញក្រុងកំពង់ចាម ។ ក្នុងនោះមានរថយន្តពន្លត់អគ្គិភ័យរហូតដល់ទៅ១០គ្រឿង បានចេញមកជួយអន្តរាគមន៍បាញ់ទឹកពន្លត់ ដោយមិនបានឲ្យឆេះរាលដាលទៅដល់ផ្ទះរបស់ប្រជាពលរដ្ឋណានោះទេ តែស្ថានីយ៍ប្រេងឥន្ធនៈមួយក៏ព្រលឹងចុងសក់ដែរ ។
លោក ខ្ចង អូន ចៅសង្កាត់បឹងកុក មានប្រសាសន៍ឲ្យដឹងថា ដំបូងភ្លើងបានឆេះចេញភ្នក់ភ្លើងតូចចេញពីត្រង់ចេតិយក្នុងបរិវេណវត្តបឹងកុក នៅវេលាម៉ោង០២និង៣០នាទីរសៀល មិនមានអ្នកណាម្នាក់ចាប់អារម្មណ៍ទេ បន្ទាប់មកភ្លើងបានឆេះរាលដាលបន្តិចម្តងៗ មកដល់ស្មៅនៅមាត់បឹងកុកឆេះរាលទៅលើស្បូវដែលដុះនៅក្នុងបឹង ដែលងាប់ដោយត្រូវកំដៅថ្ងៃ ដោយមានអណ្តាតភ្លើងក្រហមច្រាលតែម្តង ។
លោកចៅសង្កាត់បឹងកុក មានប្រសាសន៍បន្តថា ក្រោយពីទទួលបានព័ត៌មានពីប៉ុស្តិ៍រដ្ឋបាលសង្កាត់បឹងកុកនោះ រូបលោក នឹងលោក ចាន់ ផល្លី អភិបាលក្រុងកំពង់ចាម បានដឹកនាំកម្លាំងចុះមកដល់មាត់បឹងជាបន្ទាន់ ដើម្បីពិនិត្យមើលស្ថានភាពដែលបានកើតឡើង ។ ភ្លាមៗនោះ លោកស្នងការនគរបាលខេត្ត
បានបញ្ជាឲ្យរថយន្តពន្លត់អគ្គិភ័យនៅតាមបណ្តាស្រុក-ក្រុង យ៉ាងហោចណាស់ចំនួន១០គ្រឿងចេញមកជួយអន្តរាគមន៍បាញ់ទឹកពន្លត់ ដើម្បីការពារកុំឲ្យឆេះរាលដល់ផ្ទះប្រជាពលរដ្ឋ ។
មូលហេតុដែលភ្លើងឆេះនេះ មិនមានអ្នកណាលួចដុតនោះទេ គឺផ្តើមចេញពីប្រជាពលរដ្ឋដែលបានដុតសំរាមចោល ហើយខ្វះការប្រុងប្រយ័ត្ន ទើបរាលដាលបណ្តាលឲ្យឆេះមកដល់ស្បូវ ដែលងាប់ហើយក្រៀមដុះនៅលើផ្ទៃទឹកបឹងនោះ ។ ក្នុងនាមអាជ្ញាធរ សូមសំណូមពរដល់ពលរដ្ឋដែលយកឃ្មុំ ឬដុតសំរាម សូមមេត្តាប្រុងប្រយ័ត្នមើលឲ្យបានគ្រប់ជ្រុងជ្រោយ ទាល់តែរលត់កន្លែងដុតសិន ព្រោះថានៅក្នុងខែនេះ ជារដូវប្រាំងដែលងាយបង្កអគ្គិភ័យ ប្រសិនណាបើយើងមានការធ្វេសប្រហែស បើទប់ស្កាត់មិនទាន់ នឹងបំផ្លាញទ្រព្យសម្បត្តិអស់យ៉ាងច្រើន ។
លោក ចាន់ ផល្លី អភិបាលក្រុងកំពង់ចាម ប្រាប់ឲ្យដឹងដែរថា ក្នុងពេលដែលមានអគ្គិភ័យកើតឡើងនោះ រូបលោកបានចុះទៅដល់កន្លែងកើតហេតុ ដោយមានកម្លាំងសមត្ថកិច្ចជាច្រើនក្នុងនោះមាននគរបាល អាវុធហត្ថ ដោយបានប្រើប្រាស់រថយន្តពន្លត់អគ្គិភ័យចំនួន១០គ្រឿងបាញ់ទឹក ដោយបានបាញ់អស់ចំនួន៣០រថយន្ត ទើបភ្លើងរលត់ទៅវិញ និងគ្រប់គ្រង់ស្ថានការបានទាំងស្រុង ។
សាក្សីនិយាយថា នៅមុខវិទ្យាល័យ ហ៊ុន សែន បឹងកុក មានស្ថានីយ៍លក់ប្រេងឥន្ធនៈមួយកន្លែងដែលភ្លើងស្ទើរតែឆេះដល់ តែត្រូវបានកម្លាំងសមត្ថកិច្ចជួយអន្តរាគមន៍ញាប់ដៃញាប់ជើង ក្នុងនោះមាននគរបាលពន្លត់អគ្គិភ័យ អាវុធហត្ថ វត្តមានស្នងការរងខេត្តជាច្រើននាក់ បានចុះបញ្ជាដោយផ្ទាល់ និងបានឲ្យបាញ់ទឹកការពារជាច្រើនរថយន្ត ទៅលើស្ថានីយ៍ប្រេងឥន្ធនៈមុខវិទ្យាល័យ ហ៊ុន សែន បឹងកុក ដើម្បីការពារមិនឲ្យភ្លើងឆេះដល់នោះទេ តែក៏មានអ្នកខ្លះភ័យបានជញ្ជូនរបស់ទ្រព្យ ចេញមកក្រៅផ្ទះផងដែរ ៕
ចែករំលែកព័តមាននេះ