ខេត្តបៃលិន ៖ រហូតមកដល់វេលាម៉ោង0៣រសៀល ថ្ងៃទី១៣ ខែកុម្ភ ឆ្នាំ២០១៨ គេសង្កេតឃើញមានសិស្សស្រីៗចំនួន៧នាក់ទៀត បានដួលសន្លប់ (ក្នុងនោះមានអ្នកខ្លះធ្លាប់សន្លប់ពីមុន) បន្ទាប់ពីសិស្សស្រីជាង១០នាក់បានដួលសន្លប់កាលពីចុងសប្តាហ៍មុន ហើយក៏មានសិស្សដួលសន្លប់ជាបន្តបន្ទាប់រៀងរាល់ថ្ងៃ ខណ:ពួកគេកំពុងអង្គុយរៀនក្នុងថ្នាក់រៀន ។ រកមូលហេតុមិនឃើញ ទើបលោកប្រធានមន្ទីរអប់រំយុវជន និងកីឡាខេត្ត សម្រេចចិត្តហៅលោកគ្រូ អ្នកគ្រូ ចូលប្រជុំរកដំណោះស្រាយនៅក្នុងសាលារៀនអនុវិទ្យាល័យសន្តិភាព ស្ថិតក្នុងភូមិអូរបេង ឃុំស្ទឹងកាច់ ស្រុកសាលាក្រៅ ។
បើតាមលោកវេជ្ជបណ្ឌិត អាង នាង ប្រធានមន្ទីរសុខាភិបាលខេត្តប៉ៃលិន បានឱ្យដឹងថា តាំងពីថ្ងៃដែលក្មេងស្រីៗសិស្សសាលាដួលសន្លប់ដំបូងរហូតមកដល់ពេលនេះ មិនទាន់រកឃើញភស្តុតាង ឬមូលហេតុណាមួយឃើញនោះទេ ដោយក្មេងស្រីៗដួលសន្លប់ដំបូងយកទៅដល់មន្ទីរពេទ្យ ក៏ដឹងខ្លួនឡើងវិញ លុះពិនិត្យមើលសុខភាពមិនមានអ្វីប្រែប្រួលនោះទេ ។ លោកបន្តទៀតថា ឥលូវនេះ ខាងក្រសួងសុខាភិបាល បានយកឈាមរបស់ក្មេងទាំងនោះ ទៅធ្វើការពិនិត្យនៅឯភ្នំពេញ ដើម្បីរកឱ្យឃើញពីមូលហេតុ នៃការដួលសន្លប់នេះ ។
លោក តង់ ធារ៉ា ប្រធានមន្ទីរអប់រំយុវជនខេត្តបានឱ្យដឹងថា ទោះបីមានការដួលសន្លប់ក៏ដោយ សូមកុំឱ្យមានការច្របូកច្របល់ក្នុងសាលារៀន ចៀសវាងបកស្រាយអ្វីតាមការនឹកឃើញខ្លួនឯងទាំងអស់ ហើយក៏សុំឱ្យលោកគ្រូអ្នកគ្រូនៅតែយកចិត្តទុកដាក់ក្នុងការតាមដានមើលពីមូលហេតុ នៃការដួលសន្លប់នេះ ។ លោកបន្តទៀតថា មិនត្រូវឱ្យសិស្សណាម្នាក់លេងបន្លាចគ្នាពាក់ព័ន្ធនឹងវិញ្ញាណខ្មោចព្រាយបិសាចនោះឡើយ ព្រោះអាចធ្វើឱ្យក្មេងៗមានការភ័យខ្លាចទៅជាដួលសន្លប់ ។ យើងដឹងពីការមូលហេតុខ្លះៗដែរ ដោយសារមានសិស្សខ្លះទៅហូបការពេលយប់មានផឹកស្រាជួបជុំមិត្តភក្តិ ខ្លះទៀតអត់សូវហូបបាយ ទើបទៅជាខ្សោយបែបនេះ ។ ម្យ៉ាងវិញទៀត ត្រូវយកចិត្តទុកដាក់ក្នុងការយកពួកគេទាំងនោះទៅមន្ទីរពេទ្យ ដើម្បីជួយសង្គ្រោះឱ្យបានទាន់ពេលវេលា ចៀសវាងមានបញ្ហាកើតឡើង ។
ចំណែកខាងមន្ត្រី នៃក្រសួងសុខាភិបាលម្នាក់មិនបញ្ចេញឈ្មោះ បានឱ្យដឹងថា មូលហេតុនៃការដួលសន្លប់របស់ក្មេងស្រីៗទាំងអស់នោះ ដោយសារតែពួកគេអត់សូវហូបអាហារ ព្រោះសិស្សប្រុសៗមានកម្លាំងមាំមួនមិនមាននរណាម្នាក់ដួលសន្លប់នោះទេ ។
សូមបញ្ជាក់ថា នៅរសៀលថ្ងៃដដែល បន្ទាប់ពីមានការដួលសន្លប់សិស្សស្រីជាបន្តបន្ទាប់ ខាងសាលារៀនបានហៅគ្រូមន្តអាគមអូមអាមមកបញ្ចូលរូបមើលពីវិញ្ញាណព្រាយបិសាចផងដែរ តែរកមូលហេតុមិនទាន់ដឹងឡើយ ។ ចំណែកលោកគ្រូអ្នកគ្រូមួយចំនួនបានលើកជាមតិយោបល់ថា មូលហេតុទាំងអស់នេះ ដោយសារតែអាកាសធាតុប្រែប្រួល ណាមួយនៅក្នុងបរិវេណសាលារៀនមានការចាក់បេតុងថ្មីៗ បណ្តាលឱ្យជះក្លិនចូលក្នុងថ្នាក់រៀន ហើយម្យ៉ាងទៀតក្នុងថ្នាក់រៀនមានការក្តៅថប់ខ្យល់ទើបធ្វើឱ្យក្មេងៗទាំងនោះដួលសន្លប់បែបនេះ ។
បើតាមស្ត្រីចំណាស់ម្នាក់បានបង្ហើបឱ្យដឹងនៅឯមន្ទីរពេទ្យបង្អែកថា ក្មេងមួយចំនួនពេលចូលក្នុងបន្ទប់ទឹក ពេលដើរចេញមកវិញ មានឮសំឡេងស្រែកយំពីក្រោយខ្នង លុះងាកមើលអត់ឃើញនោះទេ ហើយបម្រុងនឹងយកទៅប្រាប់អ្នកដទៃស្រាប់តែតឹងទ្រូងដួលសន្លប់តែម្តង ៕
ចែករំលែកព័តមាននេះ