លោកអភិបាលខេត្ត ផ្តល់សម្ភាសន៍ដល់កោះសន្តិភាពពីបញ្ហាឆេះផ្សារដ៏ធ្ងន់ធ្ងរនេះ
ខេត្តមណ្ឌលគិរី ៖ អភិបាលខេត្ត លោក ស្វាយ សំអ៊ាង បានថ្លែងប្រាប់អ្នកឆ្លងឆ្លើយព័ត៌មានកោះសន្តិភាព កាលពីល្ងាចថ្ងៃទី១២ ខែកុម្ភៈ កន្លងទៅនេះថា…
ខេត្តមណ្ឌលគិរី ៖ អភិបាលខេត្ត លោក ស្វាយ សំអ៊ាង បានថ្លែងប្រាប់អ្នកឆ្លងឆ្លើយព័ត៌មានកោះសន្តិភាព កាលពីល្ងាចថ្ងៃទី១២ ខែកុម្ភៈ កន្លងទៅនេះថា អាជ្ញាធរបានទុកលទ្ធភាពជូនក្រុមអាជីវករដែលរងគ្រោះដោយអគ្គិភ័យកាលពីថ្ងៃទី១០ ខែកុម្ភៈ ក្នុងការសម្រេចចិត្តថា តើត្រូវសាងសង់តូបលក់ដូរដោយខ្លួនឯងវិញ ឬទុកឱ្យអាជ្ញាធរជាអ្នកធ្វើ ព្រោះបើសិនរដ្ឋធ្វើនឹងសង់ទៅតាមស្តង់ដារ តែបើប្រជាពលរដ្ឋគិតថាសង់ខ្លួនឯងនោះអាជ្ញាធរនៅតែបន្តជួយជាផ្នែកបច្ចេកទេស និងរៀបចំប្រព័ន្ធអនាម័យ រួមនឹងផ្លូវសុវត្ថិភាព បង្ការការកើតគ្រោះថ្នាក់ជាយថាហេតុ ។
ក្នុងជំនួបជាមួយអ្នកយកព័ត៌មានកោះសន្តិភាព លោកអភិបាលខេត្ត ស្វាយ សំអ៊ាង បានឆ្លើយតបនឹងការសាកសួរថា «ឥឡូវ ផ្សារថ្មីដែលបាននិងកំពុងធ្វើជិតរួចរាល់ហើយនៅភូមិចម្ការតែនោះ តែខេត្តគ្មានគោលការណ៍ណាមួយជំរុញឱ្យពួកគាត់ទៅលក់ដូរនៅទីនោះឡើយ ។ ចំពោះផ្សារថ្មីនោះ គឺជាផ្សារមួយដែលយើងសង់ឱ្យមានសណ្តាប់ធ្នាប់មានរបៀបរៀបរយ» ។លោកបន្តថា «ជាគោលការណ៍ ផ្សារដែលឆេះនេះមិនអាចរើទៅណានោះទេ គឺយើងជួយរៀបចំគាត់ ធ្វើយ៉ាងម៉េចឱ្យមានអនាម័យ សណ្តាប់ធ្នាប់ កុំឱ្យមានបញ្ហាសំរាម ឬបញ្ហានានាដែលធ្វើឱ្យប៉ះពាល់ដល់សុខភាពរបស់ពួកគាត់» ។
ក្នុងកិច្ចសម្ភាស៍នោះដែរ លោកអភិបាលខេត្តបានបន្តថា អាជ្ញាធរនៅមិនទាន់អាចសរុបទិន្នន័យនៃការខូចខាតរបស់ប្រជាពលរដ្ឋដែលរងគ្រោះនៅឡើយទេរហូតមកដល់ពេលនេះ(គិតត្រឹមម៉ោង៥ល្ងាច ថ្ងៃទី១២ ខែកុម្ភៈ) ។ ប៉ុន្តែបើគិតត្រឹមការវាយតម្លៃម្នាក់ៗ(តូបឬផ្ទះដែលឆេះក្នុងមួយខ្នងៗ) មានអ្នកខូចខាតច្រើនមានខូចខាតអ្នកតិច ហើយបើយើងវាយតម្លៃឱ្យប្រហាក់ប្រហែលគ្នា ត្រឹមមួយគ្រួសារ៥ពាន់ដុល្លារ នោះការខូតខាតបើគិតជាទឹកប្រាក់អាចមានចំនួនខ្ទង់លានដុល្លារទៅហើយ ។
មូលហេតុនៃការឆេះផ្សារសែនមនោរម្យរហូតដល់៨០%នេះ លោកអភិបាលខេត្តបានឱ្យដឹងថា យើងនៅមិនទាន់អាចកំណត់បានទេដោយសារក្រុមការងារចុះទៅស្រាវជ្រាវហាក់នៅមិនទាន់វាយតម្លៃឱ្យបានច្បាស់លាស់ដែរ ព្រោះតាមឮម្ចាស់ផ្ទះដែលឆេះ គឺគាត់ថាពេលដែលគាត់ងើបឡើង ស្រាប់តែឃើញភ្លើងឆេះតែម្តង អុីចឹងមិនដឹងថា វាឆេះតាំងពីពេលណា ពីកន្លែងណា បណ្តាលមកពីអី្វ?
ចំណែកប្រភពមួយទៀតដែលលោកអភិបាលខេត្តទទួលបាននោះ គឺម្ចាស់ផ្ទះខាងលើបាននិយាយថា នៅមុនកើតហេតុគាត់(ម្ចាស់ផ្ទះរងគ្រោះ)បានឮសំឡេងម៉ូតូជិះក្នុងផ្សារ ប៉ុន្តែគេមិនដឹងថា តើម៉ូតូនោះជាម៉ូតូនរណា ? អុីចឹង យើងមិនអាចសន្និដា្ឋនអីត្រូវទេ ប៉ុន្តែបើតាមមតិមួយចំនួនថា មកពីទុស្សេខ្សែភ្លើងឬទុស្សេទូទឹកកក ។
ដោយឡែក មានការលើកឡើងថាករណីឆេះផ្សារនេះមានអ្នកលួចដុត ត្រូវបានលោកអភិបាលខេត្តច្រានចោលការនិយាយបែបនេះថា «ខ្ញុំរកសន្និដ្ឋានមិនបានទេ ព្រោះគោលគំនិតរបស់ខេត្តយើងការពារ យើងមិនអាចឱ្យនរណាមកលួចដុតបានទេ ។ អុីចឹងក្នុងករណីនេះ តើមាននរណាមកលួចដុត អាហ្នឹងក៏យើងត្រូវចាត់
វិធានការ ព្រោះមិនអាចឱ្យមកបំផ្លាញទ្រព្យសម្បត្តិរបស់ប្រជាពលរដ្ឋបានទេ ព្រោះមិនត្រឹមតែឆេះផ្សារទេ រហូតដល់ឆេះស្លាប់មនុស្សថែមទៀត…» ។ នេះជាបញ្ហាធ្ងន់ធ្ងរ ។
លោកអភិបាលខេត្ត បានបញ្ជាក់ក្រោយពីបញ្ចប់កិច្ចសម្ភាសន៍ថា «តាមខ្ញុំដឹងព័ត៌មាន គឺផ្ទះរបស់ឈ្មោះ ម៉ក់ សេងវ៉ុន ដោយសារ២ដងហើយ ដែលលើកទី១ឆេះគេជួយពន្លត់បាន លើកទី២ឆេះអ្នកជិតខាងជួយទាន់ លុះលើកទី៣នេះគឺឆេះពេញតែម្តង ។ អុីចឹង ប្រហែលជាមានការធ្វេសប្រហែសពីផ្ទះហ្នឹងមួយចំនួន ហើយម្យ៉ាងទៀតខ្ញុំមិនដឹងទេ តែឮថាផ្ទះហ្នឹងឧស្សាហ៍ទាស់ទែងគ្នារវាងប្តីប្រពន្ឋ និងឮពាក្យចចាមអារា៉មមកថា ឱ្យតែស្រវឹងស្រាគឺរកដុតផ្ទះជាច្រើនដងហើយ ។ តែអាហ្នឹងយើងមិនដឹងទេ គ្រាន់តែឮមកអុីចឹង ដូច្នេះវាមិនមានមូលដ្ឋានច្បាស់នោះឡើយ» ។
បើតាមលោក ឡុង វិបុល អភិបាលក្រុងសែនមនោរម្យ បានឱ្យដឹងថា នៅពេលឆាប់ៗនេះនឹងមានការជួបប្រជុំគ្នារវាងអាជ្ញាធរនិងប្រជាពលរដ្ឋ ដើម្បីពិភាក្សាស្វែងរកដំណោះស្រាយឱ្យបានឆាប់រហ័ស បង្កភាពងាយស្រួលឱ្យពួកគាត់អាចប្រកបរបររស៊ីបានឡើងវិញ ព្រោះផ្សារនេះជាឆ្នាំងបាយ ៕
ចែករំលែកព័តមាននេះ