ខេត្តបន្ទាយមានជ័យ ៖ ពលរដ្ឋខ្មែរចាស់ក្មេងប្រមាណ២៧០នាក់ ត្រូវបានទាហានប៉ារ៉ាថៃឃាត់ខ្លួន អស់រយៈពេលជាច្រើនម៉ោង រួមជាមួយគោយន្ត៤៩គ្រឿង ក្រោយពីពលរដ្ឋខ្មែរទាំងនោះធ្វើដំណើរតាមគោយន្តដឹកបន្លែ និងកសិផលផ្សេងៗ ឆ្លងដែនចូលទៅលក់នៅផ្សារណាត់ក្នុងទឹកដីថៃ ហើយចេញមកវិញ…
ខេត្តបន្ទាយមានជ័យ ៖ ពលរដ្ឋខ្មែរចាស់ក្មេងប្រមាណ២៧០នាក់ ត្រូវបានទាហានប៉ារ៉ាថៃឃាត់ខ្លួន អស់រយៈពេលជាច្រើនម៉ោង រួមជាមួយគោយន្ត៤៩គ្រឿង ក្រោយពីពលរដ្ឋខ្មែរទាំងនោះធ្វើដំណើរតាមគោយន្តដឹកបន្លែ និងកសិផលផ្សេងៗ ឆ្លងដែនចូលទៅលក់នៅផ្សារណាត់ក្នុងទឹកដីថៃ ហើយចេញមកវិញ ដោយដឹកជីកសិកម្មពេញរ៉ឺម៉ក ។ ការចាប់ឃាត់នេះ គឺចំពេលមានបណ្តឹងពីក្រុមហ៊ុនពីបទរំលោភកម្មសិទ្ធិ បញ្ញា ហើយក៏ត្រូវបានទាហានថៃចាប់ ខណៈដឹកចូលមកដីខ្មែរ ។
ការឃាត់ចាប់គោយន្តពលរដ្ឋខ្មែរដឹកជីនេះ បានកើតឡើងកាលពីវេលាម៉ោង១១និង៣០នាទីព្រឹកថ្ងៃទី១១ ខែកុម្ភៈ នៅច្រករបៀងធ្នង់ភ្នំដងរែក ចំណុចភូមិសាមសូន្យ ឃុំតាប់ថៃ ស្រុកតាប់ប្រាយ៉ា ខេត្តស្រះកែវ ឈមនឹងភូមិគោកត្បែង ឃុំបន្ទាយឆ្មារ ស្រុកថ្មពួក ខេត្តបន្ទាយមានជ័យ ។ ការឃាត់ខ្លួនពលរដ្ឋខ្មែរទាំងនោះគឺរហូតដល់វេលាម៉ោង៥និង៣០នាទីល្ងាចថ្ងៃដដែល ទើបត្រូវបានទាហានថៃដោះលែងឲ្យត្រឡប់មកវិញតាមច្រកតំបន់បឹងត្រកួន ។ ការដោះលែងនេះ គឺក្រោយពីនគរបាលការពារព្រំដែនលេខ៨០៧ ឈរជើងនៅក្នុងភូមិសាស្ត្រតាមបន្ទាត់ព្រំដែនស្រុកថ្មពួក និងទាហានទំនាក់ទំនងព្រំដែនកម្ពុជា-ថៃ ចូលទៅសម្របសម្រួល ជាមួយអាជ្ញាធរមូលដ្ឋានថៃ និងទាហានប៉ារ៉ាថៃថា ប្រជាពលរដ្ឋខ្មែរដឹកជីចូលមកទឹកដីខ្មែរ គឺសម្រាប់ប្រើប្រាស់ដាក់ស្រែរបស់ខ្លួនតែប៉ុណ្ណោះ មិនបានធ្វើអាជីវកម្មទេ ទើបភាគីថៃដោះលែងពលរដ្ឋខ្មែរនិងគោយន្តឱ្យត្រឡប់មកវិញ ។
មានការកត់សម្គាល់ថា ជារឿយៗកសិករខ្មែរនៅតំបន់ព្រំថៃ តែងនាំគ្នាទៅទិញជីក្នុងទឹកដីថៃយកមកដាក់ស្រែ ដោយសារតម្លៃជីក្នុងស្រុកថ្លៃ។ ប៉ុន្តែលើកនេះ ពួកគាត់នាំគ្នាទៅទិញជីដូចគេហែកឋិន ទើបផ្អើលដល់សមត្ថកិច្ចថៃ គាប់ជួនក្រុមហ៊ុនផលិតជីមានបណ្តឹងពីការលួចផលិតជីក្លែងក្លាយផងនោះ ក៏មានការចាប់ត្រួតពិនិត្យរហូតផ្អើលបែបនេះ ។លោកវរសេនីយ៍ទោ ឡុង សំណាង មេបញ្ជាការវរសេនាតូចនគរបាលការពារព្រំដែនគោកលេខ៨០៧ ឱ្យដឹងថា ការឃាត់ខ្លួនប្រជាពលរដ្ឋខ្មែរនេះ ដោយសារទាហានថៃគេចោទថាពួកគាត់ដឹកជីរំលោភកម្មសិទ្ធិបញ្ញា នាំចូលដីខ្មែរធ្វើអាជីវកម្ម ។ លោកបន្តថា ក្នុងគោយន្ត១គ្រឿងដែលមានដឹកជី១០ការុងឡើងទៅ ត្រូវបានទាហានថៃឃាត់ទុក ចំណែកអ្នកដឹក២ទៅ៣ការុងទាហានថៃមិនចាប់ទេ ។
លោកមេបញ្ជាការឱ្យដឹងទៀតថា ការចាប់នោះដោយសារក្រុមហ៊ុនថៃបានប្តឹងថា មានអាជីវករថៃលក់ជីរំលោភកម្មសិទ្ធិបញ្ញាទៅឱ្យពលរដ្ឋខ្មែរនាំចូលស្រុកខ្មែរប៉ះពាល់ដល់ក្រុមហ៊ុនរកស៊ីស្របច្បាប់នៅប្រទេសកម្ពុជា ដែលនាំចូលផ្តាច់មុខដូចជា ជីសញ្ញាក្បាលគោនេះជាដើម ។លោកបញ្ជាក់ទៀតថា ជាមួយនឹងការដោះលែងពលរដ្ឋខ្មែរ ទាហានថៃក៏បានដកហូតជីក្នុងមួយគោយន្តពី៣ទៅ៤ការុងផងដែរ ។ ពាក់ព័ន្ធនឹងការនាំជីដែលភាគីថៃចោទថា រំលោភកម្មសិទ្ធិបញ្ញា ពីប្រទេសថៃចូលមកទឹកដីកម្ពុជា ក្នុងរូបភាពដឹកតាមគោយន្តរបស់ពលរដ្ឋខ្មែរសម្រាប់ដាក់ស្រែនោះដែរ កន្លងមកត្រូវបានគេសង្ស័យថា មានពលរដ្ឋមួយចំនួនមិនបានយកមកដាក់ស្រែទេ បែរជាយកមកធ្វើអាជីវកម្មដឹកបោះលក់តាមដេប៉ូលក់ជី ឬដឹកលក់តាមស្រែចម្ការ។
ករណីនេះ មន្ត្រីមន្ទីរកសិកម្មខេត្តធ្លាប់ធ្វើការបង្ក្រាបជាច្រើនដងហើយ ប៉ុន្តែការអនុវត្តនោះបានរងការរិះគន់ពីប្រជាពលរដ្ឋនិងអាជ្ញាធរមូលដ្ឋានទៅវិញ ។ ដោយសារការទប់ស្កាត់នៅក្នុងដីខ្មែរគ្មានប្រសិទ្ធភាព ទើបក្រុមហ៊ុនថៃបានប្តឹងទៅភាគីថៃឱ្យទប់ស្កាត់ការដឹកជីចេញពីផ្សារណាត់ដែលជាប្រភពដើមទីតែម្តង ។
លោក សរ សំណាង ប្រធានគណៈកម្មការច្រកតំបន់ព្រំដែនបឹងត្រកួន បានឱ្យដឹងថា កាលពីថ្ងៃទី១១ខែកុម្ភៈ សមត្ថកិច្ចថៃបានចាប់ឃាត់ប្រជាពលរដ្ឋខ្មែរចំនួន២៧៤នាក់ ក្នុងនោះស្ត្រី១១១នាក់ និងកុមារ៩៤នាក់ គោយន្ត៤៩គ្រឿង និងជីគីមីចំនួន៦៥៥ការុង នៅក្បែរព្រំដែនខាងភាគីថៃ ស្ថិតក្នុងស្រុកតាប់ប្រាយ៉ា ខេត្តស្រះកែវ ។ ក្រោយពេលថៃចាប់នោះ អាជ្ញាធរនិងសមត្ថកិច្ចពាក់ព័ន្ធបានចូលទៅសម្របសម្រួលជាមួយភាគីថៃ ទើបសម្រេចដោះលែងប្រជាពលរដ្ឋនិងគោយន្ត តែដកហូតជីគីមីចំនួន២០០ការុងទុក ។
ដោយឡែក នៅថ្ងៃទី១២ កុម្ភៈ ប្រជាពលរដ្ឋខ្មែរចំនួន១៥នាក់(ស្រី៩នាក់) ត្រូវភាគីតម្រួតថៃឃាត់ខ្លួន ដោយចោទប្រកាន់ពីបទលួចឆ្លងដែនខុសច្បាប់ នៅចំណុចផ្លូវបំបែកចាប់សាន់ ស្រុកតាប់ប្រាយ៉ា ខេត្តស្រះកែវ ប្រទេសថៃ ឈមនឹងឃុំគោករមៀត ស្រុកថ្មពួក ខេត្តបន្ទាយមានជ័យ ។ លោក សរ សំណាង ថ្លែងថា ប្រជាពលរដ្ឋចំនួន១៥នាក់ដែលត្រូវភាគីថៃចាប់ឃាត់ គឺមន្ត្រីទំនាក់ទំនងព្រំដែនកម្ពុជា-ថៃ និងមន្ត្រីគណៈកម្មការច្រកតំបន់ព្រំដែនបឹងត្រកួន បានចូលទៅសម្របសម្រួលដែរ តែភាគីថៃមិនយល់ព្រម ហើយបញ្ជូនប្រជាពលរដ្ឋទាំងនោះដែលចោទប្រកាន់ពីបទឆ្លងដែនខុសច្បាប់ ថាត្រូវអនុវត្តតាមច្បាប់ ៕
ចែករំលែកព័តមាននេះ