ខេត្តព្រៃវែង ៖ គ្រោះថ្នាក់ចរាចរណ៍ដែលបង្កឡើងដោយខ្លួនឯងមួយ បណ្ដាលឲ្យអ្នកធ្វើដំណើរឆ្លងកាត់ផ្លូវជាតិលេខ៨ មានការភ្ញាក់ផ្អើលយ៉ាងខ្លាំង ខណៈរថយន្តធុនធំដឹកផ្លែឈើពីប្រទេសវៀតណាមមួយគ្រឿងបានបើកក្រឡាប់ទទឹងផ្លូវ ចាក់ផ្លែឈើរាយប៉ាយពេញថ្នល់ ។
ហេតុការណ៍នេះបានកើតឡើងនៅលើដងផ្លូវជាតិលេខ៨ ចន្លោះគីឡូម៉ែត្រលេខ៥៩-៦០ ស្ថិតនៅភូមិត្នោត ឃុំរកា ស្រុកពារាំង ខេត្តព្រៃវែង នៅវេលាម៉ោង០៧ព្រឹក ថ្ងៃទី១៣ ខែកុម្ភៈ ឆ្នាំ២០១៨ ។
លោក ស៊ឹម កុសល អធិការស្រុកពារាំង បានឲ្យដឹងថា ករណីគ្រោះថ្នាក់ចរាចរណ៍ដោយខ្លួនឯងនេះ គឺបង្កឡើងដោយរថយន្តដឹកផ្លែឈើមួយគ្រឿងម៉ាកហ៊ីយ៉ាន់ដាយ ពណ៌ស ពាក់ស្លាកលេខ ភ្នំពេញ ៣A-៤០៤៩ បើកបរដោយឈ្មោះ យ៉ន រ៉ូត ភេទប្រុស អាយុ២៧ឆ្នាំ មានទីលំនៅភូមិព្រែក ឃុំចំប៉ី ស្រុកបាទី ខេត្តតាកែវ ។
ប្រភពបន្តថា បើតាមការសាកសួរអ្នកបើករថយន្តបង្កហេតុបានឱ្យដឹងថា រូបគេបានបើករថយន្តបង្កក្នុងទិសដៅពីកើតមកលិច ពោលគឺពីវៀតណាមមកផ្សារនាគមាសភ្នំពេញ គោលបំណងដឹកផ្លែឈើមកលក់ក្នុងឱកាសបុណ្យចូលឆ្នាំចិនដែលជិតមកនេះ លុះមកដល់កន្លែងកើតហេតុរថយន្តបានដាច់កង់ក្រោយផ្នែកខាងឆ្វេង រួចក៏ក្រឡាប់ទទឹងផ្លូវចាក់ផ្លែឈើពេញផ្លូវតែម្ដង ។
ក្រោយពេលកើតហេតុ សមត្ថកិច្ចបានចុះសម្រួលចរាចរណ៍ឲ្យម្ចាស់លើកផ្លែឈើ និងស្ទូចរថយន្តយកទៅជួសជុល ឬឯតៃកុងរថយន្តរបួសស្រាល ៕
ចែករំលែកព័តមាននេះ