ខេត្តមណ្ឌលគិរី ៖ ទោះបីហេតុការណ៍អគ្គិភ័យលេបត្របាក់ផ្សារក្រុងសែនមនោរម្យ បានកន្លងហួសទៅអស់រយៈពេលជាង៤៨ម៉ោងហើយក៏ដោយ នៅរសៀលថ្ងៃទី១២ ខែកុម្ភៈ ឆ្នាំ២០១៨ គេនៅមិនទាន់ដឹងឡើយថា មូលហេតុពិតប្រាកដដែលបណ្តាលឲ្យមានគ្រោះមហន្តរាយដ៏ធំធេងមួយនេះកើតឡើងដោយកត្តាអ្វី ហើយមានទំហំខូចខាតអស់ទឹកប្រាក់ប៉ុន្មាននោះដែរ…
ខេត្តមណ្ឌលគិរី ៖ ទោះបីហេតុការណ៍អគ្គិភ័យលេបត្របាក់ផ្សារក្រុងសែនមនោរម្យ បានកន្លងហួសទៅអស់រយៈពេលជាង៤៨ម៉ោងហើយក៏ដោយ នៅរសៀលថ្ងៃទី១២ ខែកុម្ភៈ ឆ្នាំ២០១៨ គេនៅមិនទាន់ដឹងឡើយថា មូលហេតុពិតប្រាកដដែលបណ្តាលឲ្យមានគ្រោះមហន្តរាយដ៏ធំធេងមួយនេះកើតឡើងដោយកត្តាអ្វី ហើយមានទំហំខូចខាតអស់ទឹកប្រាក់ប៉ុន្មាននោះដែរ ខណៈអាជ្ញាធរបានត្រឹមនិយាយថា កំពុងចុះស្រង់ស្ថិតិ ។
ទោះជាយ៉ាងណាក៏ដោយមានព័ត៌មានមួយចំនួនបានទម្លាយចេញថា ផ្សារក្រុងសែនមនោរម្យដែលឆេះឆ្លងរាលដាលគ្នារហូតដល់២២០ ផ្ទះ-តូប កាលពីរាត្រីថ្ងៃទី១០ ខែកុម្ភៈ នោះ ត្រូវបានក្រុមការងារបច្ចេកទេស ចុះស្រាវជ្រាវពិនិត្យលើទីតាំងកើតហេតុ ហើយបានរកឃើញភស្តុតាងមួយចំនួន និងផ្អែកទៅលើសាក្សី ដែលបានឃើញអណ្តាតភ្លើងចាប់ផ្តើមឆេះនោះ សមត្ថកិច្ចអាចសន្និដ្ឋានយ៉ាងជាក់លាក់ថា បណ្តាលមកពីការឆ្លងចរន្តអគ្គិសនី (ទុស្សេខ្សែភ្លើង)ក្នុងតូបរបស់ឈ្មោះ ម៉ក់ សេងវ៉ុន ផ្នែកខាងក្រោយដែលមានទូរសម្រាប់ក្លាស្សេសាច់ បណ្តាលឲ្យមានអណ្តាតភ្លើងឆេះរាលដាលទាំងផ្ទះនឹងតូបទាំងស្រុងចំនួន២០៩ខ្នង (តួលេខដែលនាយប៉ុស្តិ៍ស្ពានមានជ័យផ្តល់ឲ្យ) ។
លោកឧត្តមសេនីយ៍ត្រី សូ សុវណ្ណ ស្នងការរងខេត្ត នៅថ្ងៃទី១២ ខែកុម្ភៈ នេះ បានឲ្យដឹងថា នៅមិនទាន់អាចបង្ហាញពីទំហំនៃការខូចខាតសម្ភារបាននៅឡើយ ព្រោះកំពុងបន្តការស្រាវជ្រាវ និងធ្វើស្ថិតិបន្ថែមទៀត ។
លោក ឡុង វិបុល អភិបាលក្រុងសែនមនោរម្យ បានឲ្យដឹងថា រហូតមកដល់ពេលនេះ អាជ្ញាធរបានត្រឹមតែវាយតម្លៃនៃការខូចខាតហេដ្ឋារចនាសម្ព័ន្ឋរបស់ផ្សារប៉ុណ្ណោះ ។ ហើយប្រជាពលរដ្ឋដែលរងគ្រោះក្នុងផ្សារនេះមានចំនួន ២២១គ្រួសារ ចំនួនតូបសរុបមាន២២៣តូប ហើយបើគិតបូកដកគ្នាទៅ អ្នកដែលរងគ្រោះមានតែ២១១គ្រួសារទេ ព្រោះអ្នកខ្លះគាត់មានតូប១ ខ្លះមានតូប២ ឬ៣ ដោយមិនទាន់បានលម្អិត ។
លោកអភិបាលក្រុងបានបន្តថា ចំពោះការខូចខាតផ្សារនេះ គឺបានខូចខាតប្រមាណជា៨០ភាគ នៃហេដ្ឋារចនាសម្ព័ន្ឋរបស់ផ្សារ ឬឯទំហំទឹកប្រាក់ដែលបាត់បង់ គឺមិនទាន់អានវាយតម្លៃបាន ។ ដ្បិតប្រជាពលរដ្ឋគាត់នៅស្តាយស្រណោះ ដូច្នេះគាត់មិនទាន់អាចរៀបរាប់ប្រាប់ក្រុមការងារបានលម្អិតថា តើគាត់មានមុខរបរអ្វីខ្លះ ហើយចុះទុនប៉ុន្មាននោះទេ ។
តាមការសន្និដ្ឋានក្រៅផ្លូវការ ទំហំនៃការខូចខាតទ្រព្យសម្បត្តិនឹងសម្ភារ ក្នុងផ្សារដែបងប្អូនអាជីវករបានដាក់តាំងលក់ បើគិតជាទឹកប្រាក់អាចមានខ្ទង់រាប់ពាន់លានរៀល ហើយជាការចៃដន្យកាន់តែធ្ងន់កទៀតនោះ គឺជិតដល់ថ្ងៃបុណ្យចូលឆ្នាំចិន ក្រុមអាជីវករបានទិញចូលរបស់របរស្តុបទុកជាច្រើន ត្រៀមលក់សម្រាប់ថ្ងៃបុណ្យសែនចិន ដែលធ្វើឲ្យការខាតបង់កាន់តែមានចំនួនកើនឡើង ៕
ចែករំលែកព័តមាននេះ