ខេត្តស្វាយរៀង ៖ លោក នួន លីហួន ប្រធានមន្ទីរសាធារណៈការ និងដឹកជញ្ជូនខេត្តស្វាយរៀង បានដឹកនាំកម្លាំងចម្រុះ នៃក្រុមការងារត្រួតពិនិត្យលក្ខណបច្ចេកទេសយានយន្ត ចុះអនុវត្តតាមបទបញ្ជារបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី ប្រើកណ្តាប់ដៃដែក ចាប់ឃាត់រថយន្តកែច្នៃតទ្រុងខុសលក្ខណបច្ចេកទេស និងដឹកលើសទម្ងន់ចំនួន៨គ្រឿង រថយន្តបែនដឹកខ្សាច់ចំនួន៦គ្រឿង ចាក់ខ្សាច់ចេញ និងរថយន្តដឹកទំនិញភ្លៅ៥ចំនួន២គ្រឿងផ្ទេរទំនិញកាត់ទ្រុង ក្នុងមួយគ្រឿងពិន័យ៥០ម៉ឺនរៀល ។
ការអនុវត្តន៍កណ្តាប់ដៃដែកនេះ ធ្វើឡើងនៅព្រឹកថ្ងៃទី១០ ខែកុម្ភៈ ឆ្នាំ២០១៨ នៅលើកំណាត់ផ្លូវជាតិលេខ១ ស្ថិតនៅភូមិចំបក់ សង្កាត់ចេក ក្រុងស្វាយរៀង ។ ទាក់ទិនករណីនេះ លោក នួន លីហួន ប្រធានមន្ទីរសាធារណៈការ និងដឹកជញ្ជូនខេត្តស្វាយរៀង បានមានប្រសាសន៍ថា ការចុះឃាត់រថយន្តខុសបច្ចេកទេសនេះ គឺអនុវត្តតាមបទបញ្ជារបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ប្រើកណ្ដាប់ដៃដែក លើម្ចាស់ក្រុមហ៊ុនដឹកជញ្ជូនទំនិញដែលប្រើប្រាស់យានយន្តកែច្នៃខុសលក្ខណបច្ចេកទេស តទ្រុងខុសបច្ចេកទេស នៃប្រទេសផលិត ។
យានយន្តភ្លៅ៥តសាក់ស៊ី តទ្រុង លើកទូកុងតឺន័រ ដាក់ក្នុងទ្រុងខុសបច្ចេកទេស ដឹកទំនិញលើសទម្ងន់ច្បាប់កំណត់ ឲ្យផ្ទេរទំនិញ និងកាត់ទ្រុងនៅហ្នឹងកន្លែង ក្នុងមួយគ្រឿងពិន័យ៥០ម៉ឺនរៀល ហើយការចុះអនុវត្តន៍នេះធ្វើឡើងចាប់តាំងពីវេលាម៉ោង០៥និង០០នាទីព្រឹក ថ្ងៃទី០៩ ខែកុម្ភៈ ឆ្នាំ២០១៨ រហូតអស់រថយន្តល្មើស ។ នេះជាបទបញ្ជា មិនអាចយោគយល់ទេ ។ សម្តេចតេជោ បានប្រើកណ្តាប់ដៃដែកត្រូវតែអនុវត្តន៍ អាជ្ញាធរ និងស្ថាបនពាក់ព័ន្ធគ្រប់ខេត្តរាជធានី ត្រូវទទួលខុសត្រូវ គ្មានយានយន្តខុសលក្ខណបច្ចេកទេសធ្វើចរាចរលើដងផ្លូវសាធារណៈបន្តទៀតទេ ។
លោក នួន លីហួន ក៏បានសំណូមពរ និងអំពាវនាវដល់ក្រុមហ៊ុន អាជីវករ ដែលមានយានយន្តដឹកទំនិញគ្រប់ប្រភេទ សូមចូលរួមសហការណ៍អនុវត្តច្បាប់ចរាចរផ្លូវគោក នៃព្រះរាជាណាចក្រកម្ពុជា ទាំងអស់គ្នា ដើម្បីសុវត្ថិភាពចរាចរ និងសុវត្ថិភាពផ្លូវស្ពានថ្នល់ ។ មន្ត្រីរាជការ និងប្រជាពលរដ្ឋខេត្តស្វាយរៀង បានអបអរសាទរចំណាត់ការកណ្តាប់ដៃដែករបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ចំពោះការចេញបទបញ្ជាឲ្យអាជ្ញាធរថ្នាក់ក្រោមជាតិ ក្នុងការរឹតបន្តឹងការអនុវត្តន៍ច្បាប់ចរាចរណ៍ ការចាប់កាត់ទ្រុងរថយន្តកែច្នៃ ដឹកទំនិញលើសទម្ងន់ ដែលនាំឲ្យបាក់ស្រុតខូចស្ពាន លូ ផ្លូវថ្នល់ ពីក្រុមឈ្មួញ ហើយគ្មានចំណាត់ការ ដោយសារតែម្ចាស់ ក្រុមហ៊ុនយានយន្តដឹកទំនិញ មានខ្សែក្រាស់ មន្ត្រីអនុវត្តច្បាប់មិនហ៊ានក្លាច ជាពិសេសរថយន្តដែលមានសា្លកយីហោ ឡូហ្គោ H .C កងដឹកជញ្ជូន H.C សមត្ថកិច្ចតាមដងផ្លូវ មិនហ៊ានទៅជិតទេ ។ ហើយនូវពេលសមត្ថកិច្ចចុះអនុវត្តបទបញ្ជាកណ្តាប់ដៃដែក ស្មើភាពដូច្នេះ ប្រជាពលរដ្ឋ និងក្រុមអាជីវករមានរថយន្តដឹកទំនិញឯកជន លក្ខណគ្រួសារ គាំទ្រចំណាត់ការរបស់ សម្តេចតេជោ ៕
ចែករំលែកព័តមាននេះ