ខេត្តមណ្ឌលគិរី ៖ ផ្សារសែនមនោរម្យ ខេត្តមណ្ឌលគិរី ត្រូវបានអគ្គិភ័យឆាបឆេះស្ទើរទាំងស្រុង ដោយអគ្គិភ័យមួយនេះ បានបង្កជាអណ្តាតភ្លើងឡើងនៅចន្លោះម៉ោង០១រំលងអធ្រាត្រ ថ្ងៃទី១០ ខែកុម្ភៈ ឆ្នាំ២០១៨…
ខេត្តមណ្ឌលគិរី ៖ ផ្សារសែនមនោរម្យ ខេត្តមណ្ឌលគិរី ត្រូវបានអគ្គិភ័យឆាបឆេះស្ទើរទាំងស្រុង ដោយអគ្គិភ័យមួយនេះ បានបង្កជាអណ្តាតភ្លើងឡើងនៅចន្លោះម៉ោង០១រំលងអធ្រាត្រ ថ្ងៃទី១០ ខែកុម្ភៈ ឆ្នាំ២០១៨ បណ្ដាលឲ្យមានអ្នកស្លាប់ និងរបួសចំនួន៥នាក់ ហើយមកដល់ម៉ោង០៨ព្រឹកនេះ អគ្គិភ័យនៅមិនទាន់រលត់ទាំងស្រុងនោះទេ ។
យ៉ាងណាក៏ដោយ មូលហេតុនៃការឆាបឆេះផ្សារខេត្តមណម្ឌលគិរី នៅមិនទាន់មានប្រភពអះអាងថា បណ្ដាលមកពីមូលហេតុអ្វីឲ្យប្រាកដនោះទេ ។ ដោយប្រភពខ្លះលើកឡើងថា មកពីផ្ទុះហ្គាស និងខ្លះទៀតថា មកពីផ្ទុះស្សេចរន្តអគ្គិសនី ចំណែកប្រភពផ្សេងមួយទៀតថា បណ្ដាលមកពីស្ត្រីកូនខ្ចីម្នាក់អាំងភ្លើង និងឆាបឆេះពីកម្ទេចភ្លើងនោះ ។
អភិបាលក្រុងសែនមនោរម្យ លោក ឡុង វិបុល បានឲ្យដឹងនៅម៉ោងជាង០៨ព្រឹកនេះថា មកទល់ពេលនេះ អគ្គិភ័យត្រូវបានគ្រប់គ្រង៩០ភាគរយហើយ ចំណែកមូលហេតុនៅមិនទាន់ដឹងច្បាស់នៅឡើយ ប៉ុន្តែអាចបណ្ដាលមកពីផ្ទុះសេចរន្តអគ្គិសនី ។
លោកថា របាយការណ៍បឋម ផ្សារសែនមនោរម្យត្រូវបានឆាបឆេះប្រហែល៧០ភាគរយ ស្មើនឹង២២០តូប ខូចខាតទ្រព្យសម្បត្តិស្ទើរទាំងស្រុង និងមានអ្នកស្លាប់២នាក់ ជាមនុស្សប្រុស រងរបួស៣នាក់ កំពុងសម្រាកព្យាបាលនៅមន្ទីរពេទ្យ ។
លោក សូ សុវណ្ណ ស្នងការរងខេត្តមណ្ឌលគិរី បានឲ្យដឹងថា សមត្ថកិច្ចបានប្រើរថយន្តពន្លត់អគ្គិភ័យចំនួន៤គ្រឿង ដើម្បីពន្លត់អគ្គិភ័យនេះ និងបានបាញ់ទឹកពន្លត់ប្រហែល២០០គ្រឿង ទើបអាចគ្រប់គ្រង់អគ្គិភ័យមួយនេះបាន ៕
ចែករំលែកព័តមាននេះ