ខេត្តបន្ទាយមានជ័យ ៖ ក្រោយកិច្ចប្រជុំមួយនៅសាលប្រជុំសាលាក្រុងប៉ោយប៉ែតកាលពីពេលថ្មីៗជំរុញដល់មន្ត្រីឲ្យយកចិត្តទុកដាក់លើសេវាសាធារណៈឲ្យបានទាន់ពេលវេលាជូនពលរដ្ឋលោកអភិបាលក្រុងបានដាក់ចេញវិធានការក្តៅដល់មន្ត្រីក្រៅពីស្តីបន្ទោស និងដាស់តឿនក៏បានលើកយកអភិក្រមរបស់ប្រមុខរាជរដ្ឋាភិបាល៥ចំណុចដាក់តាំងនៅបរិវេណសាលាក្រុង និងសង្កាត់ទាំង៣ផងដែរ ។
អភិក្រម៥ចំណុចរបស់ប្រមុខរាជរដ្ឋាភិបាលទី១-ឆ្លុះកញ្ចក់, ទី២-ងូតទឹក, ទី៣-ដុសក្អែល, ទី៤-ព្យាបាល និង៥-វះកាត់ ដែលអភិក្រមនេះត្រូវបានដាក់តាំងនៅសាលាក្រុងប៉ោយប៉ែត និងសង្កាត់ទាំង៣ដូចជាសង្កាត់ប៉ោយប៉ែត សង្កាត់ផ្សារកណ្តាល និងសង្កាត់និមិត្ត តាមបទបញ្ជារបស់លោក សាន ស៊ានហូ អភិបាលនៃគណៈអភិបាលក្រុងប៉ោយប៉ែតក្រោយកិច្ចប្រជុំមួយ ។
ជុំវិញការដាក់តាំងអភិក្រមរបស់ប្រមុខរាជរដ្ឋាភិបាលនេះលោក សាន ស៊ានហូ អភិបាលក្រុងប៉ោយប៉ែតប្រាប់ កោះសន្តិភាព តាមទូរស័ព្ទថា លោកទើបមកកាន់តំណែងរយៈពេលខ្លី ប៉ុន្តែពិនិត្យឃើញថាការបំរើសេវាសាធារណៈដល់ពលរដ្ឋតាមសាលាសង្កាត់នីមួយៗនៅមានការយឺតយ៉ាវ និងមានពលរដ្ឋរអ៊ូរទាំ មិនតែប៉ុណ្ណោះសេវានោះក៌មានប្រភពថា កន្លែងខ្លះពលរដ្ឋត្រូវចំណាយប្រាក់ទៀង ។
លោកបន្តថាដើម្បីបំរើសេវាសាធារណៈជូនពលរដ្ឋឲ្យរហ័សទាន់ចិត្តលោកបានដាស់តឿនមន្ត្រីទាំងអស់នៅតាមសង្កាត់ និងក្រុងតាមរយៈកិច្ចប្រជុំមួយដោយលើកយកអភិក្រមរបស់ប្រមុខរាជរដ្ឋាភិបាលពិសេសប្រសាសន៍របស់ថ្នាក់ដឹកនាំរាជរដ្ឋាភិបាល និងក្រសួងមហាផ្ទៃ ហើយក៌តម្រូវឲ្យគ្រប់សាលាសង្កាត់ដាក់តាំងអភិក្រមនេះក្នុងនោះសូម្បីតែសាលាក្រុងប៉ោយប៉ែតក៏មានដាក់តាំងដូចគ្នា ។
លោកអភិបាលក្រុងបញ្ជាក់ថា ការដាក់តាំងអភិក្រម៥ចំណុចនៅសាលាក្រុង និងសង្កាត់ទាំង៣គោលបំណងដើម្បីពញ្ញាក់ស្មារតីមន្ត្រីគ្រប់រូបមុនពេលដើរចូលដល់កន្លែងធ្វើការមើលឃើញពីអភិក្រមនេះហើយនាំគ្នាយកចិត្តទុកដាក់បំរើសេវាសាធារណៈជូនពលរដ្ឋឲ្យបានទាន់ចិត្ត និងមិនត្រូវយកប្រាក់ពីពលរដ្ឋឡើយ ៕
ចែករំលែកព័តមាននេះ