ខេត្តកំពង់ចាម ៖ ក្រោមការយកចិត្តទុកដាក់របស់លោក គួច ចំរើន ដែលជាអភិបាលខេត្ត ក៏ដូចជា អគ្គស្នងការនគរបាលជាតិ ឲ្យសមត្ថកិច្ចត្រូវតែបង្កើនការយកចិត្តទុកដាក់ ពង្រឹងច្បាប់ចរាចរណ៍ ផ្លូវគោកបន្ថែមទៀតធ្វើឲ្យយ៉ាងណាកាត់បន្ថយអត្រាអ្នកស្លាប់ និងរបួសឲ្យនូវកម្រិតទាប។ ជាក់ស្តែងក្នុងរយៈពេល២ថ្ងៃជាប់គ្នា គឺថ្ងៃទី០៦-០៧ កុម្ភៈ ២០១៨ មានម៉ូតូជាច្រើនគ្រឿងត្រូវបាននាំ មករក្សាទុកនៅស្នងការដ្ឋាននគរបាលខេត្ត ដោយសារតែម្ចាស់មិនមានមួកសុវត្ថិភាព និងកញ្ចក់ចំហៀង សងខាងនោះ។ លោកឧត្តមសេនីយ៍ត្រី សោម រស់ ស្នងការនគរបាលខេត្ត ទទួលផែនសណ្តាប់ធ្នាប់ប្រាប់ ឲ្យដឹងថា ការចុះផាកពិន័យរបស់កងកម្លាំងនគរបាលនៅតាមបណ្តាស្រុកក្រុងទាំង១០ ត្រូវបានចល័ត ទៅតាមគោលដៅសំខាន់ៗនានាទាំងផ្លូវជាតិនៅផ្លូវលំ ដើម្បីពង្រឹងច្បាប់ចរាចរណ៍ផ្លូវគោក ដោយមាន ពិន័យជាលុយទៅតាមប្រភេទដែលមិនបានដាក់កញ្ចក់ ឬពាក់មួកសុវត្ថិភាពនោះ។
លោកឧត្តមសេនីយ៍ ត្រី សោម រស់ ស្នងការរងនគរបាលខេត្តប្រាប់បន្តថា ការងារទាំងនេះហាក់ដូចមិនទទួលបានជោគជ័យ នោះទេ តែក្នុងរយៈពេលចុងក្រោយដោយមានការណែនាំពីសំណាក់លោកអភិបាលខេត្តក៏ដូចជាអគ្គ ស្នងការនគរបាលជាតិ ដោយមិនផាកពិន័យយកលុយនៅកន្លែងត្រួតពិនិត្យតាមគោលដៅនីមួយៗ ទៀតទេ ក្នុងករណីអ្នកជិះម៉ូតូមិនពាក់មួកសុវត្ថិភាព ឬគ្មានកញ្ចក់ ត្រូវតែលើកម៉ូតូនោះមករក្សាទុកនៅ ស្នងការដ្ឋាននគរបាលខេត្ត។ ដោយតម្រូវឲ្យម្ចាស់ម៉ូតូត្រូវទៅទិញមួក និងកញ្ចក់មកបំពាក់និងទទួលការ ពន្យល់បន្ថែមពីសមត្ថកិច្ចនូវច្បាប់ចរាចរណ៍ផ្លូវគោក រួចទើបអនុញ្ញាតឲ្យយកម៉ូតូត្រលប់ទៅផ្ទះវិញ។ យុទ្ធនាការក្តៅនេះមិនមែនធ្វើឡើងតែក្នុងរយៈពេល២ថ្ងៃប៉ុណ្ណោះទេ និងត្រូវចុះតាមកន្លែងផ្សេងៗទៀត ដែលធ្វើឡើងដូចភ្លៀងរលឹមដរាបណាទាល់តែប្រជាពលរដ្ឋនាំគ្នាគោរពច្បាប់ចរាចរណ៍ផ្លូវគោកឲ្យបានគ្រប់ៗតែម្តង។
កន្លងទៅថ្មីៗសូម្បីតែអាជីវករលក់ទិញម៉ូតូក្នុងក្រុងកំពង់ចាមទាំងអស់ បានហៅមកប្រជុំស្តាប់ ការណែនាំ ប្រសិនបើលក់ម៉ូតូឲ្យពលរដ្ឋត្រូវតែមានមួកសុវត្ថិភាពឲ្យទៅគេ១ឬ២រួមនឹងសៀវភៅ ច្បាប់ចរាចរណ៍ផងដែរ។ លោកឧត្តមសេនីយ៍ត្រី សោម រស់ ស្នងការរងនគរបាលខេត្តទទួលផែនសណ្តាប់ ធ្នាប់បញ្ជាក់ថា ដោយមានការណែនាំពីសម្តេចក្រឡាហោម ស ខេង ឧបនាយករដ្ឋមន្ត្រីក្រសួងមហាផ្ទៃ សម្រាប់ច្បាប់ចរាចរណ៍ផ្លូវគោកនោះ អ្នកដែលត្រូវអនុវត្ត និងធ្វើជាគំរូមុនគេគឺកម្លាំងសមត្ថកិច្ចនេះតែម្តង។ ត្រូវតែនាំគ្នាគោរពច្បាប់ដោយមានពាក់មួកសុវត្ថិភាព និងបំពាក់កញ្ចក់ ដើម្បីបង្ហាញឲ្យប្រទាប់មហាជន អនុវត្តតាមបើយើងគ្រប់គ្នាអនុវត្តឲ្យបានខ្ជាប់ខ្ជួននោះ នឹងធ្វើឲ្យគ្រោះថ្នាក់ចរាចរណ៍ នៅតាមដងផ្លូវនានានឹងត្រូវកាត់បន្ថយ ពោលគឺធ្វើយ៉ាងណា ឲ្យមានការថមថយកាន់តែតិចទៅៗទើបជាការប្រសើរ៕
ចែករំលែកព័តមាននេះ