ខេត្តប៉ៃលិន ៖ ឱ្យតែមានកម្មវិធីដាក់តាំងមុខទំនិញលក់ដូរពេលរាត្រីម្តងៗ គេសង្កេតឃើញប្រជាពលរដ្ឋរស់នៅក្នុងក្រុងប៉ៃលិន ទាំងក្មេងចាស់ប្រុសស្រីសប្បាយរីករាយក្នុងការនាំគ្នាទៅទិញសម្លៀកបំពាក់ ម្ហូបអាហារ និងនំចំណីយកមកទទួលទានជួបជុំក្រុមគ្រួសារ ។ ប៉ុន្តែអ្វីដែលគួរឱ្យចាប់អារម្ភនោះកាលពីយប់ថ្ងៃទី០៥ ខែកុម្ភ:…
ខេត្តប៉ៃលិន ៖ ឱ្យតែមានកម្មវិធីដាក់តាំងមុខទំនិញលក់ដូរពេលរាត្រីម្តងៗ គេសង្កេតឃើញប្រជាពលរដ្ឋរស់នៅក្នុងក្រុងប៉ៃលិន ទាំងក្មេងចាស់ប្រុសស្រីសប្បាយរីករាយក្នុងការនាំគ្នាទៅទិញសម្លៀកបំពាក់ ម្ហូបអាហារ និងនំចំណីយកមកទទួលទានជួបជុំក្រុមគ្រួសារ ។ ប៉ុន្តែអ្វីដែលគួរឱ្យចាប់អារម្ភនោះកាលពីយប់ថ្ងៃទី០៥ ខែកុម្ភ: ឆ្នាំ២០១៨ កន្លងទៅស្ថិតក្នុងភូមិក្បាលព្រលាន សង្កាត់អូរតាវ៉ៅ ក្រុងប៉ៃលិន មានប្រជាពលរដ្ឋខ្លះបាននាំគ្នាទិញនំចំណីត្រង់កន្លែងដាក់តាំងលក់នោះស្រាប់តែប្រទះឃើញមួយចំនួនហួសកាលបរិច្ឆេទ ។
ប្រភពព័ត៌មានបានឱ្យដឹងថា មានការដាក់តាំងមុខទំនិញលក់ពេលរាត្រីខ្នាតធំមួយ ដែលធ្វើឡើងរយៈពេល១សប្តាហ៍ ចាប់ពីតាំងពីយប់ថ្ងៃទី០៣ រហូតដល់ថ្ងៃទី០៩ ខែកុម្ភៈ ទើបរើតូបទៅវិញ ហើយការលក់ដូរនេះមានគេដាក់ផលិតផលរបស់ខ្មែរ និងមានជនជាតិថៃលក់ដូរផងដែរ ។ ប្រភពបន្តទៀតថា ជារៀងរាល់យប់តាំងពីថ្ងៃចាប់ផ្តើមរហូតមកដល់ពេលនេះ មានការលក់ដូរទំនិញចម្រុះ ស្ទើរគ្រប់ប្រភេទទាំងអស់ ។
ចំណែកប្រជាពលរដ្ឋបានឱ្យដឹងថា ការដាក់លក់ផលិតផលបែបនេះ គួរតែខាងជំនាញធ្វើការចុះ ត្រួតពិនិត្យមើលឱ្យបានត្រឹមត្រូវសិន ទើបអនុញ្ញាតឱ្យអាជីវករយកទំនិញរបស់ខ្លួន ព្រោះមានមុខទំនិញហួសកាលបរិច្ឆេទមួយចំនួនអាចបណ្តាលឱ្យប៉ះពាល់ដល់សុខភាពប្រជាពលរដ្ឋ ឬបើហួសកាលកំណត់យូរអាចធ្វើឱ្យក្លាយទៅជាពុលក្អួតចង្អោរ និងបង្កបញ្ហាផ្សេងៗថែមទៀត ។ ពួកគាត់ក៏សំណូមពរដល់បងប្អូនប្រជាពលរដ្ឋដែលចូលទិញទំនិញគ្រប់ទីកន្លែង ត្រូវមានការប្រុងប្រយ័ត្នខ្ពស់ ចំពោះម្ហូបអាហារ ជាពិសេសមុខទំនិញ ដែលមានលេខស្លាកកាលបរិច្ឆេទ ត្រូវមើលឱ្យបានត្រឹមត្រូវ ស៊ឹមនាំគ្នាទិញយកទៅទទួលទាន ។
លោក សុខ សាធីម ប្រធានមន្ទីរពាណិជ្ជកម្មខេត្តធ្លាប់ឱ្យភ្នាក់ងារសារព័ត៌មានដឹងដែរថា ខេត្តប៉ៃលិនក្នុង១ឆ្នាំៗ អាចបើកលក់ទំនិញពេលរាត្រី ឬការតាំងពិព័រណ៍២ទៅ៣ដង ដោយមានទំនិញមកពីប្រទេសថៃ និងខ្មែរយើងរួមគ្នាផងដែរ ។ លោកបន្តថា មុននឹងដាក់ឱ្យលក់ដូរ ខាងមន្ត្រីជំនាញតែងតែធ្វើការត្រួតពិនិត្យមើលជាមុន បើសិនជាមានទំនិញហួសកាលបរិច្ឆេទ មិនអនុញ្ញាតឱ្យលក់ដូរនោះឡើយ ៕
ចែករំលែកព័តមាននេះ