រាជធានីភ្នំពេញ ៖ ស្ត្រីខ្មែរជាពលការិនីនៅប្រទេសកូរ៉េម្នាក់ដែលមានប្ដីរួចទៅហើយ ប៉ុន្តែមានចិត្តមិនស្មោះ លង់ក្នុងអារម្មណ៍តណ្ហាលួចលាក់មានស្នេហាជាមួយនឹងបុរសម្នាក់ទៀត។ ទំនាក់ទំនងស្នេហានោះបានធ្វើឡើងតាមរយៈឆាត(Chat) ក្នុងបណ្ដាញសង្គមហ្វេសប៊ុក ហើយពីមួយថ្ងៃទៅមួយថ្ងៃស្ត្រីដែលលង់ស្នេហ៍ជាមួយបុរសនោះយ៉ាងខ្លាំង ដោយមិនបានដឹងថា ជននោះគឺជាមុខសញ្ញាចោរប្លន់និងធ្លាប់ជាប់គុកអស់រយៈពេល១២ឆ្នាំ ទើបតែចេញពីគុកឡើយ ។ ដោយសារតែស្រឡាញ់ខ្លាំងពេករហូតឈានដល់ហ៊ានថតរូបអាក្រាតកាយខ្លួនឯង ផ្ញើមកឲ្យជនជាសង្សារនៅស្រុកខ្មែរមើលថែមទៀត ហើយទីបំផុត ក៏ត្រូវបានជននោះយករូបភាពស្រាតទាំងអស់គំរាមទារប្រាក់បានជាង៤ម៉ឺនដុល្លាររហូតអស់លុយពីខ្លួនរលីងទើបហ៊ានប្រាប់ប្ដី និងក្រុមគ្រួសារឲ្យដឹង ព្រមទាំងធ្វើដំណើរចាកចេញពីប្រទេសកូរ៉េមកស្រុកខ្មែរដាក់ពាក្យប្ដឹងសុំឲ្យនគរបាលចាប់ខ្លួនជននោះតែម្ដង ។ ការប្រើរូបភាពអាក្រាតកាយគម្រាមទារប្រាក់ចុងក្រោយមុនការចាប់ខ្លួន បានកើតឡើងនៅវេលាម៉ោង១និង៥នាទីថ្ងៃទី២៨ មករា នៅក្នុងស្រុកហ្វាសងសុី ខេត្តចង់គីឌូ ប្រទេសកូរ៉េ ខាងត្បូង ។
ស្ត្រីខាងលើមានអាយុ៣១ឆ្នាំ ជនជាតិខ្មែរ ជាពលការីនីនៅប្រទេសកូរ៉េ ផ្នែកគ្រឿងបន្លាស់រថយន្តត្រូវបានជននេះគម្រាមឲ្យផ្ញើលុយតាមវីងអស់ចំនួន៤៣.០០០ដុល្លារ ។ ចំណែកបុរសដែលជាជនជំរិតទារប្រាក់ឈ្មោះ ផា ផាន់ណា អាយុ៣២ឆ្នាំ មានទីលំនៅក្នុងភូមិដងគោម ឃុំកំពង់អុស ស្រុកពញាឮ ខេត្តកណ្តាល ។ ជននេះគឺជាមុខសញ្ញាចោរប្លន់យ៉ាងសកម្ម នៅក្នុងរាជធានីភ្នំពេញ ធ្លាប់ជាប់គុកព្រៃស និងត្រពាំងផ្លុងរយៈពេល១២ឆ្នាំ ចាប់ពីឆ្នាំ២០០៣ ដល់ឆ្នាំ២០១៤ និងទើបតែចេញពីគុក ។ ដោយឡែកពេលនេះត្រូវនគរបាលស្រុកអង្គស្នួលឃាត់ខ្លួន បាន នៅចំណុចស្ថានីយប្រេងឥន្ធនៈLHR ស្ថិតនៅក្នុងភូមិឃ្លាំងស្បែក ឃុំកំពង់ហ្លួង ស្រុកពញាឮ ខេត្តកណ្ដាល វេលារសៀលថ្ងៃទី៥ ខែកុម្ភៈ ។ នគរបាលបានដកហូតវត្ថុតាងមួយចំនួនពីជននោះរួមមាន ក្រដាសលេខកូដ Wing ចំនួន១៥សន្លឹក មានទឹកប្រាក់សរុប១២.៨២០ដុល្លារ, ម៉ូតូម៉ាកHonda SCoopy ពណ៌ស ស្លាកលេខ ភ្នំពេញ 1GQ-9967,ទូរស័ព្ទ១គ្រឿង, កាបូប១មានលុយ ៣០ដុល្លារ, អត្តសញ្ញាណប័ណ្ណ១សន្លឹក, ខ្សែដៃប្លាទីន១ខ្សែ, ខ្សែក១ខ្សែ, ចិញ្ចៀន១វង់ និងខ្សែចង្កេះប្រាក់១ខ្សែ ។
នគរបាលបានឲ្យដឹងថា ស្ត្រីរងគ្រោះបានចេញទៅធ្វើការនៅប្រទេសកូរ៉េលើកដំបូងនៅក្នុងថ្ងៃទី២ ខែធ្នូ ឆ្នាំ២០១៣ ។ លុះដល់ថ្ងៃទី១៩ ខែកុម្ភៈ ឆ្នាំ២០១៧ បានសុំច្បាប់ ថៅកែត្រឡប់មកស្រុកកំណើតវិញមួយរយៈដើម្បីរៀបការ ។ ក្រោយពេលរៀបការរួចនាងបានសម្រាកនៅរួមរស់ជាមួយប្ដីបានរយៈពេល១ខែនិង៥ថ្ងៃ ទើបវិលត្រឡប់ទៅធ្វើការនៅប្រទេសកូរ៉េវិញគឺនៅថ្ងៃទី១ ខែមេសា ឆ្នាំ២០១៧ ។ លុះដល់ដើមខែឧសភា ឆ្នាំ២០១៧ នាងបានចាប់ផ្ដើមបែកឆ្វេង ស្រមៃចង់ភ្លក្សរសជាតិស្នេហ៍ថ្មី ដោយសារមានទំនាក់ទំនងជាមួយជនឈ្មោះ ផា ផាន់ណា តាមរយៈបណ្តាញសង្គម Facebook និងបានសាសងគ្នាលេងតាមmessager (chat) តាមអាខោនរបស់ជននោះឈ្មោះSrey Nang ចំណែករបស់នាងរងគ្រោះគឺ (Sok Chen) ។
ប្រភពដដែលបានបន្តទៀតថា រហូតដល់ខែមិថុនា ឆ្នាំ២០១៧ ទំនាក់ទំនងស្គាល់គ្នានោះបានឈានដល់ការស៊ីជម្រៅ រហូតឆាតតាមFacebook ពីការបានស្រឡាញ់គ្នាទៅវិញទៅមក ។ មិនតែប៉ុណ្ណោះបានថត live វីដេអូរបង្ហាញកេរ្តិ៍ភេទ ឲ្យគ្នាមើលទៅវិញ ទៅមកជាច្រើនដងថែមទៀតផង ។ ជនកំហូចមិនបោះបង់គំនិតជាចោរ បន្ទាប់ពីបានរូបភាពអាក្រាតកាយពីនារីរងគ្រោះពេញក្នុងដៃហើយជននេះបានចាប់ផ្ដើម យករូបនោះគម្រាមទារលុយពីនាងរងគ្រោះ ដោយគម្រាមនាងថាបើមិនឲ្យទេ រូបគេនិងយករូបអាក្រាតទាំងនោះបង្ហោះប្រាប់ទៅឲ្យក្រុមគ្រួសារ និងប្ដីរបស់នាងឱ្យដឹង ឲ្យឈឺចាប់ក្អួតឈាម និងនាងក៏ខ្មាស់គេមិនខានឡើយ ។ ខណៈនោះដោយសារតែខ្លាចបែករឿងដឹងដល់ប្ដីនិងក្រុមគ្រួសារ ទើបនាងសុខចិត្តវេរលុយតាមវីងឲ្យជននេះជាបន្តបន្ទាប់ ដោយចាប់ពីថ្ងៃទី២៦ ខែមិថុនា ឆ្នាំ២០១៧ ដល់ខែធ្នូ ឆ្នាំ២០១៧ អស់សរុបចំនួន៦.០០០ដុល្លារ ។ បន្ទាប់មកជននេះបានបន្តគម្រាមយកលុយ រហូតនាងអត់លុយក៏បានទាក់ទងដោយសម្ងាត់ មកកាន់បងប្អូនដែលបើក wing នៅខេត្តកំពង់ឆ្នាំង ឲ្យជួយវេរលុយឲ្យសរុប១១.០០០ដុល្លារ ។ ក្រោយមកនាងបានសងទៅបងប្អូនខាងលើ ទើបតែបានចំនួន៣.០០០ដុល្លារតែប៉ុណ្ណោះ ។
ប្រភពខាងលើបានបន្តទៀតថា មិនបានប៉ុន្មានផង ជននោះបានគំរាមទារលុយទៀត ពេលនោះនាងបានទាក់ទងទៅមិត្តភក្ដិនាងដែលធ្វើការនៅប្រទេសកូរ៉េដូចគ្នា ហើយមានបងប្អូននៅស្រុកខ្មែរ រកស៊ីវេរលុយខ្មែរ-កូរ៉េ មានទីតាំងនៅក្នុងខេត្តពោធិ៍សាត់ឲ្យជួយទាក់ទងគ្នា បន្តមកបងប្អូនរបស់ខ្លួនមួយទៀត នៅខេត្តព្រៃវែងជួយបើកwing បានសរុបលុយ៨.៧៩០ដុល្លាររួចផ្ញើឲ្យជននោះ ។ បន្ទាប់មកចំនួន៣៥០០ដុល្លារទៀត និងលើកចុងក្រោយផ្ញើតាមរយៈប្រព័ន្ធWestern Vnion ពីប្រទេសកូរ៉េមកខ្មែរ សរុបលុយ ចំនួន១.៩០០.០០០Wonស្មើនឹង១.៦៥០ដុល្លារ ។ ប៉ុណ្ណឹងហើយបុរសចោរនៅតែមិនព្រមបញ្ឈប់សកម្មភាពគំរាមទៀតឡើយ ដោយសារតែខ្លួនអស់មានលទ្ធភាពរកលុយបន្ថែមឲ្យជននោះ បានតទៅទៀតនោះ ក៏សម្រេចចិត្តប្រាប់ប្ដី និងក្រុមគ្រួសារបានដឹង ហើយនាងបានសុំច្បាប់ថៅកែត្រឡប់មកស្រុកខ្មែរវិញ និងដាក់ពាក្យបណ្ដឹង ឲ្យនគរបាលស្រុកអង្គស្នួល ជួយចាប់ខ្លួនជននោះចាត់ការតាមច្បាប់តែម្ដង ។
មន្ត្រីនគរបាលបានបន្តថា ក្រោយពេលទទួលបានបណ្ដឹងពីជនរងគ្រោះ កម្លាំងមានសមត្ថកិច្ចបានចុះទៅធ្វើការចាប់ខ្លួនជននោះដល់ស្រុកពញាឮបានភ្លាមៗនាំយកមកសាកសួរ ហើយជននោះបានសារភាពថា ខ្លួនពិតជាបានធ្វើសកម្មភាពគំរាមជនរងគ្រោះមែន ។ ចំណែកលុយដែលនាងផ្ញើឲ្យខ្លួនបានស៊ីចាយ និងលេងល្បែងកាស៊ីណូអស់ហើយគ្មានសល់ទេ ។ ដោយឡែកជននេះ គឺជាមិត្តភក្ដិប្ដីរបស់ស្ត្រីរងគ្រោះផងដែរ ដោយស្គាល់គ្នាពេលទៅរៀនភាសាកូរ៉េ នៅក្នុងភូមិស្រែតាជៃ ឃុំអភិវឌ្ឍន៍ ស្រុកទឹកផុស ខេត្តកំពង់ឆ្នាំង ហើយក្រោយមកជននេះក៏បានក្លាយជាគ្រូបង្គោលទៀតផង ។
សម្រាប់ករណីដូចគ្នានេះ កាលពីប៉ុន្មានឆ្នាំមុនក៏ធ្លាប់មានករណីផ្ទុះរឿងដូចគ្នានេះដែរ ដែលជនជាទណ្ឌិតម្នាក់ជាប់គុកនៅខេត្តព្រៃវែង បានទាក់ទងស្ត្រីម្នាក់ក្នុងផ្លូវស្នេហា រហូតឆាតរូបស្រាតឱ្យគ្នាមើលទៅវិញទៅមកដាស់អារម្មណ៍ស្នេហារកកោះត្រើយគ្មាន ធ្វើឱ្យស្ត្រីរូបនោះធ្លាក់ខ្លួនជាចំណាប់ខ្មាំងដែលជននោះគំរាមទារប្រាក់ជាបន្តបន្ទាប់រហូតខ្សោះខ្លួនទើបបែកការណ៍ ។
រឿងរ៉ាវដូចគ្នានេះក៏មិនខុសគ្នាពីក្រុមម៉ាហ្វ៊ីយ៉ា ចិនដែលមកធ្វើសកម្មភាពនៅស្រុកខ្មែរ ក៏បានប្រើល្បិចឱ្យស្រីៗទាក់ទងទៅស្រុកចិនរកបុរសណាជាអ្នកមានលុយ មានកិត្តិយស ដើម្បីធ្វើទំនាក់ទំនងស្នេហា លុះធ្លាក់ក្នុងអន្ទាក់ស្នេហ៍ហើយ និងត្រូវបានចាប់ជំរិតទារលុយតែម្តង ។ បទល្មើសនេះពិតជាសប្បាយចាយលុយតែដំបូងទេ លើកចុងក្រោយ គឺគុកហើយ ខណៈដែលចំណាប់ខ្មាំងអស់លុយ ៕
ចែករំលែកព័តមាននេះ