ខេត្ដបន្ទាយមានជ័យ ៖ បុរសចំណាស់ម្នាក់ដែលតែងតែប្រើអំពើហិង្សាក្នុងគ្រួសារពេលផឹកស្រាស្រវឹង ត្រូវប៉ូលិសមូលដ្ឋានចាប់ ឃាត់ខ្លួនបញ្ជូនមកកាន់អធិការដ្ឋាននគរបាលស្រុកមង្គលបុរី ដើម្បីមានវិធានការតាមច្បាប់ ។ ហេតុការណ៍អំពើហិង្សានេះបាន កើតឡើងកាលពីវេលាម៉ោង១០ព្រឹកថ្ងៃទី១៨ កក្កដា ឆ្នាំ២០១០ នៅភូមិសំបួរ ឃុំសំបួរ ស្រុកមង្គលបុរី ។ លោកវរសេនីយ៍ត្រីផុន សាលីម អធិការនគរបាលស្រុកមង្គលបុរីបានឱ្យដឹងថា បុរស ចំណាស់ដែលបានប្រព្រឹត្ដអំពើហិង្សាក្នុង គ្រួសារនេះឈ្មោះខៅ សុវណ្ណ អាយុ៥៤ឆ្នាំ រស់នៅក្នុងភូមិកើតហេតុខាងលើ ។ ចំណែកប្រពន្ធឈ្មោះស៊ី ឡន អាយុ៥០ឆ្នាំ និងមានកូនប្រុស-ស្រីចំនួន៤នាក់ ។
លោកអធិការនគរបាលស្រុកបានបន្ដទៀតថា នៅចំពោះមុខសមត្ថកិច្ចឈ្មោះខៅ សុវណ្ណ បានសារភាពថា នៅព្រឹកថ្ងៃកើត ហេតុខ្លួននិងមិត្ដភក្ដិម្នាក់ទៀតបានផឹកស្រា.សជាមួយគ្នាអស់ជាង៣លីត្ររហូតដល់ស្រវឹងធ្លាក់ភ្នែក ។ ក្រោយពីផឹករួច ខ្លួនក៏បានទៅផ្ទះហៅប្រពន្ធមកជប់ខ្យល់ឱ្យ តែប្រពន្ធមិនព្រមជប់ឱ្យ ទើបធ្វើឱ្យខ្លួនខឹងយ៉ាងខ្លាំង ក៏ទាញអង្រែបុកគ្រឿងមកវ៉ៃ ១អង្រែត្រូវចំបោះដៃផុត រួចទាញដំបង ឈើប៉ុនមេជើងប្រវែងកន្លះម៉ែត្រវាយ បន្ថែមទៀតបណ្ដាលឱ្យរងរបួស បន្ទាប់មកបានកូនប្រុសនិងអ្នកជិតខាងជួយដឹកទៅព្យាបាលនៅមន្ទីរពេទ្យបង្អែកមិត្ដភាពកម្ពុជា-ជប៉ុននៅស្រុកមង្គលបុរី ។
បើតាមសំដីកូនប្រុសបង្កើតរបស់បុរស ចំណាស់រូបនេះឈ្មោះវេត វី អាយុ១៦ឆ្នាំ បានឱ្យដឹងថា ឪពុករបស់ខ្លួនពុំដែលផ្ដល់នូវសុភមង្គល ឬសេចក្ដីសុខដល់ម្ដាយ និងពួកខ្លួនជាកូនៗនោះទេ គឺលស់ថ្ងៃតិចណាស់ក្នុងមួយខែៗឱ្យតែស្រវឹងស្រាតែងតែរករឿងម្ដាយរបស់ខ្លួនដោយភ្លើងប្រចណ្ឌជាមួយបុរសម្នាក់នៅភូមិជាមួយគ្នាដែលបុរសនោះមិនទាំងដឹងខ្លួនផង ។ យុវជនរូបនេះបានបន្ដទៀតថា នៅពេលមានភ្លៀងធ្លាក់ ខ្លួនតែងទៅវាលស្រែដើម្បី ចាប់ក្ដាមកង្កែបពេលយប់ ជួនកាលរហូតដល់ម៉ោង១យប់ទើបត្រឡប់មកផ្ទះវិញ ។
ពេលមកដល់ផ្ទះឪពុករបស់ខ្លួនតែងតែបង្ខំឱ្យយកក្ដាម ឬកង្កែបដែលគេរកបាននោះ ធ្វើម្ហូបឱ្យគាត់ក្លែមទាំងយប់ បើមិនធ្វើតាម គាត់គំរាមវាយទាត់ធាក់មិនខាន ។ យុវជនវេត វី បានបន្ដទៀតថា ដោយមិនអាចទ្រាំតទៅទៀតចំពោះអំពើហិង្សា របស់ឪពុកមកលើក្រុមគ្រួសារបានខ្លួនក៏ទៅប្ដឹងដល់អធិការដ្ឋាននគរបាលស្រុកមង្គលបុរី នាព្រឹកថ្ងៃទី២០ កក្កដា ដោយសុំឱ្យសមត្ថកិច្ចចាត់វិធានការតាមផ្លូវច្បាប់ ដើម្បីឱ្យគាត់រាងចាលលែងប្រើអំពើហិង្សាលើគ្រួសារទៀត ។ ប៉ុន្ដែសមត្ថកិច្ចបាននិយាយថា តាមសំណូមពររបស់ស្ដ្រីជាម្ដាយបានសុំឱ្យសមត្ថកិច្ចធ្វើការអប់រំណែនាំជាជំហានដំបូងសិន ដោយឱ្យប្ដីរបស់គាត់ធ្វើកិច្ចសន្យាបញ្ឈប់នូវការប្រព្រឹត្ដអំពើហិង្សានេះតទៅទៀត បើ ថ្ងៃក្រោយមិនរាងចាលសូមឱ្យសមត្ថកិច្ចអនុវត្ដតាមច្បាប់ចុះ ៕
ចែករំលែកព័តមាននេះ