ខេត្តមណ្ឌលគិរី ៖ អ្នកភូមិបានសម្តែងនូវការហួសចិត្តជាខ្លាំង ដែលប្តីប្រពន្ធមួយគូជួលផ្ទះគេស្នាក់នៅ ខណៈឈ្លោះប្រកែកគ្នាតិចតួចស្រាប់តែដុតផ្ទះគេឆេះហ្មត់ ។ ផ្ទះដែលជួលស្នាក់នៅនេះ សង់អំពីឈើត្រូវភ្លើងឆេះអស់ កាលពីវេលាម៉ោង៣រសៀលថ្ងៃទី១ ខែកុម្ភៈ នៅភូមិពូទឹត ឃុំប៊ូស្រា ស្រុកពេជ្រាដា ។
មន្ត្រីសមត្ថកិច្ចឲ្យដឹងថា ផ្ទះនេះមានទំហំ៩ម៉ែត្រគុណនឹង២០ម៉ែត្រ ជាផ្ទះតៀមប្រក់ហ្វ៊ីប្រូស៊ីម៉ង់ត៍ មានម្ចាស់ឈ្មោះ អុឹម ស៊ីណាត ភេទប្រុស អាយុ២៨ឆ្នាំ ប្រពន្ធឈ្មោះ ឈន គឹមហុន អាយុ៣២ឆ្នាំ ជាកសិករ មានស្រុកកំណើតនៅភូមិគីឡូបី ឃុំព្រែកកក់ ស្រុកស្ទឹងត្រង់ ខេត្តកំពង់ចាម ។
ផ្ទះនេះត្រូវបានលោក អុឹម ស៊ីណាត ជួលឱ្យទៅឈ្មោះ ផល សល់ ភេទប្រុស អាយុ២៥ឆ្នាំប្រពន្ធឈ្មោះ ធឹម សុភ័ណ្ឌ អាយុ២៧ឆ្នាំ ដែលប្តីប្រពន្ធនេះមានស្រុកកំណើតនៅខេត្តត្បូងឃ្មុំ ។ តាមប្រភពព័ត៌មានឲ្យដឹងថា ក្រោយពីមានជម្លោះប្តីប្រពន្ធហើយដុតផ្ទះជួលឱ្យឆេះសន្ធោសន្ធៅនោះ អ្នកដុតក៏បានរត់គេចខ្លួនបាត់ស្រមោល ៕
ចែករំលែកព័តមាននេះ