រាជធានីភ្នំពេញ ៖ ទីភ្នាក់ងារសហប្រតិបត្តិការអន្តរជាតិកូរ៉េដែលហៅកាត់ថា កូយកា នឹងផ្តល់គំរោងអគារធនធានមនុស្សមួយខ្នងដល់សាកលវិទ្យាល័យភូមិន្ទភ្នំពេញ ដែលមានតំលៃប៉ាន់ស្មានប្រហែល៦.៥លានដុល្លារអាមេរិក ។ គំរោងនេះត្រូវបានរៀបចំឡើងក្នុងគោលបំណងពង្រឹងសមត្ថភាពប្រកួតប្រជែងជាតិនៃប្រទេសកម្ពុជា តាមរយៈកម្មវិធីអភិវឌ្ឍន៍ធនធានមនុស្ស ។ ក្នុងរយៈពេល៥ឆ្នាំ ដោយរំពឹងថានឹងចាប់ផ្តើមពីឆ្នាំ២០១០ ដល់២០១៤ គំរោងនេះនឹងផ្តល់ឱ្យសាកលវិទ្យាល័យនូវមជ្ឈមណ្ឌលធនធានមនុស្សមួយដែលបំពាក់ដោយសំភារឧបទ្ទេសទំនើបៗ បង្កើតកម្មវិធីអភិវឌ្ឍន៍ធនធានមនុស្សដែលរួមមានផ្នែកព័ត៌មានវិទ្យា មុខវិជ្ជាបណ្តុះបណ្តាលបច្ចេទេស ភាសាកូរ៉េ និងការបញ្ជូនជំនាញការកូរ៉េ ។
កិច្ចព្រមព្រៀងចុងក្រោយនៃគំរោងនេះ នឹងត្រូវចុះហត្ថលេខារវាងប្រទេសទាំងពីរ បន្ទាប់ពីសិក្ខាសាលាចុងក្រោយ ដែលនឹងប្រារព្ធធ្វើនាថ្ងៃទី៣១ សីហា ឆ្នាំ២០១០ ដោយផ្តោតទៅលើការបង្ហាញ និងពិភាក្សាលើលទ្ធផលនៃការសិក្សាប្លង់ និងផែនការមូលដ្ឋាននៃអគារអភិវឌ្ឍន៍ធនធានមនុស្សកម្ពុជា-កូរ៉េ ជាមួយភាគីពាក់ព័ន្ធទាំងអស់ ដែលរួមមានកូយកា សាកលវិទ្យាល័យភូមិន្ទភ្នំពេញ និងក្រសួងអប់រំយុវជន និងកីឡា ។ គួរបញ្ជាក់ផងដែរថា គំរោងនេះជាផ្នែកមួយនៃ ជំនួយអភិវឌ្ឍន៍ផ្លូវការរបស់រដ្ឋាភិបាលកូរ៉េ ឆ្លើយតបចំពោះសំណើ ជាផ្លូវការរបស់រាជរដ្ឋាភិបាលកម្ពុជា ដើម្បីគាំទ្រការអភិវឌ្ឍហេដ្ឋារចនាសម្ព័ន្ធ ដែលនឹងផ្តល់ផលប្រយោជន៍ដល់វិស័យអប់រំរបស់កម្ពុជា ។
សិក្ខាសាលាស្តីអំពីគំរោងបង្កើតអគារអភិវឌ្ឍន៍ធនធានមនុស្សក្នុងប្រទេសកម្ពុជានឹងប្រារព្ធធ្វើនៅថ្ងៃទី៣១ សីហា ឆ្នាំ២០១០ខាងមុខនេះ ដោយកូយកាសហការជាមួយសាកលវិទ្យាល័យភូមិន្ទភ្នំពេញដែលនឹងពិភាក្សាអំពីលទ្ធផលនៃការសិក្សាប្លង់ និងផែនការមូលដ្ឋាននៃអគារអភិវឌ្ឍន៍ធនធានមនុស្សកម្ពុជា-កូរ៉េ ។ លោកឡៅ ឈីវអ៊ាវ សាកលវិទ្យាធិការនៃសាកលវិទ្យាល័យភូមិន្ទភ្នំពេញ និងលោកស៊ីន អ៊ីឆល់ ប្រធានតំណាងថ្មីរបស់ការិយាល័យកូយកាប្រចាំនៅកម្ពុជា នឹងធ្វើការអធិបតីក្នុងសិក្ខាសាលានេះ ។ ក្នុងពេលសិក្ខាសាលា ក្រុមសិក្សាប្លង់ និងផែនការមូលដ្ឋានរបស់កូរ៉េ នឹងបង្ហាញលទ្ធផលនៃការសិក្សារបស់ខ្លួន និងប្រមូលនូវរាល់មតិយោបល់ផ្សេងៗពីសិក្ខាកាមដើម្បីបញ្ចប់របាយការណ៍ចុងក្រោយរបស់ខ្លួន ៕
ចែករំលែកព័តមាននេះ