សារព័ត៌មាននៅក្រុងប៊ែរឡាំងកាលពីថ្ងៃទី៨ ធ្នូ ផ្សាយថា តុលាការអាល្លឺម៉ង់បានបើកសវនាការកាលពីថ្ងៃទី៧ ធ្នូ សម្រេចដាក់ពន្ធនាគារបុរសម្នាក់រយៈពេលជាង៣ឆ្នាំ ពីបទធ្វើឃាតគូស្នេហ៍ជាបុរស ក្រោយពីរួមរ័កក្នុងក្បាច់ស្នៀតចម្លែករួចមក ។ ជននោះបានកម្ទេចសាកសព រួចយកក្បាលទៅស្ងោរបំបិទដាន ។
លោកផេទ័រ ហ្វាវ ចៅក្រមតុលាការក្រុងប៊ែរឡាំង បានអានសាលដីកាដាក់ពន្ធនាគារលើបុរសជាប់ចោទដែលជាអ្នកគ្មានការងារធ្វើអាយុ៤៤ឆ្នាំនោះរយៈពេល៣ឆ្នាំ និង៣ខែ ពីបទសម្លាប់គូស្នេហ៍បុរសជាបុគ្គលិកធនាគារអាយុ៣៧ឆ្នាំដោយចេតនា ។ ការសម្លាប់នោះក្រោយពីរួមរ័កជាមួយគ្នាយ៉ាងចម្លែក ។ ជនជាប់ចោទមានចេតនាបំផ្លាញសាកសពដើម្បីបំបាត់ដានទៀតផង ។
ជនជាប់ចោទសារភាពថា គេស្គាល់ជនរងគ្រោះតាមរយៈអីុនធើរណេតរយៈពេលយូរមកហើយ ។ ពេលរួមរ័កជាមួយគ្នាកាលពីថ្ងៃទី៥ មករា នោះគេបានចងគូស្នេហ៍នៅក្បាលគ្រែ និងប្រើស្កុតបិទមាត់ និងច្រមុះ ។ ដោយសារបែបនេះហើយទើបធ្វើឱ្យគូស្នេហ៍របស់គេស្លាប់ ។ គេសម្រេចចិត្តកម្ទេចសាកសព រួចយកក្បាលទៅស្ងោរដើម្បីបំបិទភស្តុតាង ។
ទោះជាយ៉ាងណាក៏ដោយ ប៉ូលិសសើុបអង្កេតរហូតឈានដល់ចាប់ខ្លួនជនជាប់ចោទ ក្រោយពីឆ្លងផុតរយៈពេល៤សប្តាហ៍ ដោយជនជាប់ចោទយល់ព្រមប្រគល់ខ្លួនឱ្យប៉ូលិសតាមសម្រួលក្រោយពីព្យាយាមធ្វើអត្តឃាតគេចពីកំហុស ប៉ុន្តែមិនបានសម្រេច ។
ជនជាប់ចោទបានទទួលស្គាល់ថា គេនិងគូស្នេហ៍មានចំណងផ្លូវភេទខុសពីមនុស្សទូទៅ និងធ្លាប់រួមរ័កក្នុងវិធីសាស្ត្របែបនោះជាច្រើនលើក។ រូបគេគ្មានចេតនាសម្លាប់គូស្នេហ៍ទេ ។
នៅមុនពេលប្រកាសសាលក្រម បណ្តាអយ្យការបានផ្តល់សំណើដាក់ពន្ធនាគារបុរសនោះអស់មួយជីវិត ប៉ុន្តែចៅក្រមយល់ថាជនជាប់ជោទយល់ព្រមទទួលកំហុស រួមទាំងសារភាព គឺជាប្រយោជន៍ ទៅលើរឿងក្តី និងបញ្ជាក់ថា នឹងមិនប្តឹងទៅឧទ្ធរណ៍ ទើបពិចារណាសម្រាលទោស ៕
ចែករំលែកព័តមាននេះ