រាជធានីភ្នំពេញ ៖ តារាសម្តែង និងបង្ហាញម៉ូដរាងខ្ពស់ស្រឡះនាងទឹម រដ្ឋា បានសម្រេចលុបចោលការចេញទៅសម្តែងនៅលើទឹកដីសហរដ្ឋអាមេរិក ដោយសារនាងទទួលយកការងារនៅក្នុងស្រុកដែលធ្លាក់មកយ៉ាងច្រើនរដឹក ។តារាសម្តែងរូបនេះអះអាងប្រាប់កោះសន្តិភាពតាមទូរស័ព្ទកាលពីពេលថ្មីៗនេះថា នាងលុបចោលគម្រោងចេញទៅសម្តែងនៅសហរដ្ឋអាមេរិក បន្ទាប់ពីនាងយល់ព្រមទទួលយកការងារនៅក្នុងស្រុក ដែលមិនអាចដកឃ្លាបាន។
តាមគម្រោងនាងនឹងត្រូវចេញទៅសម្តែងនៅប្រទេសមហាអំណាចមួយនោះ នៅចុងខែមករា តែនាងសម្រេចលុបចោលវិញ បន្ទាប់ពីនាងត្រូវសម្តែងនៅក្នុងកម្មវិធីថ្មីរបស់ទូរទស្សន៍អប្សរា ដែលដឹកនាំដោយលោកហ្វៃ សំអាង ។ ម៉្យាងទៀត នាងជាប់ថតរឿងថ្មីឲ្យស្ថានីយទូរទស្សន៍ CTN ហេតុនេះទើបនាងមិនអាចដកឃ្លាចេញទៅសម្តែងនៅឯក្រៅប្រទេសបាន ។
ទឹម រដ្ឋា បញ្ជាក់ថា ការសម្រេចចិត្តលុបគម្រោងចេញទៅសម្តែងនៅអាមេរិក នាងមានការសោកស្តាយ ព្រោះនេះជាឱកាសលើកដំបូងរបស់នាង ដែលអាចបង្ហាញមុខដោយផ្ទាល់ឲ្យបងប្អូនខ្មែរយើងដែលរស់នៅទីនោះបានស្គាល់ ។ ដោយសារការស្នើសុំពីអ្នករៀបចំគម្រោងឲ្យទៅសម្តែងនៅទីនោះ មកក្រោយការងារដែលនាងបានទទួលនៅក្នុងស្រុក ហេតុនេះទើបនាងសម្រេចមិនចេញទៅតែម្តង ។ ទោះជាយ៉ាងណាក្តី នាងអាចនឹងចេញទៅសម្តែងនៅទីនោះបាន ខណៈពេលដែលមានការស្នើសុំជាថ្មីក្រោយពេលការងារនៅក្នុងស្រុកស្បើយជាងនេះ ។
កន្លងមកនាងទឹម រដ្ឋា មិនធ្លាប់ចេញទៅច្រៀងនៅប្រទេសណាឡើយ ក្រៅពីចេញទៅបង្ហាញម៉ូដជាក្រុមនៅប្រទេសអូស្ត្រាលីម្ដង និងទៅវៀតណាមញឹកញាប់។ នាងរមែងដាក់លក្ខខណ្ឌសណ្ដោងយកម្ដាយ និងប្អូនស្រីទៅជាមួយជានិច្ច ទើបមិនមានអ្នករៀបចំគម្រោងនាំអ្នកសិល្បៈទៅសម្តែងនៅបរទេសណាមួយចេញមុខទាក់ទងឲ្យនាងចេញទៅក្នុងរយៈពេលយូរយ៉ាងនេះ ។
ដោយសារនាងទឹម រដ្ឋា មានបំណងចង់បង្ហាញកេរ្តិ៍ឈ្មោះនៅឯក្រៅប្រទេសដូចតារាឯទៀតនោះ ទើបនាងសម្រេចកែប្រែលក្ខខណ្ឌនោះឡើងវិញ ដោយនាងសម្រេចទទួលយកគ្រប់ការស្នើសុំក្នុងពេលចេញទៅសម្តែងនៅឯក្រៅប្រទេស ។ទឹម រដ្ឋា និយាយថា «ក្រោយការប្រកាសបែបនេះបានធ្វើឲ្យខ្ញុំបានទទួលសំណើចេញសម្ដែងកាន់តែច្រើននៅបណ្ដាប្រទេសធំៗលើពិភពលោក ដោយក្នុងនោះមានអូស្រ្តាលី បារាំង អាមេរិក និងកាណាដាជាដើម» ។
ទោះជាយ៉ាងណាក្តី ក្នុងចំណោមបណ្ដាអ្នកទាក់ទងឱ្យចេញទៅប្រទេសទាំងនោះនាង រដ្ឋា ចាប់អារម្មណ៍ចង់ទទួលតែសំណើពីអ្នកអាមេរិកប៉ុណ្ណោះ ដោយសារតែនាងល្បីថា តារាដែលចេញទៅសម្ដែងនៅលើទឹកដីអាមេរិកនោះកើបប្រាក់បានក្រាស់ក្រែល ។ ម្យ៉ាងទៀតនៅទីនោះក៏មានបុរសៗមួយចំនួនតែងតែព្យាយាមទាក់ទងជាមួយនាងដែរ ដោយពួកគេបានបង្ហាញអារម្មណ៍អន្ទះសា និងចង់ឲ្យកាលវេលានោះរំកិលកាន់តែកៀក ដោយសារតែគេចង់ឃើញរូបសម្រស់ពិតរបស់នាងឲ្យច្បាស់នឹងភ្នែក ។ ប៉ុន្តែក្នុងពេលផែនការទាំងមូលកាន់តែច្បាស់មិនមានប្រែប្រួល តារាស្រីរូបនេះបែរជាបញ្ជូនពាក្យទៅកាន់អ្នករៀបចំគម្រោងថា នាងចេញទៅមិនកើតទៅវិញ ។
ការសម្រេចចិត្តយ៉ាងតក់ក្រហល់នេះធ្វើឲ្យបុរសនៅអាមេរិកមួយចំនួនដែលចង់ឃើញសម្រស់របស់នាងទឹម រដ្ឋា ដោយផ្ទាល់ភ្នែកនោះខកចិត្តមិនស្ទើរឡើយ បន្ទាប់ពីពេលវេលាកាន់តែជិតដល់នាងបែរជាឆ្លើយថា «ទេ»ទៅវិញ ។គេយល់ថា ការសម្រេចមិនទៅអាមេរិករបស់តារាចាយរាងរូបនេះ ប្រហែលមកពីនាងមិនចង់មានការរញ៉េរញ៉ៃជាមួយបុរសអស់ទាំងនោះ ។
នៅពេលសួរដល់រឿងនេះនាងទឹម រដ្ឋា បានប្រញាប់ប្រញាល់បដិសេធដោយអះអាងថា «ការសម្រេចចិត្តមិនទៅរបស់នាងខ្ញុំនាពេលនេះ មិនមែនឈរលើមូលហេតុនោះឡើយ ហើយនាងខ្ញុំក៏មិនចង់និយាយអ្វីប៉ះពាល់ដល់អ្នករស់នៅអាមេរិកដែរ ព្រោះពួកគាត់គាំទ្រយើងចង់ឲ្យយើងចេញទៅសម្តែងនៅទីនោះ ដើម្បីឲ្យពួកគាត់បានឃើញមុខផ្ទាល់ម្តង» ៕
ចែករំលែកព័តមាននេះ