រាជធានីភ្នំពេញ ៖ ជនសង្ស័យដែលជាមុខសញ្ញាចោរប្លន់ និងលួចប្រដាប់អាវុធ២នាក់ ដែលបានចូលទៅធ្វើសកម្មភាពលួចម៉ូតូបុរសម្នាក់ដល់ក្រោមផ្ទះ កាលពីវេលាម៉ោង០៩និង៥០នាទីព្រឹក ថ្ងៃទី០៣ ខែមករា ឆ្នាំ២០១៨ ហើយពេលម្ចាស់តាមទាន់ បានដកកាំភ្លើងភ្ជង់ប្រុងបាញ់សម្លាប់ រួចបានជិះម៉ូតូគេចខ្លួនបាត់ដោយសុវត្ថិភាពនោះ ។
ពេលនេះបានចេញធ្វើសកម្មភាពប្លន់ និងលួចម៉ូតូទៀត ប៉ុន្តែចំថ្ងៃស៊យបានជួបកម្លាំងនគរបាលកំពុងល្បាត ឃើញគួរឲ្យសង្ស័យ ។ ពេលនោះ នគរបានបានហៅកម្លាំងបន្ថែមដើម្បីឡោមព័ទ្ធចាប់ខ្លួន ប៉ុន្តែត្រូវបានជនសង្ស័យខាងលើដឹងខ្លួនទាន់ បាននាំគ្នារត់គេចខ្លួន ហើយត្រូវបានកម្លាំងចាប់បានម្នាក់រួមជាមួយឧបករណ៍កាច់សោ.កម៉ូតូ១កំប្លេរ ។ ចំណែកម្នាក់ទៀតដែលមានកាំភ្លើងខ្លីនៅជាប់ខ្លួន បានជិះម៉ូតូ១គ្រឿងគេចខ្លួនបាត់ដោយសុវត្ថិភាព ។
ហេតុការណ៍ចាប់បានចោរនេះ កើតឡើងកាលពីវេលាម៉ោង១០និង៣០នាទីព្រឹក ថ្ងៃទី០១ ខែកុម្ភៈ ឆ្នាំ២០១៨ ស្ថិតនៅតាមបណ្ដោយផ្លូវបេតុង ក្នុងភូមិចំការឪឡឹក១ សង្កាត់កាកាប១ ខណ្ឌពោធិ៍សែនជ័យ រាជធានីភ្នំពេញ ។
ជនសង្ស័យដែលជាមុខសញ្ញាក្រុមចោរប្លន់ចោរលួចម៉ូតូ ដែលត្រូវចាប់ខ្លួននោះឈ្មោះ ជា ធា អាយុ៣៥ឆ្នាំ ស្នាក់នៅមិនពិតប្រាកដ ហើយនគរបាលបានដកហូតឧបករណ៍សម្រាប់កាច់សោ.កម៉ូតូបាន១កំប្លេរ ។ ចំណែកឯបក្ខពួកម្នាក់ទៀតដែលរត់គេចខ្លួនរួចនោះ មានកាំភ្លើងខ្លី១ដើមនៅជាប់ខ្លួនផងដែរ ហើយក្រុមចោរនេះមានឱកាសលួចបានគឺលួច ប៉ុន្តែបើមានឱកាសប្លន់បានគឺប្លន់តែម្ដង ។
តាមប្រភពព័ត៌មានបានឲ្យដឹងថា នៅមុនពេលកើតហេតុ កម្លាំងនគរបាលប៉ុស្ដិ៍កាកាប២ បានចេញល្បាតពួនស្ទាក់បទល្មើសនៅក្នុងមូលដ្ឋាន លុះពេលទៅដល់ត្រង់ចំណុចកើតហេតុខាងលើ បានប្រទះឃើញជនសង្ស័យទាំង២នាក់កំពុងចេញធ្វើសកម្មភាពលួចម៉ូតូ១គ្រឿង ។ ពេលនោះដោយសារតែកម្លាំងតិច នគរបាលខាងលើបានហៅកម្លាំងជំនួយដើម្បីឡោមព័ទ្ធចាប់ចោរនេះ ប៉ុន្តែត្រូវចោរដឹងខ្លួនទាន់ ក៏បាននាំគ្នារត់គេចខ្លួន ហើយកម្លាំងបានដេញតាមចាប់បានម្នាក់ ដែលជាអ្នកកាច់.កម៉ូតូ ឬឯម្នាក់ទៀតដែលជាអ្នកកាន់កាំភ្លើងចាំបិទគូទ បានជិះម៉ូតូរត់គេចខ្លួនបាត់ ។
នគរបាលបានឲ្យដឹងថា ក្រោយពេលចាប់ខ្លួនបាននាំយកទៅសាកសួរនៅប៉ុស្តិ៍កាកាប១ ហើយជនសង្ស័យម្នាក់នេះបានសារភាពថា ខ្លួន និងបក្ខពួកដែលមានកាំភ្លើងខ្លី១ដើម និងគេចខ្លួនបាត់នោះ ពិតជាបានចេញធ្វើសកម្មភាពលួច និងប្លន់ម៉ូតូមែន ។ ដោយកន្លងមកធ្លាប់បានធ្វើសកម្មភាពបានសម្រេចចំនួន៦លើករួចមកហើយ នៅក្នុងភូមិសាស្ត្រខណ្ឌពោធិ៍សែនជ័យ និងបណ្ដាខណ្ឌមួយចំនួនទៀតនៅក្នុងរាជធានីភ្នំពេញ ។
ជនសង្ស័យដដែលបានបន្តទៀតថា ក្នុងនោះកាលពី១ខែមុននៅវេលាម៉ោង០៩និង៥០នាទីព្រឹក ថ្ងៃទី០៣ ខែមករា ឆ្នាំ២០១៨ ពួកខ្លួនបានធ្វើសកម្មភាពចូលទៅលួចម៉ូតូ១គ្រឿងនៅក្រោមផ្ទះមួយកន្លែង ដែលមានទីតាំងស្ថិតនៅក្នុងភូមិតាងួន សង្កាត់កាកាប១ ខណ្ឌពោធិ៍សែនជ័យ ។ ពេលនោះលួចបានតែត្រូវបានម្ចាស់ទាន់ ហើយបងប្អូនជនរងគ្រោះបានជិះម៉ូតូបំបុកទៀត តែពួកខ្លួនបានដកកាំភ្លើងខ្លីភ្ជង់គំរាមទើបយកម៉ូតូបាន និងជិះគេចខ្លួនដោយសុវត្ថិភាពរហូតដល់ពេលនេះ ទើបត្រូវនគរបាលចាប់ខ្លួនបាន ។
សូមរម្លឹកផងដែរថា កាលពីវេលាម៉ោង០៩និង៣០នាទីព្រឹក ថ្ងៃទី០៣ ខែមករា ឆ្នាំ២០១៨ មានការភ្ញាក់ផ្អើលមួយបានកើតឡើង បន្ទាប់ពីមានចោរ២នាក់បានជិះម៉ូតូម៉ាកហុងដាឌ្រីមសេ១២៥ មិនចាំស្លាកលេខ១គ្រឿង និងប្រដាប់ដោយកាំភ្លើងខ្លី១ដើម ចូលទៅធ្វើសកម្មភាពលួចម៉ូតូ១គ្រឿងដែលម្ចាស់ចតទុកនៅក្រោមផ្ទះមួយកន្លែង ស្ថិតនៅតាមផ្លូវបេតុងភូមិតាងួន សង្កាត់កាកាប១ ខណ្ឌពោធិ៍សែនជ័យ ។ ពេលនោះម្ចាស់ដឹងទាន់បានដេញតាមហើយបងប្អូនជនរងគ្រោះបានជិះម៉ូតូហុងដាស្កូបពី១គ្រឿងបំបុកថែមទៀត តែចោរមិនដួលបែរជាដួលខ្លួនឯង ហើយចោរបានដកកាំភ្លើងភ្ជង់គំរាមបាញ់សម្លាប់ និងយកម៉ូតូទៅបាត់ ។
ប្រភពខាងលើបានបន្តថា បុរសរងគ្រោះខាងលើនោះឈ្មោះ គង ជី អាយុ៥១ឆ្នាំ មុខរបររត់ម៉ូតូឌុប មានទីលំនៅ ផ្ទះកើតហេតុខាងលើ ។ បានបាត់បង់ម៉ូតូ១គ្រឿងម៉ាកហុងដាឌ្រីមសេ១២៥ ស៊េរីឆ្នាំ២០១៧ ពណ៌ខ្មៅ ពាក់ស្លាកលេខ ភ្នំពេញ ១GP-៥១៣៩ ចំណែកនគរបាលបានឆែកមើលសកម្មភាព និងភិនភាគចោរនៅតាមកាមរ៉ាសុវត្ថិភាព ហើយរូបភាពទាំងនោះក៏ត្រូវបានចុះផ្សាយតាមបណ្ដាញសារព័ត៌មាននានាផងដែរ រហូតមកទល់ពេលនេះទើបចោរអស់ល័ក្ខណ៍ត្រូវចាប់ខ្លួនបានម្នាក់ ហើយគួរឲ្យស្ដាយដែលចោរជាអ្នកកាន់កាំភ្លើងនៅតែមានវាសនារត់រួចដដែល ៕
ចែករំលែកព័តមាននេះ