ខេត្តសៀមរាប ៖ ម្ចាស់រថយន្តដឹកដីម្នាក់ ដែលដឹកដីចេញមកពីឃុំរុនតាក ស្រុកបន្ទាយស្រី ខេត្តសៀមរាប យកមកលក់ឱ្យគេនៅក្នុងក្រុងសៀមរាប បានបើកកិនគ្រាប់មីនមិនទាន់ផ្ទុះមួយគ្រាប់ មិនដឹងខ្លួន ហើយកៀបជាប់នឹងកង់ក្រោយខាងស្តាំ ខណៈគាត់ទៅយកដីពីរណ្ដៅរបស់យាយហ្គិច បន្ទាប់ពីចាក់ដីអស់ ក៏យករថយន្តមកជួសជុល ក៏ប្រទះឃើញ នាំគ្នាភ័យស្លន់ស្លោ ទាំងម្ចាស់ឡាន ម្ចាស់យានដ្ឋាន រួចរាយការណ៍ទៅសមត្ថកិច្ចឱ្យចុះមកជួយអន្តរាគមន៍ភ្លាមៗ ។
ហេតុការណ៍យុវជនដឹកដីប្រទះឃើញគ្រាប់មិនទាន់ផ្ទុះនោះ បានកើតឡើងនៅរសៀលថ្ងៃទី៣១ ខែមករា ឆ្នាំ២០១៨ ស្ថិតនៅក្នុងយានដ្ឋានរថយន្តមួយកន្លែង ក្នុងភូមិភ្ញាជ័យ សង្កាត់ស្វាយដង្គំ ក្រុងសៀមរាប ខេត្តសៀមរាប ។
បើតាមសម្តីរបស់សមត្ថកិច្ចមូលដ្ឋានបានឱ្យដឹងនៅរសៀលថ្ងៃទី០១ ខែកុម្ភៈ ឆ្នាំ២០១៨ នេះថា បន្ទាប់ពីមានសេចក្តីរាយការណ៍ពីប្រជាពលរដ្ឋថា មានករណីអ្នកបើកបររថយន្តដឹកដីម្នាក់កិនគ្រាប់មីនមិនទាន់ផ្ទុះកៀបនៅកង់ក្រោយខាងស្តាំ កំពុងយកមកជួសជុលនៅក្នុងយានដ្ឋាន ខណៈពេលនោះ កម្លាំងជំនាញក៏បានចុះទៅដល់កន្លែងកើតហេតុ រួចឃើញភ្លាមក៏រាយការណ៍ទៅអង្គការស៊ីម៉ាក ដើម្បីឱ្យចុះមកជួយយកចេញពីកង់រថយន្តទៅកម្ទេចចោលផង ។
ប្រភពបានបន្តថា ម្ចាស់រថយន្តដឹកដីមានឈ្មោះ នេត កុម្ភៈ ភេទប្រុស អាយុ៣០ឆ្នាំ មុខរបរស៊ីឈ្មួលដឹកដី មានទីលំនៅក្នុងភូមិភ្ញាជ័យ សង្កាត់ស្វាយដង្គំ ។ ប្រភពបានបន្តថា បន្ទាប់ពីម្ចាស់រថយន្តចាក់ដីឱ្យគេរួច ហើយក៏យករថយន្តមកជួសជុលនៅយាន្តដ្ឋានមួយកន្លែងនៅសង្កាត់ស្វាយដង្គំ ខណៈពេលនោះ ក៏ប្រទះឃើញគ្រាប់មីនប្រភេទ៨០មីលីម៉ែត្រចំនួន១គ្រាប់ កៀបជាប់ចន្លោះកង់រថយន្តក្រោយខាងស្តាំ ។ ពេលនោះទាំងម្ចាស់រថយន្ត និងម្ចាស់យាន្តដ្ឋាន មានការភ័យស្លន់ស្លោ ហើយក៏បានរាយការណ៍មកសមត្ថកិច្ចឱ្យជួយអន្តរាគមន៍ ។
លោកបន្ថែមថា បន្ទាប់ពីសមត្ថកិច្ចទៅដល់ក៏បានរាយការណ៍ទៅអង្កការស៊ីម៉ាកមកដោះ ដើម្បីយកទៅកម្ទេចចោល ។ ចំណែកម្ចាស់រថយន្តដឹកដីបានរៀបរាប់ប្រាប់សមត្ថកិច្ចមូលដ្ឋានថា មុនដំបូងគាត់បានទៅដឹកដីពីកន្លែងរណ្ដៅដីរបស់យាយហ្គិច ក្នុងភូមិថ្នល់ ឃុំរុនតាឯក ស្រុកបន្ទាយស្រី ខេត្តសៀមរាប ហើយដឹកយកមកលក់នៅក្រុងសៀមរាប ខណៈពេលនោះ គាត់ក៏បានចាក់ដីឱ្យគេរួចរាល់ហើយ ក៏យកឡានមកជួសជុលនៅយានដ្ឋាននៅសង្កាត់ស្វាយដង្គំ ស្រាប់តែក្រឡេកឃើញគ្រាប់១គ្រាប់កៀបជាប់នៅកង់ក្រោយខាងស្តាំ ដោយមិនដឹងខ្លួន រួចក៏នាំគ្នាភ័យស្លន់ស្លោរត់ទៅប្រាប់សមត្ថកិច្ចដែលនៅជិត ដើម្បីឱ្យពួកគាត់ចុះមកយកចេញ ។
ក្រោយពេលមន្ត្រីអង្គការស៊ីម៉ាកចុះមកដល់ ហើយក៏បានយកមកពិនិត្យ រួចសន្និដ្ឋានបានថា នេះគឺជាគ្រាប់មីនដែលអាចផ្ទុះនៅពេលណាក៏បាន ហើយគ្រាប់នេះផលិតនៅប្រទេសអាមេរិកកាំង ប៉ុន្តែសំណាងណាស់ ដែលម្ចាស់រថយន្តកិនគ្រាប់ចំកង់កណ្តាល មិនកិនចំសម្បកកង់ កុំអីវាផ្ទុះនៅតាមផ្លូវបាត់ទៅហើយ ៕
ចែករំលែកព័តមាននេះ