រាជធានីភ្នំពេញ ៖ បុរសម្នាក់បានសន្លប់បាត់ស្មារតី និងនារី២នាក់បានរងរបួសធ្ងន់ដោយម្នាក់បាកជើងម្ខាង និងម្នាក់ទៀតបាកដៃម្ខាងក្នុងគ្រោះថ្នាក់ចរាចរណ៍បើកម៉ូតូម៉ាកហ្វុីណូពណ៌ខៀវលាយសមួយគ្រឿងក្នុងល្បឿនលឿនជ្រុលទៅបុកលូដែលគេដាក់ជាសញ្ញាតាមផ្លូវដែលកំពុងជួសជុលចំពីមុខពេញទំហឹងកាលពីវេលាម៉ោង១២និង៤៥នាទីរំលងអធ្រាត្រឈានចូលថ្ងៃទី១១ ធ្នូ តាមបណ្តោយផ្លូវភ្នំពេញ-ហាណូយ ទល់មុខអធិការដ្ឋានខណ្ឌសែនសុខចាស់ ក្នុងសង្កាត់ភ្នំពេញថ្មី ខណ្ឌសែនសុខ ។
ជនរងគ្រោះទាំង៣នាក់ក្នុងនោះមាននារី២នាក់ ដែលអ្នកបើកម៉ូតូឈ្មោះស្រី និច អាយុ២០ឆ្នាំ របួសបាក់ជើងខាងស្តាំនិង២នាក់ទៀតជិះពីក្រោយឈ្មោះស្រី ខួច អាយុ១៨ឆ្នាំ រងរបួសបាកដៃស្តាំ និងបុរសម្នាក់ទៀតជិះក្រោយគេដែលសន្លប់បាត់ស្មារតីនោះឈ្មោះណូន អាយុ២៣ឆ្នាំ ទាំង៣នាក់ស្នាក់នៅសង្កាត់ឃ្មួញ ខណ្ឌសែនសុខ រាជធានីភ្នំពេញ ។
សាក្សីនិយាយថា មុនពេលកើតហេតុគេឃើញម៉ូតូម៉ាកហ្វុីណូពណ៌ខៀវលាយសមួយគ្រឿងជិះឌុបគ្នា៣នាក់ បើកបរដោយនារីម្នាក់ទំនងជាស្រវឹងស្រាបានបើកម៉ូតូយ៉ាងលឿនតាមផ្លូវភ្នំពេញ-ហាណូយក្នុងទិសដៅពីត្បូងទៅជើង ស្រាប់តែមកដល់ចំណុចកើតហេតុក៏រេចង្កូតទៅបុកលូដែលគេដាក់ជាសញ្ញាតាមផ្លូវដែលកំពុងជួសជុលចំពីមុខពេញទំហឹងបណ្តាលឲ្យនារីម្នាក់ដែលបើកម៉ូតូរងរបួសធ្ងន់ដោយបាក់ជើងខាងស្តាំ និងនារីម្នាក់ទៀតជិះពីក្រោយរបួសធ្ងន់ដូចគ្នាដោយបាក់ដៃខាងស្តាំ ឯបុរសជិះក្រោយសន្លប់ឈឹង ត្រូវមិត្តភក្តិហៅរថយន្តសាមុយដឹកយកទៅសង្រោះនៅមន្ទីរពេទ្យឯកជនមួយ។ ក្រោយពេលកើតហេតុ មនុស្សមួយក្រុមដែលពួកគេអះអាងមុខប៉ូលិសខណ្ឌសែនសុខថា ជាមិត្តភក្តិរបស់ជនរងគ្រោះហើយសុំយកម៉ូតូរបស់ជនរងគ្រោះទៅរក្សាទុក ព្រោះមិនចង់រំខានដល់ប៉ូលិស ៕
ចែករំលែកព័តមាននេះ