បែកធ្លាយមូលហេតុទីលានប្រណាំងម៉ូតូលុបចោលការប្រកួត
- ភ្នំពេញ
រាជធានីភ្នំពេញ ៖ ក្រោយបញ្ចប់ការប្រណាំងពេញរយៈពេល២ថ្ងៃកាលពីថ្ងៃសៅរ៍ ទី២៦ សីហា និងថ្ងៃអាទិត្យទី២៧ សីហា ក្នុងឆ្នាំ២០១៦ កន្លងទៅ គេកត់សម្គាល់ថា…
រាជធានីភ្នំពេញ ៖ ក្រោយបញ្ចប់ការប្រណាំងពេញរយៈពេល២ថ្ងៃកាលពីថ្ងៃសៅរ៍ ទី២៦ សីហា និងថ្ងៃអាទិត្យទី២៧ សីហា ក្នុងឆ្នាំ២០១៦ កន្លងទៅ គេកត់សម្គាល់ថា ទីលានប្រណាំងម៉ូតូ King Track Circuit ស្ថិតនៅសង្កាត់ឃ្មួញ ក្នុងខណ្ឌសែនសុខ ម្ដុំមណ្ឌលឱកាសខ្ញុំ មានសកម្មភាពខ្លាំងទាំងការប្រណាំងលេងៗ និងហ្វឹកហាត់ ។
យ៉ាងណាមិញ ទិន្នន័យចុងក្រោយបានអះអាងថា ទីលានមួយនោះមិនបានជួយឱ្យវិស័យប្រណាំងម៉ូតូមានភាពផុលផុសនោះទេ ដោយសារតែមានហេតុផលកើតឡើងនៅពីក្រោយគម្រោងដែលធ្លាប់ប្រកាសថា នឹងធ្វើឱ្យផ្ទុះកក្រើកក្នុងចំណោមអ្នកចូលចិត្តប្រណាំងម៉ូតូ។
លោក គង់ ធារ៉ា អ្នករៀបចំព្រឹត្តិការណ៍ប្រណាំងម៉ូតូថ្នាក់ជាតិ និងជាអ្នកគ្រប់គ្រងទីលាន King Track Circuit បានអះអាងថាការប្រកួតប្រណាំងម៉ូតូដែលបានធ្វើឡើងនាពេលកន្លងទៅ មិនត្រឹមតែជួយឱ្យវិស័យមួយនេះរបស់កម្ពុជារកឃើញអ្នកជំនាញជិះម៉ូតូប៉ុណ្ណោះទេ តែក៏ធ្វើឱ្យមានអ្នកមានចំណូលចិត្តប្រណាំងម៉ូតូច្រើននាក់ចាប់អារម្មណ៍ក្នុងការហ្វឹកហាត់នៅលើទីលានផងដែរ ។
រយៈពេល២ថ្ងៃដែលទីលានទាំងមូលបើកការប្រកួត បានប្រមូលផ្ដុំកីឡាករជាអ្នកជំនាញខាងផ្នែកប្រណាំងម៉ូតូ ដែលភាគច្រើនជាអ្នករស់នៅភ្នំពេញ និងមកពីបណ្ដាខេត្តសរុបប្រមាណ៦៦រូបឱ្យបង្ហាញខ្លួន ខណៈដែលអ្នកប្រណាំងម៉ូតូប្រមាណជា៣០០នាក់នៅទូទាំងប្រទេសក៏ជ្រើសយកទីលានដែលលោកបង្កើតឡើងដើម្បីណាត់គ្នាប្រកួតសាកល្បងសមត្ថភាពដែរ ។ កម្លាំងម៉ូតូដែលទីលានរបស់លោកបានស្វែងរកឃើញជើងខ្លាំងនៅក្នុងពេលនោះ រួមមាន កម្លាំងម៉ូតូប្រភេទ១១០cc, ប្រភេទ១២៥cc, ប្រភេទ១៥០cc និងកម្លាំងធំជាង១៥០ccដែលជាប្រភេទម៉ូតូកែច្នៃ ។
លោកថា នៅក្នុងប្រទេសកម្ពុជាមានអ្នកប្រណាំងម៉ូតូតែ៤កម្រិតដែលបានរៀបរាប់ខាងលើប៉ុណ្ណោះ ចំណែកប្រភេទផ្សេងគឺមិនសូវមានទេ ទើបក្នុងពេលបើកប្រកួតទីលានរបស់លោកសម្រេចយកតែ៤ប្រភេទនោះ ដោយសូម្បីតែអ្នកមកជួលទីលានរបស់លោកប្រណាំងម៉ូតូ ឬហ្វឹកហាត់ជិះម៉ូតូ ក៏ច្រើនតែក្នុងប្រភេទកម្លាំងម៉ូតូដែលបានកំណត់នោះដែរ ។
លោកថា តាំងពីបើកដំណើរការទីលាន លោក និងសហព័ន្ធប្រណាំងម៉ូតូកម្ពុជាទើបតែបានរួមគ្នាបើកការប្រកួតផ្លូវការបានមួយលើកប៉ុណ្ណោះ ដោយលោកប្រកាសថាគ្រោងរៀបចំការប្រកួតជាលើកទី២ និងជាបន្តបន្ទាប់ទៀត ដើម្បីលើកស្ទួយវិស័យប្រណាំងម៉ូតូដែលមិនសូវត្រូវបានមហាជនចាប់អារម្មណ៍ ឱ្យមានសន្ទុះឈានឡើង ។ លោកបានទាំងប្រកាសថា នឹងធ្វើឱ្យទីលាន King Track Circuit ក្លាយជាទីលានប្រណាំងម៉ូតូលំដាប់អន្តរជាតិ ដោយលោកមានគម្រោងពង្រីកឱ្យមានការប្រណាំងម៉ូតូជាទ្រង់ទ្រាយធំក្នុងឆ្នាំ២០១៨នេះផង ។
លោកថា មកទល់ពេលនេះ ទីលានរបស់លោកបានទទួលអ្នកជួលហ្វឹកហាត់មិនក្រោម១០ម៉ូតូនោះទេជារៀងរាល់ថ្ងៃ ដោយលោកបានទាំងចំណាយការរៀបចំប្រកួតរៀងរាល់មួយសប្ដាហ៍ម្ដង មួយខែម្ដង និង៣ខែម្ដងដើម្បីឱ្យមានការលើកទឹកចិត្ត ។
យ៉ាងណាមិញ ក្រោយការប្រកាសដែលត្រូវបានគេឮយ៉ាងបើកចំហរបស់លោក គេបែរជាកត់សម្គាល់ឃើញទីលានរបស់លោកមិនសូវមានសកម្មភាពដូចមុន ។ ធៀបនឹងរយៈពេលនៃការបើកសម្ពោធភ្លាមៗ មកទល់ពេលនេះ គឺសកម្មភាពមានការប្រែប្រួលមិនដូចគ្នាទេ សូម្បីតែអ្នកចូលរួមហ្វឹកហាត់ និងចូលរួមប្រណាំងប្រជែងក៏មិនសូវសស្រាក់សស្រាំដែរ ។
លោក គង់ ធារ៉ា បានអះអាងថា ហេតុផលដែលសកម្មភាពនៅក្នុងទីលានរបស់លោកមិនសូវមានភាពគគ្រឹកគគ្រេងដូចការប្រកាសឡើង គឺដោយសារតែលោកខ្វះដៃគូដើម្បីរៀបចំព្រឹត្តិការណ៍ប្រកួតប្រជែង ហើយខ្វះព្រឹត្តិការណ៍ប្រកួតប្រជែង គឺអ្នកចង់ហ្វឹកហាត់ និងអ្នកចង់ក្លាយជាកីឡាករអាជីពក៏មានការកាត់បន្ថយ។
ប្រភពពីអ្នកធ្លាប់រួមការងារជាមួយលោកគង់ ធារ៉ា បានអះអាងថា ហេតុផលដែលទីលានរបស់លោកមិនមានការប្រកួតធំដុំជាថ្មីក្រោយការដំណើរការ មិនមែនដោយសារតែខ្វះដៃគូនោះទេ ប៉ុន្តែបណ្ដាលមកពីលោកគង់ ធារ៉ា មិនបានចំណាយទុនដាំស្មៅ និងធ្វើអគារដើម្បីឱ្យកីឡាករ និងអ្នកចូលរួមមានទីកន្លែងជ្រកកំដៅ ទើបដៃគូដែលចង់រៀបចំការប្រកួតជាប្រចាំនៅក្នុងទីលានរបស់លោកមិនអាចធ្វើបាន ។ ភាគីខាងម្ចាស់ស្ពុនស័រម្នាក់ទម្លាយថា មុននេះក្រុមហ៊ុនធំមួយបានសម្រេចរៀបចំការប្រណាំងម៉ូតូប្រចាំសប្ដាហ៍ដោយគម្រោងដាក់ផ្សាយនៅលើកញ្ចក់ទូរទស្សន៍MY TV រួចរាល់អស់ហើយ ប៉ុន្តែនៅពេលទាំងទូរទស្សន៍ និងក្រុមដៃគូសម្រេចចិត្តបោះទុន គឺលោក គង់ ធារ៉ា បែរជាសម្រេចចិត្តរំសាយទៅវិញ ។
ប្រភពនោះបន្តថា លោក គង់ ធារ៉ា ប្រកាសរំសាយដោយសារតែហេតុផលអ្នកចាប់ដៃធ្វើកម្មវិធីតម្រូវឱ្យដាក់កីឡាករចូលប្រណាំងដោយមិនប្រកាន់បក្សមិនប្រកាន់ក្រុម ហើយតម្រូវឱ្យលោកគង់ ធារ៉ា បើកទីលានឱ្យកីឡាករដែលត្រូវមានឈ្មោះចូលប្រកួតដោយស្មើភាព ប៉ុន្តែលោកបានច្រានចោល ដោយលោកហាក់មានបំណងដាក់តែឈ្មោះកីឡាករដែលស្ថិតក្នុងក្រុមរបស់លោកឱ្យមានឈ្មោះប្រកួតនៅក្នុងកម្មវិធីនោះច្រើនជាង ខណៈដែលលោកក៏បានច្រានចោលរឿងបើកទីលានដោយស្មើភាព ដើម្បីឱ្យកីឡាករដែលមានឈ្មោះប្រកួតបានហ្វឹកហាត់ ។
ប្រភពនោះបន្តថា ដោយសារតែការចរចាត្រង់ចំណុចនេះ មិនស៊ីសង្វាក់គ្នានេះហើយទើបក្រុមហ៊ុននោះសម្រេចចិត្តមិនបោះទុនបើកកម្មវិធីប្រកួតប្រចាំសប្ដាហ៍នោះវិញ ហើយធ្វើឱ្យទីលានប្រណាំង King Track Circuit ស្ងប់ស្ងាត់សកម្មភាព និងមិនអាចជួយអ្វីបានច្រើនដល់កីឡាករប្រណាំងម៉ូតូនៅទូទាំងប្រទេសដូចការប្រកាសឡើង ។ ប្រភពនោះបន្តថា បើការប្រណាំងម៉ូតូអាចបើកការប្រកួតបានរាល់សប្ដាហ៍ ហើយមានការផ្សាយផ្ទាល់នៅលើកញ្ចក់ទូរទស្សន៍ធំបាន នោះមានន័យថា អ្នកចូលចិត្តប្រណាំងម៉ូតូនឹងបង្ហាញសមត្ថភាពដោយបើកចំហហើយទីលានប្រណាំងម៉ូតូមួយនេះ ក៏ពិតជាមានសកម្មភាពខ្លាំងក្លាជួយដល់វិស័យនេះផងដែរ។
ឆ្លើយតបនឹងករណីនេះ លោក គង់ ធារ៉ា មិនអាចសុំការបញ្ជាក់បានទេ ប៉ុន្តែអ្នកជំនិតរបស់លោកមួយរូបបានអះអាងថា ហេតុផលដែលកម្មវិធីគ្រោងធ្វើនោះរំសាយទៅវិញ គឺបណ្ដាលមកពីក្រុមហ៊ុនដែលចង់បើកព្រឹត្តិការណ៍ចាប់ដៃជាមួយលោកតម្រូវឱ្យលោកចំណាយទុនក្នុងការកែកុននៅលើទីលានច្រើនពេក ក្នុងពេលដែលលោកគិតថាមិនទាន់ចង់បោះទុនសង់នេះសង់នោះបន្ថែមទៀត ក្នុងពេលដែលទីលានមិនទាន់អាចជួយឱ្យលោកបានរកចំណូល។
យ៉ាងណាមិញ ប្រភពនោះបញ្ជាក់ថា បើការប្រកួតធំៗមិនមានលទ្ធភាពក៏ទីលាន King Track Circuit នឹងអាចដំណើរការប្រណាំងម៉ូតូជាទ្រង់ទ្រាយតូចៗដោយមិនចាំបាច់ដល់ថ្នាក់បន្តផ្ទាល់តាមទូរទស្សន៍យូរៗម្ដងតាមភាពជាក់ស្ដែងបានដែរ៕
ចែករំលែកព័តមាននេះ