ខេត្តកំពង់ចាម ៖ ដីនៅភូមិកោះចាស់ ឃុំកោះមិត្ត ស្រុកកំពង់សៀម ដែលមានទឹកទន្លេមេគង្គព័ទ្ធជុំវិញនៅពេលដែលមានស្ពានបេតុងទទឹង៨ម៉ែត្រ និងបណ្តោយ៧៧៩ម៉ែត្រត្រូវបានតភ្ជាប់ហើយនោះ ដីនៅតំបន់នេះនឹងហក់ឡើងថ្លៃខុសពីពេលមុនដល់៥ទៅ៦ដង ហើយក៏មានអាហារដ្ឋានបានបើកសេវាកម្មបម្រើភ្ញៀវទេសចរមួយកន្លែងរួចហើយដែរ ។
ស្ត្រីឈ្មោះ ហេង ស៊ីវម៉ី អាយុ២១ឆ្នាំ ម្ចាស់អាហារដ្ឋានសុជាតាម្លប់កំពីងរាជ(បំពេញរាជ្យ)បានប្រាប់ឲ្យដឹងនៅព្រឹកថ្ងៃទី២៧ មករាថា ពីមុននាងរស់នៅរាជធានីភ្នំពេញដោយបានប្រកបរបរលក់សម្លៀកបំពាក់និងអ្នកធ្វើម្ហូបកម្មង់តាម Online ដែលធ្លាប់បានទៅរៀនធ្វើម្ហូបដល់ខេត្តសុរិន្ទប្រទេសថៃ ។ ស្របពេលដែលនៅខេត្តកំពង់ចាម មានស្ពានបេតុងកាត់ទន្លេមេគង្គពីត្រើយក្រុងកំពង់ចាម មកឃុំកោះមិត្តដែលបានសាងសង់ជិតរួចហើយនោះ មានប្រជាពលរដ្ឋមកពីគ្រប់ទិសទីបាននាំគ្នាជិះម៉ូតូនិងរថយន្តឆ្លងមកលេងបណ្តើរៗហើយ ដែលបង្កើតឲ្យតំបន់នេះក្លាយទៅជាតំបន់ទេសចរណ៍មួយដ៏ទាក់ទាញ ។
ម្ចាស់អាហារដ្ឋានសុជាតាម្លប់កំពីងរាជ ប្រាប់បន្តថា ដោយមើលឃើញតំបន់នេះមានភាពអ៊ូអរនោះទើបសម្រេចចិត្តទិញដីមួយកន្លែង ដែលនៅមិនឆ្ងាយពីក្បាលស្ពាននោះទេដើម្បីបើកអាហារដ្ឋានដែលភ្ញៀវអាចកុម្ម៉ង់មុខម្ហូបដល់ទៅ២០មុខតាមតម្រូវការ ។ ហាងគាត់ទើបតែបើកដំណើរការ១សប្តាហ៍មកនេះ គឺរាល់ថ្ងៃមានពលរដ្ឋមកចូលហូបទាំងព្រឹកល្ងាចតម្លៃវិញក៏លក់ធូរថ្លៃថែមទៀត បើសិនជាមានការគាំទ្រច្រើនពីសំណាក់ភ្ញៀវមកពីគ្រប់ទិសទីនោះ ក្នុងពេលខាងមុខនឹងពង្រីកអាហារដ្ឋានឲ្យបានធំជាងនេះបន្ថែមទៀត ។
លោកតា ទាង ហេង អាយុ៧៣ឆ្នាំ នៅភូមិកោះចាស់ ឃុំកោះមិត្ត ស្រុកកំពង់សៀម បានប្រាប់ថា កាលពីក្នុងអំឡុងឆ្នាំ២០១០ ដីនៅភូមិរបស់គាត់មានតម្លៃថោកទេ ក្នុង១ប្លង់តម្លៃតែជាង១តម្លឹងមាសប៉ុណ្ណោះ តែចាប់ពីពេលដែលប្រមុខរាជរដ្ឋាភិបាលកម្ពុជាបានប្រកាសផ្តល់ស្ពានបេតុងកាត់ទន្លេមេគង្គពីត្រើយក្រុងកំពង់ចាមមកកោះមិត្ត ដីក៏បានចាប់ផ្តើមហក់ឡើងបន្តិចម្តងៗ មកទល់សព្វថ្ងៃនេះតម្លៃខុសពីមុនពី៥ទៅ៦ដង ហើយតែងតែមានឈ្មួញដើរទិញដីអ្នកភូមិសម្រាប់ធ្វើគម្រោងផ្សេងៗ និងខ្លះទៀតទិញសម្រាប់លក់បន្តដូចជាដីរបស់គាត់មានទំហំក្បាល២០ម៉ែត្របណ្តោយ២៣០ម៉ែត្រ មិនទាន់មានគោលការលក់នោះទេ គឺទុកសម្រាប់ចែកឲ្យកូនៗ៣នាក់ ។
លោក ស៊ាន សុគុណ ប្រធានមន្ទីរទេសចរណ៍ខេត្តវិញបានឲ្យដឹងដែរថា តាមគោលការណ៍របស់លោក គួច ចំរើន អភិបាលខេត្ត លោកនឹងធ្វើឲ្យកោះមិត្តនេះទៅជាតំបន់អេកូទេសចរណ៍ធម្មជាតិ ដែលផ្តល់អត្ថប្រយោជន៍ ក្នុងការលើកកម្ពស់ជីវភាពរស់នៅ រួមចំណែកកាត់បន្ថយភាពក្រីក្ររបស់ប្រជាពលរដ្ឋ ។ ក្នុងឆ្នាំ២០១៨នេះផ្លូវបេតុងមានខ្វាត់ខ្វែងស្ទើរតែទាំងអស់ងាយស្រួលដល់ភ្ញៀវជាតិ និងអន្តរជាតិធ្វើដំណើរទៅលេងកម្សាន្ត។ ស្ពាននេះជាអំណោយដ៏ថ្លៃថ្លារបស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាផងដែរ ៕
ចែករំលែកព័តមាននេះ