រាជធានីភ្នំពេញ ៖ ប្រជាពលរដ្ឋដែលទៅអូសកំប្លោក និងបង់សំណាញ់យកត្រីធ្វើម្ហូបនៅក្នុងអូរមួយកន្លែង ជិតភូមិរបស់គាត់ ដែលអូរនោះឈ្មោះអូរ តាគឹម បានទទួលរងនូវការភ័យខ្លាចស្ទើរលស់ព្រលឹង និងរត់បាតជើងសព្រាត បន្ទាប់ពីបានប្រទះឃើញសត្វក្រពើដ៏ធំ១ក្បាល ហេតុការណ៍ប្រទះឃើញសត្វក្រពើនោះកាលពីវេលាព្រឹកថ្ងៃទី២៨ ខែមករានេះ នៅក្នុងអូរតាគឹម ស្ថិតនៅជាប់និងដីលោកហែម ដារិទ្ធិ ភិបាលខណ្ឌពោធិ៍សែនជ័យ មុខវត្តទាន់អរ ក្នុងភូមិឪឡោក សង្កាត់ឪឡោក ខណ្ឌពោធិ៍សែនជ័យ រាជធានីភ្នំពេញ ។
ប៉ុន្តែទើបមានការភ្ញាក់ផ្អើល និងដឹងដល់អាជ្ញាធរសង្កាត់ និងខណ្ឌនាវេលាម៉ោង១១ព្រឹកថ្ងៃទី៣០ ខែមករា នេះ ។ អាជ្ញាធរបានឲ្យប្រជាការពារភូមិនាំអ្នកជំនាញខាងចាប់ក្រពើចុះទៅ ដើម្បីចាប់ក្រពើនោះយកទៅដាក់នៅសួនសត្វផងដែរ ។ នេះគឺជាក្រពើទី៤ហើយ ដែលបង្ហាញខ្លួននៅក្នុងទឹកអូរនោះ បន្ទាប់ពីកូនក្រពើ៣ក្បាលចាប់បានមុន ដែលត្រូវបានអ្នកនេសាទត្រីចាប់បានជាបន្តបន្ទាប់ ។
អ្នកភូមិបាននិយាយថា កាលពី២ថ្ងៃមុន ចំថ្ងៃអាទិត្យមានបុរសម្នាក់ដែលជាកម្មកររោងចក្រកាត់ដេរ ឆ្លៀតពេលទំនេរពីការងារ១ថ្ងៃ បានចេញពីផ្ទះទៅបង់សំណាញ់ និងអូសកំប្លោកនៅក្នុងអូរនោះ ដើម្បីយកត្រីធ្វើម្ហូប ។ ខណៈនោះស្រាប់តែបានប្រទះឃើញក្រពើ១ក្បាលធំបានបង្ហាញខ្លួន និងបានប្រើកន្ទុយរបស់វា វាយទឹកលាន់សូរគ្រាំៗបែកទឹកខ្ចាយ ព្រមទាំងហែលបោះពួយប្រុងចាប់បុរសនោះធ្វើចំណី ប៉ុន្តែពេលនោះ គាត់បានរត់ឡើងគោកទាន់ ។
ប្រភពដដែលបានបន្តទៀតថា ខណៈនោះបុរសខាងលើបានរត់ចោលសំណាញ់ និងទៅប្រាប់អ្នកភូមិឲ្យទៅមើលម្ដងមកហើយ ប៉ុន្តែអត់បានរាយការណ៍ជូនអាជ្ញាធរឡើយ ។ រឿងនោះត្រូវបានពួកគាត់នាំគ្នានិយាយពីមាត់មួយទៅមាត់មួយទៀត ហើយ២ថ្ងៃក្រោយមកទើបដឹងដល់អាជ្ញាធរមានការភ្ញាក់ផ្អើលជាថ្មីបែបនេះតែម្ដង ។
ប្រភពខាងលើបានបន្តថា អូរតាគឹមនេះ គឺជាអូរដែលមានតាំងពីយូរយារណាស់មកហើយ មិនមែនអូរទើបកើតថ្មីនោះឡើយ ដែលបានតភ្ជាប់ពីអូរដែលចេញពីក្នុងភូមិសាស្ត្រខេត្តកំពង់ស្ពឺ ។ ហើយហូរធ្លាក់ទៅដល់អូរត្រពាំងអណ្ដើក ទៅដល់បឹងតាមោក ហើយកាលពីដើមឡើយមានកន្លែងខ្លះរាក់ និងកន្លែងខ្លះជ្រៅ ប៉ុន្តែកាលពី២ឆ្នាំមុន ត្រូវបានគេស្ដារដោយគ្រឿងចក្រ មានជម្រៅដល់ទៅ២ប្រម៉ោយអេស្កាវ៉ាទ័រឯណោះ ហើយតាំងពីដើមរៀងមកអូរនេះ មានទឹកខួបវស្សា ខួបប្រាំងមិនដែលរីងដាច់ឡើយ ។
អ្នកភូមិដដែលបាននិយាយទៀតថា រាប់សិបឆ្នាំមកហើយពួកគាត់មិនដែលឃើញមានក្រពើនៅក្នុងអូរនោះទេ និងបានចុះងូតទឹកអូរទាំងក្មេងទាំងចាស់ព្រមទាំងនេសាទត្រីជាហូរហែរមកហើយ មិនដែលជួបក្រពើទេ ទើបតែនៅចុងឆ្នាំ២០១៧ និងដើមឆ្នាំ២០១៨នេះទេ ដែលបានបានឃើញក្រពើនៅក្នុងអូរនេះ ។ ប៉ុន្តែជាកូនក្រពើដែលចាប់លើកមុនបាន២ក្បាលមានទំហំដងខ្លួនប៉ុនភ្លៅមនុស្សចាស់ ។ លុះដល់ចុងក្រោយកាលពី១អាទិត្យមុន អ្នកភូមិទួលលៀប ខណ្ឌពោធិ៍សែនជ័យ ចាប់បាន១ក្បាលទៀត ដែលមានទម្ងន់១៣គីឡូក្រាម ហើយក្រពើទាំងនោះត្រូវបានគេយកទៅលក់អស់ហើយ និងសង្ស័យថា ជាកូនក្រពើធំ១ក្បាលនេះ ។
ដោយឡែកអាជ្ញាធរសង្កាត់ និងខណ្ឌខាងលើបន្ទាប់ពីបានទទួលព័ត៌មាននោះបានឲ្យកម្លាំងប្រជាការពារ និងយកអ្នកជំនាញខាងចាប់ក្រពើម្នាក់ទៅដើម្បីចាប់ក្រពើនោះ យកទៅដាក់នៅសួនសត្វបញ្ចៀសគ្រោះថ្នាក់ដល់ប្រជាពលរដ្ឋ និងសត្វពាហនៈរបស់ពួកគាត់ផងដែរ ។ ប៉ុន្តែពេលទៅដល់ដើររកជាង១ម៉ោងមិនបានឃើញក្រពើបង្ហាញខ្លួននោះឡើយ ទើបដកថយសិនរង់ចាំវាបង្ហាញខ្លួនជាថ្មីនៅពេលក្រោយទៀត ។ ចំណែកអាជ្ញាធរក៏បានធ្វើការអំពាវនាវសុំឲ្យបងប្អូនប្រជាពលរដ្ឋមានការប្រុងប្រយ័ត្នផងដែរ ហាមកុំឲ្យកូមចៅទៅងូតទឹកទីនោះឲ្យសោះ រង់ចាំចាប់ក្រពើចេញសិន ៕
ចែករំលែកព័តមាននេះ