ខេត្តកណ្តាល ៖ បុរសម្នាក់បានដាច់ខ្យល់ស្លាប់ភ្លាមមួយរំពេច និងស្ត្រី២នាក់ទៀតបានរងរបួសស្រាលក្នុងករណីគ្រោះថ្នាក់ចរាចរ រវាងរថយន្ត និងម៉ូតូ កាលពីវេលាម៉ោង០៤និង៣០នាទីល្ងាច ថ្ងៃទី២៩ ខែមករា ឆ្នាំ២០១៨ ចន្លោះគីឡូម៉ែត្រលេខ ៣៧-៣៨ ស្ថិតក្នុងភូមិព្រែកតាកែវ ឃុំសំរោងធំ ស្រុកកៀនស្វាយ ខេត្តកណ្តាល ។
ជនរងគ្រោះទាំង៣នាក់ ទី១.ឈ្មោះ គិត សារ៉ុង ភេទប្រុស អាយុ ៣៧ឆ្នាំ ជនជាតិខ្មែរ មុខរបរកសិករ មានទីលំនៅភូមិខ្ពប ឃុំព្រែកសំបូ ស្រុកពាមជរ័ ខេត្តព្រៃវែង ជាអ្នកបើកបរម៉ូតូម៉ាកស្មាស់វី ពណ៌ខ្មៅ ពាក់ស្លាកលេខ ភ្នំពេញ ១AV-០០៨៨ បានស្លាប់នៅនឹងកន្លែង ។ ទី២.ឈ្មោះ គង់ សាវី ភេទស្រី អាយុ២៨ឆ្នាំ ជនជាតិខ្មែរ មុខរបរកសិករ មានទីលំនៅភូមិឃុំជាមួយអ្នកស្លាប់ (រួមដំណើរពីក្រោយ) បានរងរបួសស្រាល ។ និងទី៣.ឈ្មោះ ឃិន ស្រេង ភេទស្រី អាយុ២៤ឆ្នាំ ជនជាតិខ្មែរ មុខរបរកសិករ មានទីលំនៅភូមិសំរោង ឃុំទ្រា ស្រុកសំរោង ខេត្តតាកែវ ជាអ្នករួមដំណើរពីក្រោយដែរ បានរងរបួសស្រាល ត្រូវបានគេយកទៅព្យាបាលនៅមណ្ឌលសុខភាពសំរោងធំ ទាំង២នាក់ ។
ចំណែករថយន្តម៉ាកសាំងយ៉ុង ពណ៌លឿង ពាក់ស្លាកលេខ ភ្នំពេញ ២AF-៧០៨៦ បើកបរដោយឈ្មោះ ផាន សម្បត្តិ ភេទប្រុស អាយុ៤៦ឆ្នាំ ជនជាតិខ្មែរ មុខរបរបើកបរ មានទីលំនៅភូមិពោន ឃុំទឹកថ្លា ស្រុកស្វាយអន្ទរ ខេត្តព្រៃវែង ត្រូវពលរដ្ឋឃាត់ខ្លួនប្រគល់ឲ្យសមត្ថកិច្ចប៉ុស្តិ៍សំរោងធំ សួរនាំ ។
ប្រភពនិយាយថា មុនពេលកើតហេតុ គេឃើញជនរងគ្រោះទាំង៣នាក់ជិះម៉ូតូ១គ្រឿងឌុបគ្នាក្នុងទិសដៅពីអ្នកលឿងទៅភ្នំពេញ ។ លុះមកដល់ចំណុចខាងលើបានបើកវ៉ាជែងជាមួយម៉ូតូ១គ្រឿងទៀតមិនស្គាល់ម៉ាក ដែលកំពុងបើកបរស្របគ្នា ។ ប៉ុន្តែមិនដឹងជាយ៉ាងម៉េចបានជាម៉ូតូជនរងគ្រោះដួលខ្ទាតបុរសអ្នកបើកបរជាមួយម៉ូតូទៅខាងធ្វេងដៃ ស្របពេលរថយន្តបើកបរទិសដៅផ្ទុយគ្នា (ភ្នំពេញ-អ្នកលឿង) មកដល់បណ្តាលឲ្យកិនជនរងគ្រោះស្លាប់តែម្តង ។ ឬឯស្ត្រី២នាក់ទៀតដែលរួមដំណើរពីក្រោយសំណាងល្អធ្លាក់មកខាងស្តាំដៃរងរបួសស្រាល ។
ក្រោយទទួលបានព័ត៌មាន កម្លាំងជំនាញ នៃអធិការដ្ឋាននគរបាលស្រុកកៀនស្វាយសហការណ៍ជាមួយកម្លាំងនគរបាលប៉ុស្តិ៍ចុះអន្តរាគមន៍ធ្វើការវាស់វែងចាត់ការតាមនីតិវិធី ។ ឬឯសព្វប្រគល់ជូនក្រុមគ្រួសារដឹកយកទៅធ្វើបុណ្យតាមប្រពៃណី ។ ករណីនេះ នគរបាលជំនាញបានសន្និដ្ឋានថា បង្ក ឡើងដោយការធ្វេសប្រហែសរបស់អ្នកបើកបរម៉ូតូ បើកជែងមិនបានពិនិត្យមើលស្ថានភាពផ្លូវគ្រប់ជ្រុងជ្រោយ បំពានទៅលើចំណែកផ្លូវ នៃយានមកពីទិសដៅផ្ទុយ ៕
ចែករំលែកព័តមាននេះ