ខេត្តកំពង់ឆ្នាំង ៖ យុវជនម្នាក់បានរងរបួសធ្ងន់ដោយសាររថយន្តមួយគ្រឿងមិនស្គាល់ម៉ាកបើកកៀរកាលពីវេលាម៉ោង៧និង១៥នាទីព្រឹកថ្ងៃទី១០ ធ្នូ នៅតាមបណ្តោយផ្លូវជាតិលេខ៥ក្នុងចន្លោះគីឡូម៉ែតលេខ៦៤-៦៥ ត្រង់ចំណុចភូមិធ្លកយល់ ឃុំតាជេស ស្រុកកំពង់ត្រឡាច ខណៈដែលជនរងគ្រោះជិះម៉ូតូត្រឡប់ទៅផ្ទះ ។
តាមការរៀបរាប់របស់ជនរងគ្រោះឈ្មោះម៉ៅ សារ៉ាន់ អាយុ១៧ឆ្នាំ មានទីលំនៅភូមិប្អេរ សង្កាត់ប្អេរ ក្រុងកំពង់ឆ្នាំង បានឱ្យដឹងថា មុនពេលកើតហេតុរូបគាត់ជិះម៉ូតូម៉ាកវ៉េវ ពណ៌ខ្មៅ ចេញពីព្រែក្តាបទៅផ្ទះនៅកំពង់ឆ្នាំងវិញ តាមបណ្តោយផ្លូវជាតិលេខ៥ក្នុងទិសដៅពីត្បូងទៅជើង លុះមកដល់ចំណុចកើតេហតុស្រាប់តែមានរថយន្តពុំស្គាល់ម៉ាកមួួយគ្រឿងបើកមកពីក្រោយ ហើយបានបើកកៀររូបគាត់បណ្តាលឱ្យធ្លាក់ពីថ្នល់ជាតិដួលរងរបួសតែម្តង ។
មន្ត្រីនគរបាលស្រុកកំពង់ត្រឡាចបាននិយាយថា ជនរងគ្រោះជិះម៉ូតូគ្មានពាក់ពួកការពារសុវត្ថិភាពទើបបណ្តាលឱ្យរងរបួសផ្នែកក្បាលធ្ងន់ធ្ងរបែបនេះ ។ ប៉ូលិសបានជួយហៅរថយន្តសង្គ្រោះដឹកទៅព្យាបាលទៅមណ្ឌលសុខភាពស្រុកកំពង់ត្រឡាច ៕
ចែករំលែកព័តមាននេះ