រាជធានីភ្នំពេញ ៖ បន្ទាប់ពីខណ្ឌធំៗដែលជាតំបន់ពាណិជ្ជកម្មកណ្តាលទីក្រុង ខណ្ឌសែនសុខ កំពុងតែមានភាពលេចធ្លោជាងគេចាប់ពីដើមឆ្នាំ២០១៧កន្លងមកនេះ ដោយសារលក្ខខណ្ឌល្អប្រសើរមួយចំនួន ។
ខណ្ឌធំៗទាំង៤នៅកណ្តាលរាជធានីភ្នំពេញ រួមមាន ខណ្ឌចំការមន ដូនពេញ ៧មករា និងខណ្ឌទួលគោក គឺជាតំបន់សម្បូរទៅដោយមជ្ឈមណ្ឌលពាណិជ្ជកម្ម ប៉ុន្តែបច្ចុប្បន្ន ខណ្ឌសែនសុខកំពុងតែលេចធ្លោបន្ថែមទៀត ។
ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោកបណ្ឌិត គីម ហ៊ាង បានមានប្រសាសន៍នាព្រឹកថ្ងៃទី២៦ មករា ថា ខណ្ឌសែនសុខ ពិតជារីកចម្រើនលឿន ដោយសារមានមជ្ឈមណ្ឌលពាណិជ្ជកម្ម និងលំនៅឋានជាច្រើនបានវិនិយោគនៅតំបន់នោះ ។ ខណ្ឌនេះមានលក្ខខណ្ឌអំណោយផលល្អ ដូចជា ៖ ១-ហេដ្ឋារចនាសម្ព័ន្ធកំពុងអភិវឌ្ឍន៍ និងមានភាពល្អប្រសើរ, ២-សណ្ឋានដីល្អ មិនចាំបាច់ចំណាយលើការចាក់ដីសម្រាប់អភិវឌ្ឍន៍ និង៣-ជាតំបន់គ្មានការបំពុល ដោយសារតំបន់នេះគ្មានរោងចក្រ សហគ្រាសនានាឡើយ ។
លោកបន្តថា ៖« លក្ខខណ្ឌអំណោយផលទាំងនេះ បានធ្វើឲ្យខណ្ឌសែនសុខសមស្របសម្រាប់ការអភិវឌ្ឍគម្រោងលំនៅឋាននានា ជាពិសេស លំនៅឋានសម្រាប់អ្នកមានប្រាក់ចំណូលមធ្យម » ។
បច្ចុប្បន្ន ខណ្ឌសែនសុខ មានក្រុមហ៊ុនវិនិយោគបុរី និងគម្រោងលំនៅឋាននានាប្រមាណ២០ ដែលបាននិងកំពុងវិនិយោគនៅក្នុងតំបន់នោះ ។ មជ្ឈមណ្ឌលពាណិជ្ជកម្មលំដាប់អន្តរជាតិមួយចំនួនទៀតបានបើកដំណើរការដូចជា ផ្សារបោះដុំ MAKRO, AEON Mall2 និងផ្សារទំនើបមួយចំនួនទៀតនឹងបើកនៅក្នុងឆ្នាំនេះ ។
ប្រធានសមាគមអ្នកអភិវឌ្ឍន៍លំនៅឋានកម្ពុជា លោកឧកញ៉ា លី ហួរ ដែលទើបបានបើកសម្ពោធគម្រោងទី៨នៃបុរីវិមានភ្នំពេញ នៅលើផ្ទៃដីប្រមាណ២០ហិកតា បានមានប្រសាសន៍ថា ខណ្ឌសែនសុខពិតជារីកចម្រើនលឿន ដោយសារមានគម្រោងអភិវឌ្ឍន៍ជាច្រើនបាននិងកំពុងវិនិយោគនៅតំបន់នេះ ។ ហេតុនេះ ទើបលោកបាននិងកំពុងវិនិយោគសាងសង់បុរីនៅតំបន់នេះ ខណៈទីផ្សារបុរីបន្តល្អប្រសើរ ដោយអត្រាលក់នៅតែមានកំណើនខ្ពស់ ។
លោកបន្តថា ៖« ហេដ្ឋារចនាសម្ព័ន្ធល្អប្រសើរ ការមិនបំពុលពីផ្សែងរោងចក្រ សហគ្រាសនានា និងកត្តាសណ្ឋានដីល្អប្រសើរ គឺជាកត្តាជំរុញល្បឿនអភិវឌ្ឍន៍នៅតំបន់នេះ»។
លោកឧកញ៉ា ចេង ខេង ប្រធានក្រុមប្រឹក្សាភិបាលនៃក្រុមហ៊ុនអចលនទ្រព្យ Hutton CPL បានលើកឡើងស្រដៀងគ្នាថា ការអភិវឌ្ឍហេដ្ឋារចនាសម្ព័ន្ធ ភោជនីយដ្ឋានទំនើបៗ និងហាងកាហ្វេឆ្ងាញ់ៗជាច្រើនបានចូលទៅតំបន់នេះ គឺបានធ្វើឲ្យតម្លៃដីធ្លីនៅតាមតំបន់លំនៅឋាន ដែលពីមុនមានតម្លៃត្រឹមចន្លោះពី៦០ទៅ៩០ដុល្លារ កើនឡើងដល់៣០០ទៅ៤០០ដុល្លារនាពេលបច្ចុប្បន្ននេះ ជាពិសេស ដីនៅជុំវិញតំបន់ផ្សារទំនើប AEON និង Mall2 ពីមុនមានតម្លៃត្រឹម៤០០ទៅ៥០០ដុល្លារ ប៉ុន្តែបច្ចុប្បន្ន បានកើនដល់១.០០០ទៅ១.២០០ដុល្លារអាមេរិកក្នុង១ម៉ែត្រការ៉េ ។
លោកបន្តថា ៖« តំបន់នេះមានការរីកចម្រើនសមស្របនឹងស្ថានភាពជាក់ស្តែង និងសក្តានុពលក្នុងតំបន់ ហើយកំណើនប្រជាសាស្ត្រក៏បានកើនឡើងខ្ពស់ផងដែរ » ៕
ចែករំលែកព័តមាននេះ