ខេត្តបន្ទាយមានជ័យ ៖ បុរសម្នាក់ តែងធ្វើបាបកូនសុំទាននៅតាមហាងលក់ដូរ ក៏ដូចជាទីតាំងលក់សំបុត្ររថយន្តក្រុង ហើយត្រូវគេថតបានពីសកម្មភាពវាយធ្វើបាបកូនតូច យកមកបង្ហោះតាមបណ្តាញសង្គមយ៉ាងព្រោងព្រាតនោះ ក៏ត្រូវបានសមត្ថកិច្ចតាមប្រមាញ់ចាប់ខ្លួន ដើម្បីយកមកសួរនាំ …
ខេត្តបន្ទាយមានជ័យ ៖ បុរសម្នាក់ តែងធ្វើបាបកូនសុំទាននៅតាមហាងលក់ដូរ ក៏ដូចជាទីតាំងលក់សំបុត្ររថយន្តក្រុង ហើយត្រូវគេថតបានពីសកម្មភាពវាយធ្វើបាបកូនតូច យកមកបង្ហោះតាមបណ្តាញសង្គមយ៉ាងព្រោងព្រាតនោះ ក៏ត្រូវបានសមត្ថកិច្ចតាមប្រមាញ់ចាប់ខ្លួន ដើម្បីយកមកសួរនាំ ។ បុរសជាឪពុកវាយធ្វើបាបកូន ឈ្មោះចាន់ ធី អាយុ៣៤ឆ្នាំ ស្នាក់នៅនៅម្តុំផ្លូវរថភ្លើង ក្នុងភូមិអូរជ្រៅ សង្កាត់ប៉ោយប៉ែត ក្រុងប៉ោយប៉ែត ។
ជាក់ស្តែង ខណៈដែលកំពុងដឹកដៃកូនសុំទានតាមផ្លូវជាតិ គ្រាន់តែក្រឡេកឃើញសមត្ថកិច្ចឈប់រថយន្តភ្លាម ក៏បានស្រែកថា «ប៉ូលិសមកហើយ ឆាប់រត់កូន» ។ ហើយបុរសនោះ បានរត់លឿនបត់បែនតាមផ្ទះអ្នកស្រុក ចោលកូនបាត់ស្រមោល កើតឡើងនាព្រឹកថ្ងៃទី២៦ មករា ២០១៨ ។ ប៉ុន្តែសមត្ថកិច្ច បាននាំកូនប្រុសម្នាក់មានអាយុ៣ឆ្នាំកំពុងស្រែកយំ នាំទៅផ្ទះដែលស្នាក់ ។
សមត្ថកិច្ចបានទៅដល់ផ្ទះតូចមួយ ដែលមានស្ត្រីម្នាក់ ឈ្មោះតាប់ ហេង ត្រូវជាប្រពន្ធបុរសគេចខ្លួន បានប្រាប់សមត្ថកិច្ចឱ្យដឹងថា គាត់ដើររើសអេតចាយ ជាមួយកូនច្បងអាយុ៧ឆ្នាំទាំងយប់ទាំងថ្ងៃ ។ ឯប្តីដើរសុំទានគេជាង១០ឆ្នាំហើយ ។ ពីមុនទៅជាមួយកូនច្បង លើកនេះទៅជាមួយកូនទី២ ខណៈកូនទី៣ពរជាប់ចង្កេះ ហើយមានផ្ទៃ១ខែថែមទៀត ។ គាត់បន្តថា មិនឱ្យប្តីសុំទានបែបជម្រិត ឬនិយាយអ្វីអាក្រក់ទេ ព្រោះសមត្ថកិច្ចធ្លាប់ចាប់អប់រំហើយ តែប្តីមិនស្តាប់ ។
ក្រឡេកមើលបន្ទប់ស្នាក់នៅរបស់គ្រួសារសុំទានមួយនេះ ពិបាកភ្នែកមើលណាស់ ហ៊ុំព័ទ្ធទៅដោយស័ង្កសីប៉ុន្តែសំរាម និងអេតចាយពេញក្នុងបន្ទប់ រហូតក្រោមគ្រែ ។ ពេលសួរនាំស្ត្រីជាប្រពន្ធថា កូនមិនបានរៀនសូត្រនឹងគេទេ ព្រោះជីវភាពក្រពេក ។
លោកអនុសេនីយ៍ឯក ឱក សំណុក អនុប្រធានការិយាល័យប្រឆាំងការជួញដូរមនុស្ស និងការពារអនីតិជននៃស្នងការដ្ឋាននគរបាលខេត្តប្រាប់ថា បន្ទាប់ពីមានហ្វេសប៊ុកសរសេររិះគន់ពីបុរសខាងលើដឹកដៃកូនសុំទានបែបប្រើកំលាំងពលកម្ម និងធ្វើបាបកូននោះ លោកឧត្តមសេនីយ៍ទោអាត់ ខែម ស្នងការនគរបាលខេត្តបានដាក់បទបញ្ជាចុះពិនិត្យមើល និងឱ្យរកបុរសនោះ យកទៅសួរនាំ តែមិនទាន់បានហៅផង ស្រាប់តែរត់គេចខ្លួនបាត់ ។ ពេលនេះ សមត្ថកិច្ចបានទាក់ទងខាងមន្ត្រីមន្ទីរសង្គមកិច្ច និងស្ត្រីជាម្តាយនិងក្មេងៗទាំង៣យកទៅសាកសួរ ដើម្បីពិនិត្យមើលលផ្លូវច្បាប់។
ចែករំលែកព័តមាននេះ