ខេត្តបន្ទាយមានជ័យ ៖ ក្រុមតន្ត្រីសម័យ៥នាក់ត្រូវជនសង្ស័យមួយក្រុមជិះម៉ូតូតាមព្រួតវាយ និងគប់ដុំថ្មខ្លះរបួសផ្ទៃមុខ ខ្លះរបួសដងខ្លួន បង្កការភ្ញាក់ផ្អើលនៅភូមិដុងអារញ្ញា សង្កាត់និមិត្ត ក្រុងប៉ោយប៉ែត កាលពីវេលាម៉ោងជាង៤រសៀល ថ្ងៃទី២៦…
ខេត្តបន្ទាយមានជ័យ ៖ ក្រុមតន្ត្រីសម័យ៥នាក់ត្រូវជនសង្ស័យមួយក្រុមជិះម៉ូតូតាមព្រួតវាយ និងគប់ដុំថ្មខ្លះរបួសផ្ទៃមុខ ខ្លះរបួសដងខ្លួន បង្កការភ្ញាក់ផ្អើលនៅភូមិដុងអារញ្ញា សង្កាត់និមិត្ត ក្រុងប៉ោយប៉ែត កាលពីវេលាម៉ោងជាង៤រសៀល ថ្ងៃទី២៦ មករា ២០១៨នេះ សង្ស័យខឹងរឿង សុំតម៉ោងមិនបានក្នុងពិធីមង្គលការមួយ។ ក្នុងចំណោមជនរងគ្រោះទាំង៥នាក់ គេស្គាល់អត្តសញ្ញាណ ២នាក់ ១.ឈ្មោះ ម៉ៃ ចាន់ថា ភេទប្រុស អាយុ៣៨ឆ្នាំ របួសក្រោមភ្នែកខាងស្តាំ (ម្ចាស់តន្ត្រីសម័យ ម៉ៃចាន់ថា) និង.ឈ្មោះ សៅ លី ភេទប្រុស អាយុ២៣ឆ្នាំ ជាសាច់ញាតិជនរងគ្រោះខាងលើ ហើយអ្នកទាំង២មានទីលំនៅភូមិអណ្តូងថ្មមាស សង្កាត់ផ្សារកណ្តាល ក្រុងប៉ោយប៉ែត។ ជនរងគ្រោះទី១ប្រាប់តាមទូរស័ព្ទថា គ្រួសារមួយនៅក្នុងភូមិកើតហេតុគេរៀបអាពាហ៍ពិពាហ៍ ហើយបានជួលក្រុមតន្ត្រីគាត់ទៅលេងដោយកំណត់ត្រឹមម៉ោង៣រសៀលបញ្ឈប់។ បុរសដដែលបន្តថា លុះដល់ម៉ោងកំណត់ម្ចាស់កម្មកវិធីគេសុំតម៉ោង ១ឬ២ម៉ោងថែមទៀត លុះគាត់មិនតឲ្យព្រោះរវល់ជាប់ទៅ លេងមួយកន្លែងទៀតនៅល្ងាចថ្ងៃដដែលក្នុងទីប្រជុំជនប៉ោយប៉ែត ស្រាប់តែមានអ្នកចង់រករឿងដោយនាំ គ្នាឡើងលោតរហូតបាក់ឆាកតន្ត្រីគាត់អស់១ផ្ទាំង។
ជនរងគ្រោះបន្តថា ដើម្បីបញ្ចៀសបញ្ហាគាត់ហាម ក្រុមភ្លេងមិនឲ្យមាត់ទេ ដោយឲ្យនាំគ្នារើឆាកដាក់លើរថយន្ត។ គាត់បន្តថា ក្រោយរៀបចំឧបករណ៍ និងឆាកដាក់លើរថយន្តរួចរាល់គាត់ក៏បើករថយន្តចេញមិនទាន់បាន២០០ម៉ែត្រផង ស្រាប់តែមានជនសង្ស័យជាច្រើននាក់បើកម៉ូតូតាមពីក្រោយប្រដាប់ដោយដំបង និងដុំថ្មមកព្រួតវាយ និងគប់ក្រុមភ្លេងរបស់គាត់៤នាក់ជិះម៉ូតូ៣គ្រឿងតាមក្រោយរថយន្ត។ គាត់ថាដំបូងគេវាយចំជនរងគ្រោះ ឈ្មោះ សៅ លី ១ដំបងចំត្រគៀកធ្លាក់ពីលើម៉ូតូ ហើយក្រុមបង្កនាំគ្នាព្រួតវាយទាត់ធាក់ លុះគាត់មើលតាមកញ្ចក់មើលក្រោយឃើញ ក៏ឈប់រថយន្តចុះទៅជួយ ដឹងអីក្រុមជនសង្ស័យមកទាញដែកលើរថយន្តរបស់គាត់វាយគាត់ឲ្យរបួសក្រោមភ្នែកខាងស្តាំថែមទៀត។
ដោយសារឃើញសភាពការណ៍មិនស្រួល ក៏លើកជនរងគ្រោះឈ្មោះ សៅ លី ដាក់លើរថយន្ត និងប្រាប់អ្នកផ្សេងឲ្យបើកម៉ូតូរត់រួមទាំងគាត់បើករថយន្តរត់ផងដែរ។ នៅពេលគាត់បើករថយន្តរត់ ក្រុមជនសង្ស័យតាមវាយបែកកញ្ចក់រថយន្តផ្នែកខាងមុខ និងបែកកញ្ចក់មើលក្រោយ។ ក្រុមជនរងគ្រោះប្រាប់ថា ក្រោយហេតុការណ៍កើតឡើងគាត់បានដាក់ពាក្យបណ្តឹងក្រុមបង្ករួចហើយនៅប៉ុស្តិ៍នគរបាលរដ្ឋបាលសង្កាត់និមិត្ត ដើម្បីឲ្យជួយរកយុត្តិធម៌ និងចាប់ជនសង្ស័យយកផ្តន្ទាទោសតាមច្បាប់។ ជុំវិញករណីចោទប្រកាន់នេះម្ចាស់កម្មវិធីមង្គលការមិនអាចទាក់ទងសុំបំភ្លឺបានទេព្រោះមិនស្គាល់លេខទូរស័ព្ទ។ លោក ម៉ារិន នាយប៉ុស្តិ៍នគរបាលរដ្ឋបាលសង្តាត់និមិត្ត ប្រាប់តាមទូរស័ព្ទថា ករណីខាងលើពិតជាកើតមានមែន ហើយថាករណីនេះសមត្ថកិច្ចកំពុងដុតដៃដុតជើងចុះស្រាវជ្រាវហើយ៕
https://youtu.be/hpDRrdXJXNU
ចែករំលែកព័តមាននេះ