ខេត្តបន្ទាយមានជ័យ ៖ ដោយសាររបរលក់លៀសហាលបានចំណូលជាមធ្យម៤០០០០រៀលក្នុង១ថ្ងៃ អ្នកភូមិមួយនៅក្រុងប៉ោយប៉ែតបានប្រកបរបរលក់លៀសហាល ។ ដូច្នេះហើយអ្នកស្រុកច្រើនហៅថា«ភូមិលក់លៀស»។ ភូមិលក់លៀស ស្ថិតនៅខាងត្បូងជាប់របងសាលាបឋមសិក្សាអូរជ្រៅ ភូមិបាលិលេយ្យ២ សង្កាត់ប៉ោយប៉ែត ក្រុងប៉ោយប៉ែត ។
រទេះលក់លៀសហាលជាច្រើនចតត្រៀបត្រានៅរៀងរាល់ពេលល្ងាចខណៈម្ចាស់វិលត្រឡប់ពីរុញលក់វិញ ។ ប៉ុន្តែរៀងរាល់ពេលព្រឹកលើរទេះទាំងនោះពោរពេញដោយលៀសដែលផ្សំគ្រឿងរួច ។
មុខរបរលក់លៀសហាលបើមិនមានការរំខានពីភ្លៀងទេ អ្នកលក់ទាំងនោះឱ្យដឹងកាលពីពេល ថ្មីៗកន្លងមកថា ពួកគាត់លក់ដាច់អស់ជានិច្ច ។ គ្រួសារខ្លះលក់២នាក់ប្តីប្រពន្ធបានចំណេញ១ថ្ងៃជាង១០ម៉ឺនរៀលឯណោះ ។
លៀសហាលត្រូវអ្នកលក់ទាំងនោះបញ្ជាក់ថាគ្រប់ជនជាតិរាប់ទាំងខ្មែរអ៊ិស្លាមផងអាចទទួលទានបាន ព្រោះគ្រឿងផ្សំប្រើរ៉ុតឌីសាច់មាន់ មិនប្រើរ៉ុតឌីសាច់ជ្រូកទេ ។
លៀសសម្រាប់លក់តាមរទេះនោះទិញបន្តពីអ្នកនាំមកពីខេត្តសៀមរាប ។ លៀសឆៅ១គីឡូក្រាមថ្លៃ១០០០រៀលដោយក្នុង១គីឡូក្រាមស្មើ៣កំប៉ុង ។
អ្នកលក់ជាច្រើនឱ្យដឹងស្រដៀងគ្នាថា ក្រោយចំអិន និងផ្សំគ្រឿងរួច លៀសលក់បានតម្លៃ១កំប៉ុង១៥០០រៀល ។ ចំពោះការលក់ដាច់តិច ឬច្រើនអាស្រ័យលើអ្នកលក់ នីមួយៗស្គាល់ភូមិសាស្ត្រ ។ អ្នកខ្លះលក់ទាំង២នាក់ប្តីប្រពន្ធអស់លៀស១ថ្ងៃ៥០គីឡូក្រាម ឯខ្លះពី៦០ទៅ៧០គីឡូក្រាម និងគ្រួសារខ្លះអះអាងថា លក់អស់រហូត៨០ទៅ១០០គីឡូក្រាមឯណោះ ។
ប្រកបមុខរបរលក់លៀសហាល ក្រៅពីរុញលក់ថ្មើរជើង ក៏មានអ្នកលក់តាមម៉ូតូផងដែរ។
អ្នកលក់លៀសហាលនៅក្រុងប៉ោយប៉ែតទាំងនោះភាគច្រើនទៅពីស្រុកខ្សាច់កណ្តាលខេត្តកណ្តាល ៕
ចែករំលែកព័តមាននេះ