ខេត្តបន្ទាយមានជ័យ ៖ គ្រួសារមួយប្តីជាជនពិការជើងឆ្វេង ដោយសារសង្គ្រាមក្នុងសម័យរដ្ឋកម្ពុជា ធ្លាក់ខ្លួនវេទនាបង្កើតរបរប៉ះកង់និងបូមខ្យល់ចល័តក្រោមដើមឈើតាមដងផ្លូវជាតិលេខ៥ ខណៈប្រពន្ធជាជាងប៉ះកង់ដូចគ្នាទាំងដៃជាប់កូនតូច មើលទៅគួរឲ្យសង្វេគមែនទែនប៉ុន្តែគ្រួសារជនពិការមួយនេះតស៊ូណាស់ក្នុងជីវិតតោកយ៉ាកបំផុតនេះ ចៀសផុតពីមុខរបរសុំទាន ។
គ្រួសារកំសត់មួយនេះរស់នៅលើដីចិញ្ចើមផ្លូវជាតិ មុខសកលវិទ្យាល័យមានជ័យស្ថិតក្នុងភូមិ និងសង្កាត់ទឹកថ្លា ក្រុងសិរីសោភ័ណដោយបុរសជាប្តីឈ្មោះហុន សំអាត អាយុ៥៦ឆ្នាំ ប្រពន្ធឈ្មោះភាព ស្រីល័ក្ខណ៍ អាយុ២៤ឆ្នាំ មានកូនប្រុសស្រី២នាក់ក្នុងបន្ទុក ។ កូនប្រុសច្បងអាយុ៥ឆ្នាំ កូនស្រីពៅទើបមានអាយុ២ខែតែប៉ុណ្ណោះ។
ជួបសម្ភាសន៍ផ្ទាល់ក្រោមដើមក្រខុបចិញ្ចើមផ្លូវជាតិលេខ៥ ខាងលិចស្ពានទឹកថ្លាប្រហែល៣០០ម៉ែត្រ បុរសជាជាងប៉ះកង់ និងបូមខ្យល់ចល័តរូបនេះប្រាប់ថា គាត់ជាអតីតយោធាស្រុកអូរជ្រៅសម័យរដ្ឋកម្ពុជា កាលពីឆ្នាំ១៩៨៦ និងរងរបួសដោយសារគ្រាប់ដេកា៨០ របស់ទ័ពព្រៃផ្លោងចូលបន្ទាយនៅឃុំកូប ស្រុកអូរជ្រៅក្នុងឆ្នាំ១៩៨៩ រងរបួសរហូតដល់ស្វិតជើងឆ្វេង និងរបួសក្បាលខាងស្តាំដេរជាច្រើនថ្នេរ ។ គាត់និយាយប្រាប់កោះសន្តិភាពថា ដោយសារជីវភាពខ្វះខាត គ្មានទាំងដីរស់នៅបច្ចុប្បន្នរស់នៅលើចំណីផ្លូវ គ្មានមុខរបរក៏បង្ខំចិត្តបង្កើតមុខរបរប៉ះកង់ និងបូមខ្យល់ចល័តនេះតែម្តង ។
ចំណែកប្រពន្ធគាត់ជាជាងប៉ះកង់មុខខ្ទមដ៏កំសត់ដើម្បីរកចំណូលជួយគ្នា ។ គ្រួសារមួយនេះនិយាយទាំងក្រៀមក្រំថា ចំណូលបានពីមុខរបរខាងលើថ្ងៃខ្លះបានថ្ងៃខ្លះអត់ស្ទើររកបាយឲ្យកូនហូបមិនចង់បាន ។ ពួកគាត់អះអាងថា ដំបូងគ្មានដើមទុនទិញសម្ភារៈប៉ះអ៊ុតនិងម៉ាស៊ីនបូមខ្យល់ទេ ។ដោយមើលឃើញពីទុក្ខលំបាកគ្រួសារគាត់លោកឧត្តមសេនីយ៍ទោអាត់ ខែម ស្នងការនគរបាលខេត្តទិញម៉ាស៊ីនភ្លើងឲ្យ១គ្រឿង ហើយគាត់ទិញបានបំពង់បូមខ្យល់ពីកន្លែងអេតចាយ ទើបបង្កើតបានមុខរបរមួយនេះ ដើម្បីចិញ្ចឹមគ្រួសារតែម្តង ។
យ៉ាងណាក៏ដោយ គ្រួសារកំសត់មួយនេះអំពាវនាវដល់សប្បុរសជន ក្នុងនិងក្រៅប្រទេសពិសេសសម្តេចតេជោនាយករដ្ឋមន្ត្រី និងសម្តេចកិត្តិព្រឹទ្ធបណ្ឌិតមេត្តាជួយពួកគាត់ឲ្យមានជម្រក និងដីដើម្បីរស់នៅបានសមរម្យនឹងគេផង ៕
ចែករំលែកព័តមាននេះ