ខេត្តបន្ទាយមានជ័យ ៖ ពលករខ្មែរម្នាក់ស្លាប់នៅក្នុងបន្ទប់រហូតក្លិនស្អុយ ទើបមានអ្នកដឹងនៅក្រុងបាងកក ហើយសង្ស័យថា អាចបណ្ដាលមកពីការឆក់ចរន្តតាមរយៈកាស់ទូរស័ព្ទ ត្រូវបានភាគីថៃបញ្ជូនឲ្យសាច់ញាតិតាមច្រកទ្វារអន្តរជាតិប៉ោយប៉ែត កាលពីម៉ោង២១យប់ ថ្ងៃទី២៤ ខែមករា ឆ្នាំ២០១៨ ។
ជនរងគ្រោះឈ្មោះ ប៊ូ សំបូរ ភេទប្រុស អាយុ៣០ឆ្នាំ ជាកម្មករសំណង់នៅក្រុងបាងកក ប្រទេសថៃ និងមានទីលំនៅភូមិក្រមល់ ឃុំរហាត់ទឹក ស្រុកមង្គលបូរី ខេត្តបន្ទាយមានជ័យ ។
សាច់ញាតិសពប្រាប់ថា ជនរងគ្រោះអាចស្លាប់តាំងពីយប់ថ្ងៃទី២១ ខែមករា លុះមានក្លិនស្អុយចេញមកក្រៅ ទើបអ្នកនៅបន្ទប់ជិតខាងសង្ស័យទៅរុញទ្វារបន្ទប់មើល ទើបដឹងពីការស្លាប់នេះនៅយប់ថ្ងៃទី២៣ ។
ក្រុមសាច់ញាតិបន្តថា ជនរងគ្រោះអាចស្លាប់ដោយសាឆក់ចរន្តអគ្គិសនីតាមរយៈកាស់ទូរស័ព្ទ ព្រោះមានកាស់ទូរស័ព្ទនៅនឹងត្រចៀកសងខាងរបស់សព ហើយខ្សែកាស់នោះមានឆេះរោលផងដែរ ។
ក្រោយបញ្ជូនដល់កម្ពុជា សពត្រូវបានសាច់ញាតិជួលរថយន្តបញ្ចូនបន្តទៅលំនៅដ្ឋានដើម្បីធ្វើបុណ្យតាប្រពៃណី ។ បើពិតជាដូចការលើកឡើងរបស់សាច់ញាតិមែន គ្រប់គ្នាគួរមានការប្រយ័ត្នផងរឿងប្រើប្រាស់កាស់ទូរស័ព្ទ សូមកុំប្រើវាពេលបញ្ចូលថ្មឲ្យសោះ ៕
ចែករំលែកព័តមាននេះ