ខេត្តបន្ទាយមានជ័យ ៖ ប្រភពពីកាសែតក្នុងស្រុកថៃមួយបានផ្សាយថា មានពលករខ្មែរម្នាក់បានបង្កហិង្សា ហើយបាញ់ទៅលើគ្រួសារមួយជាពលករធ្វើការរួមអាជីព ជាមួយគ្នា បណ្តាលឲ្យរបួសធ្ងន់នៅស្រុកកាប៊ីនបូរី ខេត្តចាន់បុរី កាលពីវេលាម៉ោង៨ និង៣០នាទីយប់ ថ្ងៃទី២២ មករា ២០១៨ សង្ស័យបែកថ្នាំ។ តាមប្រភពបានឲ្យដឹងថា ដំបូងគ្រួសាររងគ្រោះជិះម៉ូតូ២នាក់ប្តីប្រពន្ធ ទៅទិញម្ហូប ក្រោយសម្រាកពីការងារ លុះត្រលប់មកកន្លែងធ្វើការវិញ ស្រាប់តែជនសង្ស័យឈ្មោះ ចង ភេទប្រុស ដែលជាកម្មករស៊ីឈ្នួលចៀរកៅស៊ូឲ្យថៅកែថៃរួមអាជីព ស្ទាក់ផ្លូវកាក់ឲ្យឈប់បន្ទាប់មកជន សង្ស័យបានយកកាំភ្លើងច្នៃវែងបាញ់គ្រាប់ប្រាយ(គ្រាប់កង់)បាញ់ចំបុរសជាប្តី។
ប្រភពបន្តថា ពេលដែល ម៉ូតូជនរងគ្រោះដួលហើយជនសង្ស័យបានប្រើអំពើរហិង្សាយកស្វាយកាំភ្លើងច្នៃនោះវាយលើនាងជាប្រពន្ធឈ្មោះ សក ភីន អាយុ៣៤ឆ្នាំ បណ្តាលឲ្យសន្លប់ និងរងរបួសធ្ងន់ថែមទៀត។ ក្រោយទទួលបានសេចក្តី រាយការណ៍អាជ្ញាធរមានសមត្ថកិច្ចថៃបានចុះដល់កន្លែងកើតហេតុ ដោយជិតផ្លូវបំបែកស្រុកកាប៊ីនបុរី ខេត្តចាន់បុរីឆ្ពោះទៅខេត្តស្រះកែវប្រហែល៥គីឡូម៉ែត្រ ក៏ប្រទះឃើញម៉ូតូម៉ាកហុងដាវ៉េវពណ៌ខៀវ ដែលជនរងគ្រោះជិះដួល និងរកឃើញអាវុធច្នៃវែង១ដើមទើបប្រមូលទុកជាភស្តុតាង។ ចំណែកជន រងគ្រោះ ត្រូវបានសមត្ថកិច្ចជួយបញ្ជូនទៅមន្ទីរពេទ្យក្នុងខេត្តកើតហេតុដើម្បីធ្វើការសង្គ្រោះ។
សមត្ថកិច្ចថៃ ដាក់កាសង្ស័យលើជនបង្កថាអាចមកពីបែកថ្នាំទើបហ៊ានបង្កការបាញ់បោះ និងប្រើហិង្សាលើពលករខ្មែរ គ្នាឯងយ៉ាងដូច្នេះ។ បើទោះជាពេលនេះជនសង្ស័យកំពុងគេចខ្លួនហើយមិនទាន់ដឹងពីមូលហេតុយ៉ាង ណាក្តី ប៉ុន្តែសមត្ថកិច្ចថៃកំពុងប្រមាញ់តាមរកចាប់ខ្លួនហើយ។ ជុំវិញករណីខាងលើកោះសន្តិភាព មិនអាចរកការអត្ថាធិប្បាយពីមន្ត្រីកម្ពុជាប្រចាំប្រទេសថៃបានទេ ខណៈមន្ត្រីការិយាល័យទំនាក់ទំនង ព្រំដែនកម្ពុជាថៃប្រចាំច្រកទ្វារអន្តរជាតិប៉ោយប៉ែត លោក យ៉ាល់ ប៊ុនពៅ ទូរស័ព្ទចុចមិនចូលជាច្រើនដង៕
ចែករំលែកព័តមាននេះ