ប្រទេសជប៉ុន ៖ ដុំថ្មត្រូវបានជះទៅលើអាកាសដោយសារការផ្ទុះភ្នំភ្លើងមួយប៉ះពាល់ដល់ពួកអ្នកលេងស្គីនៅឯស្ថានីយលេងស្គីមួយនាភាគកណ្តាលជប៉ុន ។
យោងតាមទូរទស្សន៍ជប៉ុនថា មនុស្សម្នាក់បាត់ខ្លួនក្រោយការបាក់ដីបន្ទាប់ពីការផ្ទុះភ្នំភ្លើងនេះ ។ បើតាមក្រសួងការពារជាតិជប៉ុនថា ការបាក់ដី បណ្តាលឱ្យជាប់មនុស្សជិត១០នាក់ ក្នុងនោះ៦នាក់ជាសមាជិកកងកម្លាំងស្វ័យការពារជប៉ុន ។ អ្នកទាំងនោះត្រូវបានជួយសង្គ្រោះ ប៉ុន្តែមួយចំនួនរងរបួស ។ មនុស្ស៣នាក់ទៀតជាប់ដោយសារការបាក់ដីដែរ ត្រូវបានជួយសង្គ្រោះ ។ ទីតាំងលេងស្គីនេះស្ថិតនៅពុំឆ្ងាយប៉ុន្មានពីប្រភពទឹកក្តៅ KUSATSU ហើយពួកអ្នកជួយសង្គ្រោះកំពុងតាមរកមនុស្សបាត់ខ្លួន ។ នាពេលនេះគេលំបាកនឹងនិយាយថាតើការបាក់ដីនេះ បណ្តាលមកពីសកម្មភាពភ្នំភ្លើង ឬយ៉ាងណាឡើយ ក៏ប៉ុន្តែព្រឹត្តិការណ៍ទាំង២នេះកើតមានស្ទើរដំណាលគ្នា ។
យោងតាមបណ្តាសារព័ត៌មានជប៉ុនថា ការធ្លាក់ដុំថ្មភ្នំភ្លើងលើស្ថានីយលេងស្គី បណ្តាលឱ្យមនុស្ស១៥នាក់រងរបួស ។ ក្រុមអ្នកជួយសង្គ្រោះនិយាយថា មនុស្ស២នាក់រងរបួសធ្ងន់ ។
ភ្នំភ្លើង KUSATSU-SHIRANE មានកម្ពស់២.១៦០ម៉ែត្រ ហាក់ដូចជាផ្ទុះនាថ្ងៃទី២៣ មករា ។ អ្នកទទួលខុសត្រូវម្នាក់នៃទីភ្នាក់ងារឧតុនិយមជប៉ុននិយាយថា យើងអាចនិយាយថា ភ្នំភ្លើងហាក់ផ្ទុះ ក៏ប៉ុន្តែយើងសាកល្បងជានិច្ចបញ្ជាក់ពីរាល់ហេតុការណ៍នៅលើទីលាន ។ តាមរយៈបណ្តារូបភាពគេឃើញដុំថ្មហោះទៅលើដូចកាំជ្រួចអមដោយផ្សែងខ្មៅយ៉ាងក្រាស់ ។
នៅជប៉ុនមានភ្នំភ្លើងសកម្មចំនួន១១០ ក្នុងនោះភ្នំភ្លើង៤៧ត្រូវបានគេតាមដានជាប់ជាប្រចាំ ៕
ចែករំលែកព័តមាននេះ