បុរសម្នាក់បានដុតខ្លួនឯងឆេះយ៉ាងសន្ធោសន្ធៅ បន្ទាប់ពីមិត្តស្រីបានបដិសេធនូវសំណើសុំរៀបការរបស់គេ ។ ហេតុការណ៍ដ៏គួរឱ្យរន្ធត់នេះបានកើតឡើងកាលពីថ្ងៃទី២៣ វិច្ឆិកា ឆ្នាំ២០១២ នៅទីក្រុង Qingdao ខេត្តសានទុង ប្រទេសចិន ។ នេះបើយោងតាមប្រភពគេហទំព័រឆាយណាប៊ឺស ចេញផ្សាយថ្ងៃទី២៩ វិច្ឆិកា កន្លងមក ។
ប្រភពឱ្យដឹងទៀតថា បុរសអភ័ព្វស្នេហ៍រូបនោះឈ្មោះវូ (Wu) អាយុ៣៨ឆ្នាំ រស់នៅទីក្រុង ណានជាំង ខេត្តជាំងស៊ី បានរងរបួសរលាកដោយភ្លើងឆេះពេញខ្លួនប្រាណប្រហែលជា៦០ភាគរយ ហើយពេលនេះកំពុងស្ថិតក្នុងស្ថានភាពធ្ងន់។ ប្រភពបន្តថា លោក វូ បានជួបមិត្តស្រីរបស់ខ្លួននៅទីក្រុងណានជាំង ក្នុងអំឡុងឆ្នាំ២០១១ ប៉ុន្តែចំណងស្នេហ៍របស់ពួកគេត្រូវប្រេះឆា ក្រោយពីរស់នៅជាមួយគ្នាមួយរយៈកាលមក ហើយនាងសុំចែកផ្លូវគ្នា និងបានចាកចេញទៅរស់នៅស្រុកកំណើតក្នុងទីក្រុង Qingdao វិញ ។
នៅថ្ងៃទី២២ ខែវិច្ឆិកា លោកវូ បានបើករថយន្តពីក្រុងណានជាំងទៅកាន់ក្រុង Qingdao ដែលមានចម្ងាយ១.១០០គីឡូម៉ែត្រ ដោយដឹកទៅជាមួយនូវគ្រឿងបណ្ណាការដែលមានតម្លៃរាប់ម៉ឺនយ៉ាន់ ដើម្បីសុំនាងរៀបការ ។ ទន្ទឹមនឹងនេះ លោក វូ បានទិញសាំងមួយប៊ីដុងទៅជាមួយជាស្រេច ប្រសិនបើមិត្តស្រីបដិសេធនូវសំណើរបស់ខ្លួន លោកនឹងធ្វើអត្តឃាតភ្លាម ។
នៅម៉ោង៨ព្រឹក ថ្ងៃទី២៣ វិច្ឆិកា លោកវូបានទៅដល់ផ្ទះមិត្តស្រី ហើយបានសុំនាងរៀបការ ប៉ុន្តែត្រូវនាងបដិសេធភ្លាមៗដែរ ។ ពេលនោះលោកវូ បានគំរាមថា លោកមិនអាចរស់នៅលើលោកនេះបានទេ ប្រសិនបើនាងមិនរៀបការជាមួយលោក ។ ដោយឡែកនាង និងម្តាយរបស់នាងវិញ នឹកស្មានថាលោកវូ និយាយលេង ភ្លាមនោះស្រាប់តែលោកវូ ស្រោចសាំងពេញខ្លួនប្រាណរបស់ខ្លួន ហើយដុតឆេះយ៉ាងសន្ធោសន្ធៅ ។ រំពេចនោះទាំងម្តាយ និងកូនស្រី បានទូរស័ព្ទទៅក្រុមពន្លត់អគ្គិភ័យ ប៉ុន្តែនៅពេលពួកគេទៅដល់ លោកវូត្រូវភ្លើងឆេះរលាកពេញខ្លួនប្រាណ ហើយត្រូវបានគេបញ្ជូនទៅកាន់មន្ទីរពេទ្យក្រុង Qingdao ភ្លាមៗ ។ ពេលនេះកំពុងសម្រាកព្យាបាលនៅបន្ទប់សង្គ្រោះបន្ទាន់ ៕
ចែករំលែកព័តមាននេះ