ខេត្តប៉ៃលិន ៖ ប្រជាពលរដ្ឋក្មេងចាស់ប្រុសស្រី មកពីបណ្តាភូមិផ្សេងៗ ជាច្រើនក្នុងក្រុងប៉ៃលិន ជាង១៤០០នាក់ បាននាំគ្នាសម្រុកចូលទៅបើកថ្នាំពេទ្យ និងព្យាបាលជំងឺក្រពះ ពោះវៀន ឈឺសន្លាក់ដៃជើង ឈឺធ្មេញ និងមានបញ្ហាភ្នែកផងដែរ ។ ដែលការបើកព្យាបាលជំងឺឥតគិតថ្លៃនេះ មានរយៈពេល៣ថ្ងៃ គឺចាប់ពីថ្ងៃទី១៩-២១ ខែមករា នេះ ដោយក្រុមគ្រូពេទ្យរបស់អង្គការ គាំពារអន្តរជាតិ មកពីប្រទេសអូស្ត្រាលី កាណាដា ហុងកុង តៃវ៉ាន់ សហរដ្ឋអាមេរិក និងមកពីទីក្រុង ភ្នំពេញផងដែរ ។
ព័ត៌មានបានឱ្យដឹងថា គេសង្កេតឃើញប្រជាពលរដ្ឋចាស់ៗ មួយចំនួនដែលមានអាយុចាប់ពី៥០ ទៅ៦០ឆ្នាំ បានឱ្យកូនចៅរបស់ខ្លួន ដឹកតាមម៉ូតូក្នុងរយៈចម្ងាយរាប់សិបគីឡូម៉ែត្រទៅអង្គុយរង់ចាំពិនិត្យសុខភាព និងបើកថ្នាំពេទ្យយកទៅលេបពោល គឺតាំងពីព្រឹកព្រលឹមមិនទាន់មាន គ្រូពេទ្យមកធ្វើការ ខ្លះទៀតសុខចិត្តជិះម៉ូតូឌុបអស់លុយជាច្រើន ទៅអង្គុយនៅក្នុងរោងពិនិត្យព្យាបាល អត់បាយក្រហាយទឹក បើទោះបីជាគ្រូពេទ្យឈប់សម្រាក ចេញទៅទទួលទានអាហារថ្ងៃត្រង់ក៏ដោយ ពួកគាត់នៅតែទន្ទឹងរង់ចាំ ទាំងអ្នកខ្លះបានដេកលង់លក់ នៅលើកៅអីតែម្តង ។
នេះបង្ហាញឱ្យឃើញថា ពួកគាត់ម្នាក់ៗ ពិតជាមានបញ្ហាសុខភាព ត្រូវការថ្នាំពេទ្យជាចាំបាច់ ព្រោះអ្នកខ្លះ មានជំងឺរលាកក្រពះ រលាកពោះវៀន រលាកច្រមុះ ឈឺក្បាលវិលមុខ កើតកមរមាស ។ អ្នកខ្លះខ្សឹបប្រាប់ថា គេបើកថ្នាំឥតយកប្រាក់ហើយ លេបទៅត្រូវនឹងជំងឺឆាប់ជាសះស្បើយលឿនទៀត ដូច្នេះពួកគាត់ពិតជាសប្បាយចិត្តក្នុងការនាំគ្នាទៅអង្គុយរង់ចាំទទួលយកអំណោយថ្នាំពេទ្យទោះយូរប៉ុណ្ណោះក៏ស៊ូដែរ ។
លោក ឆាល ហូ តំណាងឱ្យអង្គការគាំពារអន្តរជាតិមកពីប្រទេសកាណាដាបានឱ្យដឹងថា ក្រុមគ្រូពេទ្យទាំងអស់ខាងលើ សុខចិត្តចំណាយកម្លាំងពេលវេលា និងថវិកាមកធ្វើការព្យាបាលប្រជាពលរដ្ឋខ្មែរដោយឥតគិតថ្លៃ ហើយពួកគាត់មិនត្រឹមតែមកព្យាបាលជំងឺទូទៅដូចជាក្រពះ ពោះវៀន ឈឺសន្លាក់ដៃជើង ផ្តាសាយ ប៉ុណ្ណោះទេពួកគាត់មានទទួលការលាងសម្អាតធ្មេញ ឱ្យសិស្សសាលា និងមនុស្សចាស់ព្រមទាំងដកធ្មេញប៉ះធ្មេញ ពិនិត្យភ្នែក ចែកវែនតាជូនមនុស្សចាស់សម្រាប់មើលអក្សរ និងកាត់សក់ជូនប្រជាពលរដ្ឋផងដែរ ។
លោកបានបន្តទៀតថា នេះជាលើកទី២ហើយ ដែលក្រុមលោកបានមកធ្វើការព្យាបាលនៅក្រុងប៉ៃលិន ហើយក៏មានការព្យាបាលនៅតាមបណ្តាខេត្តមួយចំនួនទៀត ដូចជាខេត្តក្រចេះ និងរាជធានីភ្នំពេញផងដែរ ។
លោកសង្ឃឹមថា នៅឆ្នាំក្រោយៗ នឹងសហការគ្នាជាមួយប្រទេសផ្សេង ៗ ដើម្បីរកថវិការទិញថ្នាំយកមកព្យាបាលជូនប្រជាពលរដ្ឋខ្មែរបន្តទៀត ដើម្បីបង្ហាញពីសេចក្តីស្រឡាញ់រវាងមនុស្សនឹងមនុស្សដូចគ្នា ៕
ចែករំលែកព័តមាននេះ