ខេត្តប៉ៃលិន ៖ ឆ្កែ១ក្បាល ត្រូវបានប្រជាពលរដ្ឋព្រួតគ្នាវាយរហូតដល់ស្លាប់ ខណ:ស្ត្រីរងគ្រោះជាម្ចាស់ ដើរចេញទៅក្រៅផ្ទះបម្រុងទៅផ្សារ ខណៈដែលប្តីទាញទ្វាររបងបិទក៏បានកៀបឆ្កែជាប់ លុះឆ្កែនោះរើរួច ក៏ស្ទុះទៅខាំគ្រវីប្រពន្ធរបស់ខ្លួន បណ្តាលឱ្យដេកដួលក្នុងថ្លុកឈាម។…
ខេត្តប៉ៃលិន ៖ ឆ្កែ១ក្បាល ត្រូវបានប្រជាពលរដ្ឋព្រួតគ្នាវាយរហូតដល់ស្លាប់ ខណ:ស្ត្រីរងគ្រោះជាម្ចាស់ ដើរចេញទៅក្រៅផ្ទះបម្រុងទៅផ្សារ ខណៈដែលប្តីទាញទ្វាររបងបិទក៏បានកៀបឆ្កែជាប់ លុះឆ្កែនោះរើរួច ក៏ស្ទុះទៅខាំគ្រវីប្រពន្ធរបស់ខ្លួន បណ្តាលឱ្យដេកដួលក្នុងថ្លុកឈាម។ ភ្លាមៗនោះស្ត្រីរងគ្រោះ ត្រូវបានគេបញ្ជូនទៅសង្គ្រោះនៅមន្ទីរពេទ្យបង្អែកខេត្ត។ ហេតុការណ៍ឆ្កែខាំម្ចាស់របស់ខ្លួននេះ បានកើតឡើងកាលពីវេលាម៉ោង១១ព្រឹក ថ្ងៃទី១៨ ខែមករា ឆ្នាំ២០១៨នេះ ស្ថិតនៅក្នុងភូមិកូនភ្នំ សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន។
ប្រភពព័ត៌មានបានឱ្យដឹងថា ជនរងគ្រោះមានឈ្មោះ ចាន់ ផារី ភេទស្រី អាយុ៦៣ឆ្នាំ រងរបួសពេញខ្លួន ត្រូវគេបញ្ជូនទៅសង្គ្រោះនៅមន្ទីរពេទ្យបង្អែកខេត្ត។ ប្រភពបន្តទៀតថា សត្វឆ្កែ១ក្បាលខាងលើ ត្រូវបានម្ចាស់យកមកចិញ្ចឹមតាំងពីតូចមកម្លេះ ដោយស្លូត មិនធ្លាប់ខាំនរណាម្នាក់នោះទេ ហើយពេលម្ចាស់ចេញដើរទៅណា តែងតែដើរតាមជារៀងរហូត។ តែមុនពេលកើតហេតុ ស្ត្រីរងគ្រោះដើរចេញពីផ្ទះ បម្រុងនឹងទៅផ្សារទិញម្ហូប ពេលនោះប្តីរបស់គាត់បានទាញទ្វាររបងបិទ ដើម្បីកុំឱ្យឆ្កែមួយក្បាលនោះទៅតាមប្រពន្ធរបស់ខ្លួនដូច សព្វដង ស្រាប់តែបិទទៅកៀបសត្វឆ្កែនោះជាប់ លុះវារើបម្រះរួចក៏ស្ទុះទៅខាំស្ត្រីជាប្រពន្ធ ដោយមុតជាច្រើនចង្កូម។
ពេលនោះប្តីខំប្រឹងចូលទៅបេះយ៉ាងណាក៏មិនចេញ ហើយបានប្រជាពលរដ្ឋរស់នៅ ក្នុងភូមិឃើញសភាពបែបនេះ ក៏នាំគ្នាចូលទៅវាយបំបែករហូតដល់ងាប់តែម្តង។ រហូតមកដល់ពេលនេះ ស្ត្រីរងគ្រោះកំពុងសម្រាកនៅមន្ទីរពេទ្យបង្អែកខេត្ត ដោយសភាពរបួសធូរស្រាលជាងមុនបន្តិច ដោយគ្រូពេទ្យបានចាក់ថ្នាំបំបាត់ការឈឺចុកចាប់ និងចាក់ថ្នាំការពារឆ្កែឆ្កួតផងដែរ៕
ចែករំលែកព័តមាននេះ