ខេត្តស្ទឹងត្រែង ៖ ខណៈប្រេងឥន្ធនៈបន្តឡើងថ្លៃ ហើយស្ថានីយប្រេងឆ្លៀតកេងចំណេញលើបរិមាណរង្វាស់រង្វាល់មិនត្រឹមត្រូវធ្វើឱ្យប៉ះពាល់ដល់អ្នកប្រើប្រាស់ ជាពិសេសប្រជាពលរដ្ឋដែលមានប្រាក់ចំណូលតិច ហើយត្រូវចំណាយលើប្រេងឥន្ធនៈក្នុងតម្លៃខ្ពស់ ហើយមិនគ្រប់លីត្រតាមចំនួនបញ្ជាទិញថែមទៀត ពិតជាបង្ហាញឱ្យឃើញពីភាពទុច្ចរិតរបស់ម្ចាស់ស្ថានីយប្រេងយ៉ាងប្រាកដ ។
ជាក់ស្តែងក្នុងក្រុងស្ទឹងត្រែងមានស្ថានីយប្រេងរហូតដល់១៦បានដំណើរការលក់ប្រេងដល់អ្នកប្រើប្រាស់ ដោយអតិថិជនបានផ្តល់ទំនុកចិត្តលើស្ថានីយនីមួយៗទោះជាប្រេងតម្លៃថ្លៃក៏នៅតែទិញ ព្រោះវាជាតម្រូវការប្រើប្រាស់រាល់ថ្ងៃ ។ តែទីបំផុត គ្រាដែលប្រេងឡើងថ្លៃស្ថានីយលក់ប្រេងទាំងនោះបានលួចបន្ថយបរិមាណមិនគ្រប់ចំណុះឱ្យអ្នកទិញថែមទៀតផង ។
មហាជនមានការខ្នក់ចិត្តទៅលើស្ថានីយទាំង១៦ ដែលទាំងចាស់ទាំងថ្មីសុទ្ធសឹងអះអាង និងអួតថា ស្ថានីយប្រេងរបស់ខ្លួនគ្រប់លីត្រមិនកេងចំណេញទេ តែផ្ទុយទៅវិញក្រោយពីមានការចុះត្រួតពិនិត្យពីក្រុមមន្ត្រីជំនាញនៃអគ្គនាយកដ្ឋានកាំកុងត្រូលផ្នែកមន្ទីរពិសោធន៍ចល័ត-ប្រេងឥន្ធនៈកាលពីថ្ងៃទី១៦ មករា បានបង្ហាញថា ស្ថានីយប្រេងទាំង១៦មិនប្រក្រតីទៅលើចំណុះរង្វាស់រង្វាល់ ហើយស្ថានីយប្រេងមួយចំនួនទៀតលក់ប្រេងខ្វះគុណភាពធ្វើឱ្យខូចម៉ាស៊ីនយានយន្តថែមទៀត ។
ប្រជាពលរដ្ឋបានគាំទ្រដល់មន្ត្រីជំនាញដែលបានចុះពិនិត្យទៅលើគុណភាព និងចំណុះលីត្រនៃស្ថានីយប្រេងឥន្ធនៈ ដើម្បីឱ្យម្ចាស់ស្ថានីយទាំងអស់កែខ្លួនកុំឱ្យបន្លំកេងទាំងគុណភាព ទាំងបរិមាណស្របពេលប្រេងកំពុងឡើងថ្លៃ ។លោក គឹម ប្រុស ប្រធានសាខាកាំកុងត្រូលខេត្តស្ទឹងត្រែងបានបញ្ជាក់ថា សកម្មភាពចុះ ពិនិត្យស្ថានីយប្រេងនេះ មន្ត្រីជំនាញចុះពិនិត្យបានចំនួន១៦កន្លែងរកឃើញភាពមិនប្រក្រតីដូចជា ផ្នែករង្វាស់រង្វាល់មិនគ្រប់លីត្រ ក្នុងនោះរួមមាន១០០លីត្រខ្លះបាត់២លីត្រ ខ្លះ៣លីត្រ ខ្លះ៥លីត្រ និងខ្លះទៀតរហូតដល់៨លីត្រក៏មាន ហើយប្រេងមានគុណភាពអន់តម្រូវឱ្យម្ចាស់ស្ថានីយធ្វើកិច្ចសន្យាកែប្រែ ។ លោកប្រធានសាខាកាំកុងត្រូលបន្តថា ជាមួយនឹងការត្រួតពិនិត្យ មន្ត្រីជំនាញក៏បានណែនាំឱ្យម្ចាស់ស្ថានីយ ដែលរកឃើញមានភាពមិនប្រក្រតី ដូចជាផ្នែករង្វាស់រង្វាល់ត្រូវកែប្រែ ហើយចំពោះគុណភាពត្រូវជូនដំណឹងទៅម្ចាស់ក្រុមហ៊ុនឱ្យដំឡើងកម្រិតគុណភាពឡើងវិញ ។
អ្នកស្រី គៀង ម៉ាលី ម្ចាស់ស្ថានីយប្រេងវឌ្ឍនៈនៅក្រុងស្ទឹងត្រែង បានទទួលស្គាល់ថាឆ្លងតាមការត្រួតពិនិត្យនេះ មន្ត្រីជំនាញបានរកឃើញឧបករណ៍តាមស្ថានីយប្រេងដែលប្រើប្រាស់សព្វថ្ងៃមានការខ្វះខាត លើសលស់ខ្លះមែន ដោយសារតែឧបករណ៍ទាំងនោះវាចាស់ សឹករេចរឹល បញ្ចេញខ្យល់ច្រើនជាងប្រេង ។ប្រជាពលរដ្ឋបានសំណូមពរដល់មន្ត្រីជំនាញឱ្យចុះពិនិត្យបានញឹកញាប់ ដើម្បីឱ្យម្ចាស់ស្ថានីយលក់ប្រេងនីមួយៗមានភាពស្មោះត្រង់ជាមួយអតិថិជន កុំអាងតែមានប្រេងលក់តម្លៃថ្លៃហើយ កេងគុណភាព កេងចំណុះ យកចំណេញកប់ក្តោងបែបទុច្ចរិតបែបនេះតទៅទៀត ៕
ចែករំលែកព័តមាននេះ