ខេត្តប៉ៃលិន ៖ ក្នុង១ឆាកជីវិតរបស់មនុស្សលោក គ្មានអ្វីសប្បាយចិត្តជាងឪពុកម្តាយឃើញកូនចៅរបស់ខ្លួនរកស៊ីមានបាន រស់នៅសុខសាន្តជួបជុំក្រុមគ្រួសារ និងគ្មានអ្វីវិសេសជាងឃើញកូនរបស់ខ្លួនទទួលបាននូវមុខតំណែងការងារនោះទេ ។ ស្ថិតក្នុងសភាពជរាបន្តិច ស្ត្រីវ័យចំណាស់ម្នាក់ ហាក់បីដូចមានទឹកមុខញញឹមញញែមខុសប្លែកពីធម្មតា…
ខេត្តប៉ៃលិន ៖ ក្នុង១ឆាកជីវិតរបស់មនុស្សលោក គ្មានអ្វីសប្បាយចិត្តជាងឪពុកម្តាយឃើញកូនចៅរបស់ខ្លួនរកស៊ីមានបាន រស់នៅសុខសាន្តជួបជុំក្រុមគ្រួសារ និងគ្មានអ្វីវិសេសជាងឃើញកូនរបស់ខ្លួនទទួលបាននូវមុខតំណែងការងារនោះទេ ។ ស្ថិតក្នុងសភាពជរាបន្តិច ស្ត្រីវ័យចំណាស់ម្នាក់ ហាក់បីដូចមានទឹកមុខញញឹមញញែមខុសប្លែកពីធម្មតា ដោយអារម្មណ៍រំភើបញាប់ញ័រស្ទើរហូរទឹកភ្នែក បន្ទាប់ពីធ្វើដំណើរដ៏សែនឆ្ងាយ តាំងពីខេត្តកំពង់ឆ្នាំង រហូតមកដល់ខេត្តប៉ៃលិនព្រំដែនកម្ពុជាថៃ រួចដើរឡើងទៅមើលកូនប្រុសរបស់ខ្លួនទទួលបាននូវការប្រកាសតែងតាំងធ្វើជាប្រធានមន្ទីរថ្មី ជំនួសឱ្យប្រធានមន្ទីរចាស់ចូលនិវត្តន៍ ។
បើតាមសម្តីលោកយាយចំណាស់ម្នាក់ឈ្មោះ ចក់ យី អាយុជាង៧០ឆ្នាំ ត្រូវជាម្តាយរបស់លោក នុត សោភិរក្ស បានរៀបរាប់ទាំងសម្លេងភ័យផង អរផង ឱ្យដឹងថា គាត់បានធ្វើដំណើរដោយរថយន្តតាំងពីភូមិតាំងក្រសាំង ឃុំតាំងក្រសាំង ស្រុកទឹកផុស ខេត្តកំពង់ឆ្នាំង មកខេត្តប៉ៃលិន អស់រយៈពេលជាច្រើនម៉ោង ដើម្បីមកចូលរួមអបរសាទរការឡើងតំណែងជាប្រធានមន្ទីរសេដ្ឋកិច្ច និងហិរញ្ញវត្ថុរបស់កូនប្រុសច្បងរបស់គាត់ ។
គាត់បន្តទៀតទាំងសម្លេងហត់បន្តិចថា គាត់មានកូនចំនួន៤នាក់ កូនប្រុស២នាក់ កូនស្រី២នាក់ ហើយពួកគេម្នាក់ៗ សុទ្ធតែមានការងារធ្វើនៅតាមមន្ទីរស្ថាប័នគ្រប់ៗគ្នាអស់ហើយ ដោយឡែកកូនស្រីបានប្តីសុទ្ធតែជាអ្នកធ្វើការក្នុងជួរមន្ត្រីរាជការដែរ ។ គាត់បញ្ជាក់ថា ទោះបីជាដំណើរដ៏សែនវែងឆ្ងាយក៏ដោយ ហើយគាត់ស្ថិតនៅក្នុងវ័យជរាបន្តិចក្តី តែបន្ទាប់ពីឮដំណឹងថា កូនប្រុសរបស់ខ្លួនបានឡើងឋានៈជាប្រធានមន្ទីរសេដ្ឋកិច្ច និងហិរញ្ញវត្ថុ ទើបគាត់មានសេចក្តីអំណររំភើបរីករាយរហូតដល់មិនបានគិតថា ខ្លួនស្ថិតនៅក្នុងវ័យចំណាស់នោះឡើយ ។ ម្យ៉ាងវិញទៀត បន្ទាប់ពីចូលរួមសាទរ ការឡើងតំណែងកូនរបស់ខ្លួនរួច គាត់ក៏នៅស្នាក់នៅក្នុងខេត្តប៉ៃលិន២ទៅ៣ថ្ងៃបន្តទៀត ដើម្បីចូលរួមពិធីអាពាហ៍ពិពិពាហ៍ចៅស្រីរបស់ខ្លួនបន្តទៀត លុះរួចរាល់ហើយ ទើបឡើងរថយន្តត្រលប់ទៅស្រុកកំណើតវិញ ។ គ្រាន់តែឃើញកូនឡើងតំណែងជាប្រធានមន្ទីរថ្មី ហើយឃើញចៅស្រីរៀបការទៀត គាត់ពិតជាដេកលក់ស្រួល គ្មានទុក្ខកង្វល់ឡើយ ។
ចំណែកស្ត្រីចំណាស់ម្នាក់ទៀតឈ្មោះ គង់ ណែន អាយុ៦៩ឆ្នាំ ត្រូវជាប្អូនរបស់លោកយាយខាងលើ បានរៀបរាប់ឱ្យដឹងថា គាត់រស់នៅភូមិបឌិននៀវ សង្កាត់ប៉ៃលិន ក្រុងប៉ៃលិន ដោយគាត់មកចូលរួមអបអរសាទរនូវការទទួលតំណែងថ្មីរបស់ចៅខ្លួន ហើយគាត់មកដើម្បីជូនពរឱ្យទេវតាឆ្នាំថ្មីថែរក្សាចៅរបស់ខ្លួន ក្លាយទៅជាមនុស្សម្នាក់ដែលមានសមត្ថភាពខ្ពស់ ក្នុងការបំពេញភារកិច្ចរបស់ខ្លួន ឱ្យទទួលបាននូវភាពជោគជ័យនៅថ្ងៃខាងមុខ ។ លើសពីនេះ គាត់ឃើញមន្ត្រីតូចធំជាច្រើនចូលរួមក្នុងកម្មវិធីកាន់តំណែងចៅរបស់គាត់នេះ ធ្វើឱ្យគាត់មានកម្លាំងចិត្តកាន់តែខ្លាំងថែមទៀត ។
សូមបញ្ជាក់ផងដែរថា កាលពីរសៀលថ្ងៃទី១៦ ខែមករា ឆ្នាំ២០១៨ នេះ នៅក្នុងសាលប្រជុំសាលាខេត្តប៉ៃលិន អាជ្ញាធរខេត្តបានរៀបចំធ្វើពិធីប្រកាសតែងតាំង លោក នុត សោភិរក្ស ជាអនុប្រធានមន្ទីរសេដ្ឋកិច្ច និងហិរញ្ញវត្ថុ ទៅជាប្រធានមន្ទីរសេដ្ឋកិច្ច និងហិរញ្ញវត្ថុខេត្តប៉ៃលិន ជំនួសឱ្យ លោក រាម សុមាន ដែលត្រូវចូលនិវត្តន៍ ៕
ចែករំលែកព័តមាននេះ