ខេត្តបន្ទាយមានជ័យ ៖ ដំរីយក្សដ៏ធំ០១ក្បាល ដែលឆ្លងព្រំដែនពីប្រទេសថៃចូលមកកម្ពុជាតាមច្រកមួយ ក្នុងចំណុចភូមិអូរល្វា ឃុំជ្រៃសីម៉ា ស្រុកសំពៅលូន ហើយបង្កភ្ញាក់ផ្អើល និងភ័យខ្លាចដល់ពលរដ្ឋនៅទីនោះ ពេលនេះនៅតែបង្កភ័យខ្លាចដល់សិស្សានុសិស្សមួយចំនួនមិនហ៊ានទៅរៀនផងដែរ ។
លោកវរសេនីយ៍ទោបេន សំអាត អធិការនគរបាលស្រុកម៉ាឡៃប្រាប់តាមទូរស័ព្ទនៅរសៀលថ្ងៃទី១៦ ខែមករានេះថា ពេលនេះដំរីដ៏ធំខាងលើ កំពុងស្ថិតនៅចំណុចភូមិសាស្ត្រភូមិថ្មបាំង ឃុំបឹងបេង ស្រុកម៉ាឡៃនៅឡើយ ។ លោកបន្តថា ដំរីមួយក្បាលនេះថ្វីត្បិតតែ មិនទាន់បង្កអន្តរាយដល់អាយុជីវិតពលរដ្ឋ ប៉ុន្តែវាតែងតែមកផឹកទឹកពាងរបស់អ្នកស្រុក និងធ្វើឲ្យបែកពាងទឹកព្រមទាំងស៊ីផលដំណាំពលរដ្ឋទៀតផង ។
មិនតែប៉ុណ្ណោះឲ្យតែដល់ម៉ោង៥ល្ងាចឡើងទៅគឺវាមកឈរមុខសាលារៀនក្នុងភូមិនោះ និងស៊ីអំពៅដែលនៅក្បែរៗសាលានោះធ្វើឲ្យសិស្សសាលាមួយចំនួនលែងហ៊ានទៅរៀនទៀតផង ។ លោកបន្តថា ដំរីនោះពេលយប់វាដើរស៊ីដំណាំអ្នកភូមិ ឯពេលថ្ងៃចូលទៅដេកក្នុងព្រៃបរិស្ថានរនាមដូនសំ ព្រោះវាស្លូត ហើយជាដំរីឈ្មោល ។ លោកបញ្ជាក់ថា កន្លងមកក្រុមអភិរក្សថៃ គេបានមកទាក់ទងតាមរកដំរី ដើម្បីយកត្រឡប់ទៅវិញ ប៉ុន្តែ០២ទៅ០៣ថ្ងៃនេះ មិនឃើញមកកម្ពុជាទៀតទេ ។
បើទោះជាដំរីនោះស្លូតយ៉ាងណាក្តីតែដោយសារ ពលរដ្ឋរាយការណ៍ថា ពួកគាត់ព្រួយបារម្ភពីសុវត្ថិភាព លោកឧត្តមសេនីយ៍ទោអាត់ខែម ស្នងការនគរបាលខេត្តបានបញ្ជាឲ្យលោកចុះទៅចំណុចកើតហេតុ និងបានផ្សព្វផ្សាយឲ្យពលរដ្ឋតាមបណ្តាភូមិក្នុងស្រុកម៉ាឡៃ មានការប្រុងប្រយ័ត្នផងដែរ ៕
ចែករំលែកព័តមាននេះ