«The Strait Times»របស់សិង្ហបុរីបានផ្សាយពីលទ្ធផលអង្កេតលើការរៀបចំណាត់ថ្នាក់សៀវភៅឆ្លងដែនរបស់ប្រទេសដែលមានឥទ្ធិពលបំផុតនៅលើពិភពលោក ។ មានន័យថា អាចប្រើក្នុងការធ្វើដំណើរចេញ-ចូលនៅបរទេសដោយមិនចាំបាច់មានទិដ្ឋាការ(VISA) ។
តាមការអង្កេតក្នុងចំណោម២១៩ប្រទេសនិងដែនដីនៅទូទាំងពិភពលោករបស់ក្រុមហ៊ុនទីប្រឹក្សានៃការស្នាក់នៅ និងសិទ្ធិរបស់ពលរដ្ឋកាលពីថ្ងៃទី១០ មករា ២០១៨ បញ្ជាក់ថាសៀវភៅឆ្លងដែនរបស់សិង្ហបុរីមានឥទ្ធិពលបំផុតស្ថិតនៅលំដាប់ទី២នៅលើពិភពលោក អាចធ្វើដំណើរចេញ-ចូលប្រទេសនានានៅលើលោកដោយគ្មានទិដ្ឋាការបានចំនួន១៧៦ប្រទេស បន្តពីប្រទេសអាល្លឺម៉ង់ប្រើបាន១៧៧ប្រទេស ។
ចំណែកចំណាត់ថ្នាក់ទី៣រួមមានលិខិតឆ្លងដែនប្រទេសដាណឺម៉ាក ហ្វាំងឡង់ បារាំង អ៊ីតាលី ជប៉ុន ន័រវែស ស៊ុយអែត និងអង់គ្លេស អាចធ្វើដំណើរបានចំនួន១៧៥ប្រទេស។
លំដាប់ទី៤ រួមមានអូស្ត្រាលី បែលហ្ស៊ិក លុចសំបួ ហូឡង់ អេស្ប៉ាញ និងស្វ៊ីស ប្រើបានចំនួន១៧៤ប្រទេស ។
សម្រាប់ប៉ាស្ព័រម៉ាឡេស៊ីស្ថិតក្នុងលំដាប់ទី១២ប្រើបាន១៦៦ប្រទេស ។ ព្រុយណេស្ថិតនៅលំដាប់ទី២២ ប្រើបាន១៥៣ប្រទេស ។ ប្រទេសថៃ ស្ថិតនៅចំណាត់ថ្នាក់ទី៦៤ប្រើបាន៧៣ប្រទេស ។
ឥណ្ឌូណេស៊ី និងហ្វ៊ីលីពីន ស្ថិតនៅចំណាត់ថ្នាក់ទី៧២ ប្រើបាន៦៣ប្រទេស ។ ចំពោះលិខិតឆ្លងដែនប្រទេសកម្ពុជាស្ថិតនៅលំដាប់ទី៨៦ប្រើបាន៤៩ប្រទេស និងមីយ៉ាន់ម៉ានៅលំដាប់ទី៩២ ប្រើបាន៤២ប្រទេស ។
ប្រទេសឡាវ និងវៀតណាមស្ថិតនៅលំដាប់ទី៨៨ ប្រើបានចំនួន៤៧ប្រទេស ៕
ចែករំលែកព័តមាននេះ