ខេត្តប៉ៃលិន ៖ មនុស្សប្រុសស្រី៩នាក់រងរបួសត្រូវបានក្រុមគ្រួសារដឹកយកទៅសង្គ្រោះនៅមន្ទីរពេទ្យបង្អែកខេត្តទាំងយប់ ខណៈអ្នកបើកបរមិនប្រុងប្រយ័ត្នត្រង់ចំណុចផ្លូវកោងហើយនៅតែបន្ថែមល្បឿន បណ្តាលឱ្យរេចង្កូតធ្លាក់ក្នុងប្រឡាយអត់ទឹកបោកផ្ទប់អ្នកជិះទាំងអស់ទៅលើដីរងរបួសធ្ងន់ស្រាលតែម្តង ។ ហេតុការណ៍នេះបានកើតឡើងកាលពីវេលាម៉ោង៧និង១០នាទីយប់ ថ្ងៃទី១៥ ខែមករា ឆ្នាំ២០១៧ ស្ថិតនៅចំណុចស្រះឈូកក្នុងភូមិរោងចក្រ សង្កាត់បរយ៉ាខា ក្រុងប៉ៃលិន ខេត្តប៉ៃលិន ។
ប្រភពព័ត៌មានពីនគរបាលចរាចរបានឱ្យដឹងថា ជនរងគ្រោះដែលរបួសធ្ងន់ចំនួន០២នាក់ របួសស្រាលម្នាក់ ចំណែកអ្នកផ្សេងទៀតរលាត់ដៃជើងតិចតួចដោយមានអ្នករួមដំណើរទាំងអស់ចំនួន០៩នាក់ ក្នុងនោះស្រី០៣នាក់ ។
បើតាមសាក្សីនៅកន្លែងកើតហេតុបានឱ្យដឹងថា មូលហេតុដែលបណ្តាលឱ្យក្រឡាប់គោយន្តកន្ត្រៃធ្លាក់ក្នុងប្រឡាយអត់ទឹកនេះមកពីអ្នកបើកបរបើកក្នុងល្បឿនលឿនលុះដល់ត្រង់ចំណុចផ្លូវកោងចុះទួលចាប់ហ្វ្រាំងមិនជាប់ក៏ជ្រុលចង្កូតធ្លាក់ទៅក្នុងប្រឡាយអត់ទឹកបណ្តាលឱ្យរងរបួសតែម្តង ។
ក្រោយពេលកើតហេតុជនរងគ្រោះទាំងអស់ត្រូវបានបងប្អូនបញ្ជូនទៅសង្គ្រោះនៅមន្ទីរពេទ្យបង្អែកខេត្តប៉ៃលិន ចំណែកគោយន្តកន្ត្រៃត្រូវបានយកទៅរក្សាទុកនៅនគរបាលចរាចរខេត្តរង់ចាំម្ចាស់មកយកទៅជួសជុល ៕
ចែករំលែកព័តមាននេះ