រាជធានីភ្នំពេញៈ ពេលថ្មីៗនេះនៅក្នុងបណ្តាញសង្គមហ្វេសប៊ុក មានវីដេអូឃ្លីបមួយបង្ហាញពីអ្នកធ្វើចរាចរចំណាស់ម្នាក់កំពុងធ្វើចរាចរណ៍ដែលកកស្ទះនៅផ្លូវបំបែកលូ៥ ក្នុងសង្កាត់ស្ទឹងមានជ័យ រាជធានីភ្នំពេញ ហើយវីដេអូឃ្លីបនេះកំពុងតែអង្រួនបេះដូងមិត្តអ្នកចូលទស្សនាដោយក្តីអាណិតអាសូរបំផុត។ទន្ទឹមនឹងនេះ ពួកគេបានចែករំលែកទៅកាន់មិត្តភក្តិជាច្រើនពាន់នាក់នៅក្នុងបណ្តាញសង្គមហ្វេសប៊ុក ។ វីដេអូនេះបើគេចាំមិនភ្លេចទេ គឺស្ថានីយ៍ទូរទស្សន៍អាស៊ីអាគ្នេយ៍បានចាក់ផ្សាយកាលពីពេលកន្លងមកនេះ ។
វីដេអូឃ្លីបនេះមានរយៈពេល៤នាទី និង២៥វិនាទី ត្រូវបានគេចែករំលែកទៅកាន់មិត្តភក្តិជាបន្តបន្ទាប់ ដោយនៅចំណងជើងមានសរសេរឈ្មោះថា លោកអ៊ំ ហោ ម៉ៅ ។
មានប្រិយមិត្តជាច្រើនដែលទស្សនាវីដេឃ្លីបនេះ បានកោតសរសើរពីការខិតខំប្រឹងប្រែងបំពេញការងារក្រោមកម្តៅថ្ងៃ បញ្ជាសញ្ញាចរាចណ៍ឆ្វេងស្តាំ ដើម្បីសម្រួលដល់ការធ្វើដំណើររបស់ប្រជាពលរដ្ឋ ដោយមិនគិតពីការនឿយហត់ ទោះបីខ្លួនមានវ័យចំណាស់ហើយក្តី។
ប្រិយមិត្តមួយរូបដែលបានដាក់ឈ្មោះ នៅក្នុងគណនីហ្វេសប៊ុកថា Bunny Var បានសម្តែងក្តីអាណិតអាសូរដល់លោកប៉ូលិសចំណាស់រូបនេះ ដោយបាន Commnent ថា «ខ្ញុំក៏ចូលរួម អាណិតរូបលោក ហោ ម៉ៅ ប៉ុន្តែយើងគួរជួយគាត់តាមរូបភាពណា !» ។
ប្រិយមិត្តក្នុងគណនីមួយទៀតឈ្មោះ Nhel Cheam បានសរសេរថា «ពួកយើងត្រូវតែចូលរួមជួយគាត់នៅអ្វីដែលអាចធ្វើទៅបាន នេះគឺជាលើកទីមួយហើយដែលខ្ញុំបានឃើញមន្រ្តីគំរូបែបនេះ» ។
ដោយឡែកប្រិយមិត្តម្នាក់ទៀត ដែលមានគណនីឈ្មោះ Zenya Loveliness បានសរសេរថា « តើគាត់នៅឯណា ខ្ញុំតឹងចិត្តណាស់ដែល ឃើញបែបនេះទោះបីជាខ្ញុំមិនមែនជាអ្នកធូរធារ ក្តី តែខ្ញុំក៏មិនទាន់ពិបាកដូចគាត់ដែរ ខ្ញុំអាសូរមនុស្សជាច្រើនដែលដូចគាត់ និងលំបាកជាងគាត់ខ្លាំងណាស់ បើសិនជាថ្ងៃណាមួយខ្ញុំអាចរកស៊ីហើយមានលុយច្រើនខ្ញុំនឹងជួយគាត់ទាំងអស់គ្នាអោយមានការងារធ្វើនិងរស់នៅប្រសើរជាងនេះ….» ។ មិនត្រឹមតែប៉ុណ្ណោះ នៅមានប្រិយមិត្តជាច្រើនរាប់មិនអស់សុទ្ធតែបានសរសេររៀបរាប់ពីទឹកចិត្តអាណិតអាសូរដល់បុរសចំណាស់រូបនេះ ។
ទោះបីជាយ៉ាងណា នេះគឺជាជីវិតដែលកើតមកក្នុងវាលវដ្តសង្សារ ត្រូវតែតស៊ូជម្នះរាល់ឧបសគ្គក្នុងឆាកជីវិត មិនត្រូវបណ្តែតបណ្តោយតាមព្រហ្មលិខិតឡើយ ។ យើងសូមកោតសរសើរដោយស្មោះចំពោះលោកអ៊ំហោ ម៉ៅ ដែលបានខិតខំបំពេញការងារមិនខ្លាចនឿយហត់ ដើម្បីសម្រួលចរាចរណ៍នៅផ្លូវវេងស្រេងដែលជាផ្លូវមហាកកស្ទះងាយស្រួលដល់ការធ្វើដំណើរ។ ខ្សែជីវិតរបស់គាត់ពិតជាគួរឱ្យសង្វេគ ជាងនេះទៅទៀតនោះ ភរិយារបស់គាត់មានជំងឺស្វិតដៃជើង មិនអាចដើររួចនោះទេ ដូច្នេះគាត់មិនអាចធ្វើអ្វីកើតនោះទេ និងជាបន្ទុករបស់លោក ហោ ម៉ៅពេលត្រឡប់ទៅផ្ទះវិញ ៕
ចែករំលែកព័តមាននេះ