ខេត្តរតនគិរី ៖ អាវុធវែងមួយដើមដែលប្រជាពលរដ្ឋអ្នកដើរអេតចាយម្នាក់ប្រទះឃើញ នៅចុងព្រលានយន្តហោះ ហើយរាយការណ៍ជូននគរបាលប៉ុស្តិ៍រដ្ឋបាលសង្កាត់កាចាញនោះ បានបញ្ជូនបន្តទៅការិល័យព្រហ្មទណ្ឌកម្រិតធ្ងន់ហើយ នៅព្រឹកថ្ងៃអាទិត្យទី១៣ រោចខែបុស្ស ឆ្នាំរកា នព្វស័ក…
ខេត្តរតនគិរី ៖ អាវុធវែងមួយដើមដែលប្រជាពលរដ្ឋអ្នកដើរអេតចាយម្នាក់ប្រទះឃើញ នៅចុងព្រលានយន្តហោះ ហើយរាយការណ៍ជូននគរបាលប៉ុស្តិ៍រដ្ឋបាលសង្កាត់កាចាញនោះ បានបញ្ជូនបន្តទៅការិល័យព្រហ្មទណ្ឌកម្រិតធ្ងន់ហើយ នៅព្រឹកថ្ងៃអាទិត្យទី១៣ រោចខែបុស្ស ឆ្នាំរកា នព្វស័ក ព.ស២៥៦១ ត្រូវនឹងថ្ងៃទី១៤ ខែមករា ឆ្នាំ២០១៨នេះ។ ហេតុការណ៍ប្រទះឃើញអាវុធនោះនៅវេលាម៉ោង១ និង៣០នាទី ថ្ងៃសៅរ៍ ១២រោច ខែបុស្ស ឆ្នាំរកា នព្វស័ក ព.ស២៥៦១ ត្រូវនឹងថ្ងៃទី១៣ ខែមករា ឆ្នាំ២០១៨ ត្រង់ចំណុចចុងព្រានយន្តហោះ ស្ថិតក្នុងភូមិ៧មករា សង្កាត់ឡាបានសៀក ក្រុងបានលុង ខេត្តរតនគិរី។ យោងតាមប្រភពបានឱ្យដឹងថា ក្រោយមានការផ្ញាក់ផ្អើលក្នុងពេលប្រទះឃើញអាវុធធន់វែងមួយដើមនោះភ្លាម អ្នករើសអេតចាយខាងលើបានរាយការណ៍បន្ទាន់ដល់នគរបាលប៉ុស្តិ៍រដ្ឋបាល ឃុំកាចាញដែលនៅកៀកក្បែរនោះ ដើម្បីត្រួតពិនិត្យ និងនាំយកទៅរក្សាទុក។
លោក សួន សាវុធ នាយប៉ុស្តិ៍រដ្ឋបាលសង្កាត់កាចាញ បានឲ្យក្រុមអ្នកព័ត៌មានដឹងថា អាវុធខាងលើជាប្រភេទធុនអាវុធAK47 មានបង់មួយ និងគ្រាប់៥គ្រាប់។ ប្រជាពរដ្ឋអ្នករើសអេតចាយម្នាក់ឈ្មោះ ឆុន សារុំ ភេទស្រី អាយុជាង៣០ឆ្នាំ រស់នៅសង្កាត់កាចាញ ក្រុងបានលុងប្រទះឃើញនៅចុងព្រលានយន្តហោះ ខណៈដែលគាត់ដើររើសអេតចាយ។ ការប្រទះឃើញអាវុធដ៏គ្រោះខាងលើនេះ គេសង្ស័យថា អាចមានជនលាក់ទុកបម្រុងធ្វើសកម្មភាពបង្កគ្រោះថ្នាក់ដល់អ្នកណាមួយហើយ។ បច្ចុប្បន្នអាវុធធុនវែងខាងលើនោះ ត្រូវបាននគរបាលប៉ុស្តិ៍រដ្ឋបាលសង្កាត់កាចាញ ធ្វើកំណត់ហេតុប្រគល់ជូនការិយាល័យព្រហ្មទណ្ឌកម្រិតធ្ងន់រក្សាទុក ដើម្បីធ្វើការស្រាវជ្រាវបន្ត៕
ចែករំលែកព័តមាននេះ