ខេត្តប៉ៃលិន ៖ បុរសម្នាក់រងរបួសធ្ងន់ធ្ងរប៊ិះដាច់ចង្កេះ ត្រូវបានអ្នកជិតខាង និងក្រុមគ្រួសារដឹកទៅសង្គ្រោះនៅមន្ទីរពេទ្យបង្អែកខេត្ត បន្ទាប់ពីផឹកស្រាស្រវឹងរៀងៗខ្លួន រួចមកក៏ផ្លែសម្តីអួតអាងដាក់គ្នាទៅវិញទៅមក រហូតដល់ ទប់កំហឹងមិនបានក៏ទាញយកដាវសាម៉ូរ៉ៃស្ទុះទៅកាប់ប្រហារជនរងគ្រោះយ៉ាងពេញទំហឹង បណ្តាលឱ្យដេកដួលក្នុងថ្លុកឈាមតែម្តង ។ ហេតុការណ៍នេះបានកើតឡើងកាលពីវេលាម៉ោង៨និង៣០នាទីយប់ថ្ងៃទី១៣ ខែមករា ឆ្នាំ២០១៨ ស្ថិតនៅចំណុចភូមិក្បាលព្រលាន សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន ។
លោកគង់ សំណាង នាយប៉ុស្តិ៍នគរបាលសង្កាត់អូរតាវ៉ៅបានឱ្យដឹងថា ជនសង្ស័យឈ្មោះ ហម ឌី ភេទប្រុស អាយុ៣៤ឆ្នាំ មុខរបរជាកសិករ ។ ចំណែកជនរងគ្រោះឈ្មោះ សើ យាក ភេទប្រុស អាយុ២៣ឆ្នាំ ទាំង២នាក់ រស់នៅទីកន្លែងកើតហេតុខាងលើ ។ លោកបានបន្តទៀតថា មូលហេតុកាប់គ្នានេះ ដោយសារជនសង្ស័យបាន ផឹកស៊ីនៅក្នុងផ្ទះ ឯជនរងគ្រោះផឹកស៊ីនៅក្រៅផ្ទះ កាលពីវេលាម៉ោង៨និង០០នាទីយប់កើតហេតុនោះ ពួកគេបានមកជួបជុំគ្នាហើយក៏និយាយឌឺដងដាក់គ្នាពេលស្រវឹងហ្នឹង ។ ពេលនោះជនសង្ស័យបានយកដាវសាម៉ូរ៉ៃនោះមកដាក់ពីមុខដោយមិនទាន់បានកាប់នៅឡើយទេ ហើយជនរងគ្រោះនៅតែឌឺដាក់ទៀតដោយថា «បើចង់ហ៊ានកាប់ ក៏កាប់មក អញ្ចឹងទៅណឹះ » ហើយជនសង្ស័យក៏យកកាំបិតកាប់សម្រេចកាប់តែម្តងទៅ ។ គ្មានរឿងអ្វីធំដុំនោះទេ មានរឿងតែប៉ុណ្ណឹងឯង រួចកាប់ហើយជនរងគ្រោះ បានអ្នកជិតខាងយកទៅមន្ទីរពេទ្យបង្អែកខេត្ត ហើយអ្នកជិតខាងបានតេមកប៉ុស្តិ៍នគរបាល លោកក៏ដឹកនាំកម្លាំងនគរបាលចុះទៅចាប់នៅនឹងកន្លែងកើតហេតុតែម្តងទៅ ។ លោកបញ្ជាក់ទៀតថា ការកាប់គ្នានេះ គឺកើតឡើងនៅកន្លែងផ្ទះជួល ខេត្តប៉ៃលិនដែលធ្វើសម្រាប់ជួលឱ្យកម្មករស្នាក់នៅ ។
ចំណែក លោក យ៉ែម សារិទ្ធ អធិការនគរបាលក្រុងប៉ៃលិនបានឱ្យដឹងដែរថា រហូតមកដល់រសៀលថ្ងៃទី១៤ ខែមករា ឆ្នាំ២០១៨ ខាងមន្ត្រីលោកកំពុងរៀបចំកសាងសំណុំរឿង ដើម្បីបញ្ជូនបន្តទៅស្នងការនគរបាលខេត្ត ឱ្យចាត់ការបន្ត ។ លុះគ្រូពេទ្យឃើញរបួសធ្ងន់ធ្ងរពេក មិនអាចជួយបានទើបដឹកបញ្ជូនទៅមន្ទីរពេទ្យខេត្តបាត់ដំបងភ្លាមៗ ។ ចំណែកជនរងគ្រោះកំពុងសម្រាកព្យាបាលនៅមន្ទីរពេទ្យខេត្តបាត់ដំបង ដោយត្រូវគ្រូពេទ្យដេរជាង៤០ថ្នេរ ។
សូមបញ្ជាក់ផងដែរថា រហូតមកដល់ពេលនេះ អំពើហិង្សាកើតឡើងចំពោះគ្រួសារមួយចំនួននៅក្នុង ក្រុងប៉ៃលិន ដោយសារតែឥទ្ធិពលគ្រឿងស្រវឹង បណ្តាលឱ្យអ្នកខ្លះ ត្រូវនគរបាលហៅទៅអប់រំជាច្រើនលើកច្រើនសារ និងអ្នកខ្លះទៀតលេងលះគ្នាធ្វើឱ្យកូនតូចៗ ក្លាយទៅជាកំព្រាវេទនាគួរឱ្យសង្វេគផងដែរ ៕
ចែករំលែកព័តមាននេះ