រាជធានីភ្នំពេញ ៖ បន្ទាប់ពីទទួលបានជោគជ័យជាបន្តបន្ទាប់រយៈពេល៣ជំនាន់រួចមកនោះ ក្រុមសិល្បៈយុវជនល្ខោនខោលជំនាន់ថ្មី បានផ្តួចផ្តើមជ្រើសរើសសិស្សជំនាន់ទី៤ឲ្យចូលហាត់រៀនដោយមិនគិតថ្លៃ ។
ការចុះឈ្មោះចូលរៀនចាប់ផ្តើមពីថ្ងៃនេះតទៅ ហើយការហាត់រៀននឹងត្រូវចាប់ផ្តើមនាថ្ងៃទី៤ ខែមីនា ឆ្នាំ២០១៨រៀងរាល់ថ្ងៃអាទិត្យ ។
ប្រធានក្រុមសិល្បៈយុវជនល្ខោនខោលជំនាន់ថ្មី និងជាគ្រូបង្ហាត់ផ្ទាល់លោកហង់ ភូមិរ៉ា ប្រាប់កោះសន្តិភាពកាលពីថ្ងៃទី១២ មករា ២០១៨ថា ក្រុមរបស់លោកបានបង្កើតឡើងជាងមួយឆ្នាំមកហើយ ។ ចំពោះការបង្ហាត់បង្រៀនបានធ្វើឡើង៣ជំនាន់ ។ ក្រុមសិល្បៈរបស់លោកបង្ហាត់ផ្តោតជាសំខាន់ទៅលើល្ខោនខោលជាងរបាំប្រពៃណី ដែលបង្រៀនតែទៅលើ នារីៗប៉ុណ្ណោះ ។ បច្ចុប្បន្នកំពុងតែជ្រើសរើសសិស្សជំនាន់ទី៤សម្រាប់ហ្វឹកហាត់ដោយមិនយកប្រាក់ឡើយ ហើយមួយសប្តាហ៍ហាត់តែមួយថ្ងៃប៉ុណ្ណោះគឺថ្ងៃអាទិត្យព្រឹកល្ងាចនៅសាកលវិទ្យាល័យភូមិន្ទវិចិត្រសិល្បៈ ។
បើតាមលោកហង់ ភូមិរ៉ា ការបង្ហាត់បង្រៀននាពេលកន្លងមកគឺទទួលបានជោគជ័យច្រើន ក្នុងនោះសិស្សមានឱកាសបានចេញសម្តែងច្រើនហើយការហាត់រៀនមួយថ្ងៃក្នុងមួយសប្តាហ៍នោះ គឺទទួលបានការចេះដឹងច្រើនជាងអ្នកអាជីពទៅទៀត ។
ភាគច្រើនសិស្សនិស្សិតដែលហាត់រៀនគឺពីបណ្តាវិទ្យាល័យ និងសាកលវិទ្យានានាដែលរៀនជំនាញ ផ្សេងៗ ប៉ុន្តែដោយសារចិត្តស្រឡាញ់សិល្បៈទើបពួកគេបានឆ្លៀតទំនេរពីការសិក្សាដើម្បីហាត់រៀនសិល្បៈ ។ ការដែលពួកគេហាត់រៀននេះ គឺគោលបំណងចង់ដឹងពីសិល្បៈបុរាណខ្មែរយើង ហើយពេលដែលចេះទៅអាចចូលរួមផ្សព្វផ្សាយសិល្បៈបុរាណខ្មែរទៅកាន់ ក្មេងៗជំនាន់ក្រោយទៀត ។
តាមការរំពឹងទុករបស់លោកហង់ ភូមិរ៉ា សិស្សនៅជំនាន់ថ្មីនេះនឹងទទួលបានជោគជ័យដូចគ្នា បើទោះបីជាយុវវ័យសម័យនេះហាក់នៅមានកម្រិតនៃការយល់ដឹងពីតម្លៃ និងការគាំទ្រសិល្បៈវប្បធម៌បុរាណខ្មែរក៏ដោយ ។
លោកហង់ ភូមិរ៉ា បញ្ជាក់ថា «ការជ្រើសរើសសិស្សចូលរៀននាពេលនេះគឺខ្ញុំមិនមានការជួយពីភាគីណាមួយឡើយ ពោលគឺជាការចំណាយប្រាក់របស់ខ្ញុំផ្ទាល់ និងការជួយជ្រោមជ្រែងបន្ថែមពីកូនក្រុមរបស់ខ្ញុំប៉ុណ្ណោះ ។ ប៉ុន្តែក្នុងចិត្តស្រឡាញ់ និងចូលរួមអភិរក្សសិល្បៈវប្បធម៌ខ្មែរខ្ញុំបានខិតខំចំណាយទាំងពេលវេលា និងថវិកាផ្ទាល់ខ្លួន ដើម្បីផ្សព្វផ្សាយឲ្យកូនខ្មែរបានស្គាល់ និងបានដឹង ។
គោលបំណងសំខាន់របស់ខ្ញុំនាពេលនេះគឺចង់ឲ្យកូនខ្មែរបានស្គាល់ពីតម្លៃ និងសិល្បៈដ៏ល្អផូរផង់របស់ជាតិខ្លួន ដើម្បីឲ្យពួកគេទាំងនោះក្លាយជាអ្នកបន្តវេនសម្រាប់បង្ហាត់បង្រៀនដល់អ្នកជំនាន់ក្រោយទៀត ។ ប្រសិនបើយើងមិនជួយបណ្តុះបណ្តាលអ្នកស្រឡាញ់សិល្បៈបុរាណខ្មែរដែលនៅតិចតួចនេះទេ នោះវានឹងរឹតតែបាត់បង់ពីមួយថ្ងៃទៅមួយថ្ងៃ ក្នុងពេលដែលវប្បធម៌បរទេសកំពុងតែវាយលុកចូលមកយ៉ាងគំហុក» ៕
ចែករំលែកព័តមាននេះ