ខេត្តប៉ៃលិន ៖ បុរសជាកម្មករម្នាក់ រងរបួសរយះក្បាលផ្នែកខាងស្តាំធ្ងន់ធ្ងរ ត្រូវគ្រូពេទ្យដេរអស់ជាច្រើនថ្នេរ ខណ:សម្រាកពីការងារជាកម្មករ ក៏នាំគ្នាផឹកស៊ីជួបជុំមិត្តភក្តិ៤ទៅ៥នាក់ រហូតដល់ស្រវឹងជោកជាំ ជជែកគ្នាលេងសើចចុះឡើងៗ ស្រាប់តែទាស់ពាក្យសម្តីគ្នា រហូតដល់ទាញកាំបិតខ្វែវកាប់ទៅលើជនរងគ្រោះ បណ្ដាលឱ្យប៊ិះធ្លាយខួរស្លាប់តែម្តង ។ ក្រោយពីកាប់ប្រហារដោយសារទាស់ពាក្យសម្តីបន្តិចបន្តួចរួចមក ត្រូវបាននគរបាលចាប់ក្របួចភ្លាមៗ ។
ហេតុការណ៍ខាងនេះ បានកើតឡើងកាលពីវេលាម៉ោង០១និង៣០នាទីរសៀល ថ្ងៃទី១០ ខែមករា ឆ្នាំ២០១៨ ស្ថិតនៅត្រង់ចំណុចភ្នំកេះ ក្នុងភូមិទំនប់ ឃុំស្ទឹងត្រង់ ស្រុកសាលាក្រៅ ខេត្តប៉ៃលិន ។
ប្រភពព័ត៌មានពីលោក រី ដារ៉ា អធិការរង នៃអធិការដ្ឋាននគរបាលស្រុកសាលាក្រៅ បានឱ្យដឹងថា ជនសង្ស័យមានឈ្មោះ រ៉េត សារ៉ាត់ ភេទប្រុស អាយុ២៥ឆ្នាំ ដោយបានយកកាំបិតខ្វែវដងវែងកាប់ ប្រហារទៅលើជនរងគ្រោះចំត្រង់ក្បាលពីមុខផ្នែកខាងស្ដាំ បណ្ដាលឱ្យរងរបួសធ្ងន់ធ្ងរ ។ ចំណែកជនរងគ្រោះ មានឈ្មោះ ខៀវ សង្ហា ភេទប្រុស អាយុ៣៣ឆ្នាំ របួសផុងលលាដ៏ក្បាល ត្រូវបានគេបញ្ជូនទៅឱ្យគ្រូពេទ្យដេរអស់ជាច្រើនថ្នេរ រស់នៅភូមិឃុំកើតហេតុជាមួយគ្នា ។
លោកបានបន្តទៀតថា មុនដំបូងជនរងគ្រោះ និងជនសង្ស័យបានឈប់សម្រាកពីការងារជាកម្មករកាប់ចិញ្ច្រាំដំឡូងមីឱ្យថៅកែរម្នាក់ ហើយក៏បបួលនាំមិត្តភក្តិផ្សងៗទៀត ទិញស្រា.សយកមកជួបជុំផឹកស៊ី ក្លែមសាច់ពិសេស (សាច់ឆ្កែ) តាំងពីព្រឹករហូតដល់ថ្ងៃ ស្រាប់តែជជែកគ្នាលេងសើចចុះឡើងៗ ទើបជនដៃដល់បានទាញយកខ្វែវ បម្រុងកាប់ផ្តាច់ក្បាលជនរងគ្រោះ លុះពេលងាកទាន់ទើបមុតត្រូវចំហៀងខាងស្តាំរបួសធ្ងន់តែម្តង ។
ក្រោយពេលកើតហេតុភ្លាមៗ ជនរងគ្រោះត្រូវបានក្រុមគ្រួសារដឹកយកទៅដេរនៅមន្ទីរពេទ្យបង្អែកខេត្ត ។ ចំណែកឯជនដៃដល់ ត្រូវបាននគរបាលស្រាវជ្រាវចាប់ខ្លួនអនុវត្តន៍តាមច្បាប់ ៕
ចែករំលែកព័តមាននេះ