រាជធានីភ្នំពេញ ៖ អ្នកនាងអម្ពរ ទេវី បានមកពីអាមេរិកដល់ប្រទេសកម្ពុជានៅថ្ងៃទី១១ ខែមករា ឆ្នាំ២០១៨ ដើម្បីចូលរួមសម្តែងក្នុងខ្សែភាពយន្តតាមការស្នើសុំពីផលិតករនៅក្នុងស្រុក ។
ដំណើរមកកម្ពុជារបស់អ្នកនាងអម្ពរ ទេវី នាពេលនេះគឺដូចលើកមុនដែរ គឺមកជាមួយកូនប្រុសស្រីរបស់នាងដោយមិនមានវត្តមានស្វាមីរបស់នាងមកជាមួយទេ ។
អ្នកនាងអម្ពរ ទេវី បានមកដល់អាកាសយានដ្ឋានអន្តរជាតិភ្នំពេញ នៅអំឡុងម៉ោង១រសៀល ជាមួយនឹងការរង់ចាំទទួលស្វាគមន៍ពីសាច់ញាតិ អតីតស្វាមីលោកពេជ្រ ភិរុណ សិល្បករ ជាពិសេសអ្នកដឹកនាំរឿងដែលអ្នកនាងត្រូវសម្តែងជូន ។ ក្រៅពីនេះមានមហាជនច្រើនកុះករស្វាគមន៍ អបអរសាទរដែរ ។
ការវិលមកកាន់ទឹកដីកំណើតនាពេលនេះតារាភាពយន្តជើងចាស់អ្នកនាងអម្ពរ ទេវី បានសម្តែងការអរគុណដល់បណ្តាទស្សនិកជនទាំងអស់ ដែលនៅតែគាំទ្រការសម្តែងរបស់នាងរហូតមកដល់ពេលនេះ ។
អ្នកនាងអម្ពរ ទេវី នឹងចូលរួមសម្តែងជាតួអង្គស្ត្រីរឹងប៉ឹងមួួយរូបដែលជាអ្នកបណ្តាក់ទុនរកស៊ី ។ នាងរំពឹងថា ភាពយន្តថ្មីនេះនឹងទទួលការបានគាំទ្រច្រើនពីទស្សនិកជន ដ្បិតមានរសជាតិខុសពីរឿងមុន ។
អ្នកនាងអម្ពរ ទេវី ដែលបានទៅសាងជីវិតលើទឹកដីអាមេរិកហើយនោះ មើលឃើញថាបច្ចុប្បន្ននេះវិស័យសិល្បៈភាពយន្តខ្មែរមានការរីកចម្រើនខ្លាំង ។
ការវិលមកកាន់ទឹកដីកំណើតជាថ្មីរបស់អ្នកនាងអម្ពរ ទេវី តបតាមការស្នើសុំរបស់ម្ចាស់ផលិតកម្ម RED PICTURE ដែលឲ្យនាងចូលរួមសម្តែងរឿង«ឆន្ទា» ដែលគ្រោងនឹងចាក់ផ្សាយនៅលើកញ្ចក់ទូរទស្សន៍CTN ។
កាលពីប៉ុន្មានខែមុនអ្នកនាងអម្ពរ ទេវី ធ្លាប់បានមកចូលរួមសម្តែងរឿង«ទឹកចិត្តម្តាយសម័យថ្មី»របស់អ្នកស្រីពាន់ ភួងបុប្ផា ។
អ្នកនាងអម្ពរ ទេវី គ្រោងនឹងស្នាក់នៅក្នុងប្រទេសកម្ពុជារយៈពេលប្រមាណ២ខែ ដើម្បីចូលរួមថតបំពេញប្លង់ក្នុងខ្សែភាពយន្តដែលនាងចូលរួមសម្តែង ។
ការវិលមកកាន់ស្រុកកំណើតដើម្បីថតខ្សែភាពយន្តរបស់តារាសម្តែងអ្នកនាងអម្ពរ ទេវី នេះត្រូវទស្សនិកជាច្រើនសម្តែងការស្វាគមន៍ និងអបអរ ខណៈពេលកេរ្តិ៍ឈ្មោះរបស់នាងមិនទាន់រលុបចេញពីបេះដូងទស្សនិកជននៅក្នុងស្រុកនៅឡើយ ។
អ្នកនាងអម្ពរ ទេវី ធ្លាប់និយាយថាបើទោះបីជានាងបានរសាត់អណ្តែតទៅកាន់ជីវភាពថ្មីលើទឹកដីអាមេរិកក៏ដោយ ប៉ុន្តែនិស្ស័យជាអ្នកសិល្បៈរបស់នាងហាក់មិនចេញទៅណាឆ្ងាយឡើយ ។
ដោយឡែកអតីតស្វាមីរបស់អ្នកនាងអម្ពរ ទេវី គឺលោកពេជ្រ ភារុណ ធ្លាប់បានអះអាងថា ក្នុងនាមជាអ្នករាប់ខានគ្នា លោកនៅតែចាំទទួលស្វាគមន៍អតីតភរិយារបស់លោកជានិច្ចនៅពេលដែលនាងមកកាន់ស្រុកខ្មែរ ម្តងៗ ។ ការទទួលរបស់លោកគឺមិនមែនក្នុងនាមប្តីប្រពន្ធទេ ពោលគឺលោកចាំប្រឹក្សាយោបល់ និងជ្រោមជ្រែងគ្រប់បែបយ៉ាងទាំងអស់ព័ន្ធទៅនឹងការចង់បានរបស់អម្ពរ ទេវី ក្នុងការចូលរួមថតភាពយន្ត ។
លោកពេជ្រ ភិរុណ បព្ជាក់ថាសម្ព័ន្ធភាពស្នេហារវាងលោក និងអ្នកនាងអម្ពរ ទេវី បានកាត់ផ្តាច់ច្រើនឆ្នាំហើយ មិនអាចវិលទៅរកសភាពដើមវិញបានឡើយ ក្នុងពេលនាងបានសាងជីវិតថ្មីជាមួយស្វាមីលើទឹកដីអាមេរិក ៕
ចែករំលែកព័តមាននេះ